Репортаж «Агропромсервис» ООО-сто
Республикань велень хозяйствань предприятиятнесэ моли норовонь урядамось. Ломантне ды техникась важодить чинек-венек, эдь сюрось кенерсь. Васняяк, кода те эрси эрьва иень пивсэмань шкасто, аграрийтне урядызь озимой товзюротнень, ней жо капшить пивсэме лия сюронь культуратнень. Зярс пертьпельксэсь маней ды сэтьме, сюронть капшама нуемс.
Неть читнестэ минь ульнинек инжекс Ицялонь райононь «Агропромсервис» ООО-сонть ды эсенек сельмесэ неинек, кодамо важодема лаки предприятиянть паксятнесэ. Весе тевтне топавтовить хозяйствань прявтонть, алкуксонь аграрникенть Владимир Ильич Нужновонь пшти вановтонзо ало.
Владимир Ильич марто вастовинек предприятиянь конторасо. Сон ёвтнесь, кода молить хозяйствасонть тевтне.
– Кода свал, ушодан шнамонь валсто. Минек предприятиясонть важоди пек вадря ды виев команда. Ломантне весе велень, эрязат, кодамояк тевде а пелицят, техниканть марто курок муить кель-вал. Эряви меремс, истямо вадря важодиця марто хозяйстванть тевензэ свал кармить молеме икелев. «Агропромсервис» ООО-нь паксятнесэ нуемань тевтнесэ техникась важоди весе эсенек хозяйствань, механизатортнэяк тескень. Вейкесь ансяк пек ацирьгавты: од механизатортнэ, нама, а сатныть. Ансяк те мелявксось неень шкасто ули республикань весе хозяйстватнесэ. А капшить од ломантне молемс роботамо велень хозяйствав, кадык зарплататнеяк тесэ ков седе вадрят ошонсетнень коряс, ялатеке те ёнксонть а кочкить. Чиить тиринь велестэ сельмень конязь, удаловгак а варштыть. А сёпан, минь эдь анокт максомс аволь ансяк важодема, куш эрямо таркаяк. Саемга, мелят Иван Сергеевич Аверьяновнень, хозяйстванть ёроков специалистэнть туртов, федеральной программань вельде стявтозель кудо. Тедеде жо лездатано строямс эрямо тарка ниле эйкакшонь тетянтень, вадря скотникенть Павел Павлович Тюргашкинэнь туртов. Хозяйствасонть сон важоди малав кемень иеть. Ломанесь од, эряза ды эсь тевензэ парсте топавтыця. Истямо важодицятненень пек кенярдтано ды лездатано, – ёвтни Владимир Ильич.
Те иестэ «Агропромсервис» ООО-нь паксятнесэ весемезэ видезь 6 тёжат гектарт эрьва кодамо культурань видьметь. 1400 эйстэст – озимой товзюро, 650 – яровой товзюро, 70 – пинеме, 300 – кснав, сехте ламо видезь ламбамо якстерькайть – малав 2000, кукурузадонть жо – 360, седе тов молить ламо иень тикшетне, сындест – 360. Меельцекс хозяйствань прявтось тешкстась седе, тедеде сынь васенцеде видсть соя. Те культурась, бути варштамс экономиканть ёндо, пек выгодной. Сондензэ озавтозь малав 208 гектарт. Зяро жо ули соянь коряс норовось, кортамо эзь карма, эдь культурась эштё эзь кенере ды истяко а содави, кодамо ули сюпавчизэ.
– Тедеде нуемась минек ушодовсь июлень 14-це чистэ. Кода свал, карминек пивсэме озимой товзюросто. Читне аштесть псить ды сэтьметь. Кенеринек урядамо малав 1000 гектарт. Товзюрось чачсь а берянь, прятне виевть, товнетне покшт. Весе пивсэзенть усксинек видьстэ утомс. Зярс озимойтнень нуеманть лоткавтынек, кундынек пиянь пидемань шужонтень. Васенце паксясонть сюронть летькечизэ ульнесь 14 %. Урядазь норовонть усктано «АПО Элеком» ОАО-в. Тосо сюронть костить кода эряви, – ёвтни Владимир Ильич.
Ансяк кортамосто – тевс. Хозяйствань прявтось тердимизь эсенек сельмесэ варштамс, кода молить нуематне, ды минь сыргинек вастовомо паксясо важодицятнень марто. Ёвтазь таркантень пачкодинек курок. Те шкантень паксятнесэ мольсь «пси» важодема». Сюронть пивсэсть зярыя комбайнат. Паксясонть роботасть Rostselmach, Claas ды белорусской комбайнатне, мельгаст ардтнесть автомашинатне.
Васенцекс, кинь марто содавтымизь Владимир Ильич, ульнесь хозяйствань прявтонь полавтыцясь Юрий Борисович Есин. Те предприятиясонть сон важоди 14 иеть.
– Мон ломанесь Покш Березникень. Тетям-авам пингень перть важодсть колхозсо. Нама, сынст лангс ванозь, монь седейзэньгак чачсь вечкема велень хозяйствань тевтненень. Истя армиядо мейле туинь тонавтнеме Саранскоев МГУ-нь экономической факультетэв. Кода прядыя тонавтнеманть, кучимизь важодеме Ицялонь лишмень племенной заводов учётчикекс. Шкань ютазь карминь прявт бухгалтерэкс. Вейке таркасо важодинь 1981 иестэ саезь 2007 иес. Мейле колмо иеть топавтынь «Агропромсервис» ООО-нь прявтонь тевенть. Шкань ютазь карминь прявтонь полавтыцякс. Важодемань тевесь пек вечкеви. Ломантне тесэ вадрят ды алкуксонь профессионалт, – корты Юрий Борисович.
Седе тов кортамонть поладынек ёроков ды эсензэ тевензэ вечкиця комбайнёронть Михаил Сергеевич Козлов марто. Те хозяйствасонть сон труди малав 38 иеть. Ютазь иестэ сон казезель Трудовой Славань III-це степенень Орденсэ.
– Эсь прям лия профессиясо а неян. Те тевсэнть лакан эйкакш пингестэ саезь. Вана Сергей цёрамгак ней полады механизаторонь тевенть. Уставась эштё пиже цёрынекс. Свал сайнилия мартон комбайнасо лездыцякс, ней вана малав 15 иеть сонсь комбайнёр. Кадык минек тевесь рудазов ды аволь шождынетнестэ, ансяк ялатеке вечкса. Неке валтнэнь ёвты цёрамгак, – ёвтни комбайнёрось.
Эштё вейке комбайнань руленть экшсэ роботась Дмитрий Олегович Милушкин. Механизаторонть тевентень сон алтась малав 20 иеть.
– Тей важодеме сынь вишка цёрабаекс. Механизаторонь тевенть марто содавтымим крёстной тетям. Седе тов лия профессиядо мелем арсемс арасель. Ицялонь техникумонть прядомадо мейле сынь те хозяйствантень ды вана неень шкас котьман тесэ. Важодян эрьва кодамо техника марто, сезонсто ойсян тракторс, ней вана комбайнас, – ёвтни механизаторось.
Мейле кортынек Виталий Александрович Тимохин марто. Велень хозяйствасо сон важоди 22 иеть. Сон ломанесь тевде а пелиця, эрьва кодамо техникас чарькодиця.
– Варчния прям лия профессиясо, цидярдынь пельие ды мекев велявтынь механизаторонь тевентень. Арсян, вечкемавтомо минек тевсэнть васов а ардат. Кель-вал муян эрьва кодамо техника марто, – корты комбайнёрось.
Шкань ютазь ваксозонок ардсь эсензэ тевензэ вадрясто содыцясь ды машинань эряза ветицясь Иван Сергеевич Аверьянов. Ломанесь сон од ды ёроков. Те хозяйствасонть руль эйкшсэ важоди котоце ие.
– Мон чачинь-касынь Ицялонь райононь Кемля велесэ. Школань прядомадо мейле варчния прям лия важодемасо, мелезэнь эзь тукшно. Кода тердимизь важодеме тей – оймем чачсь. Те автомашинадонть башка, эштё важодян «ГАЗон» машинанть руль экшсэ. Мон свал тевсэ, свал ломань ютксо, – корты водителесь.
«Агропромсервис» ООО-нь трудий ломантне а пелить кодамояк стакачиде. Весе минь содатано, велень хозяйствасо важодемась аволь шождынетнестэ. Тей сыть роботамо ломанть, конатнень седейсэст эри модантень ды техникантень вечкемась. Секскак паксясо важодицятне неень шкасто эрязасто ды маштозь теить эсест тевест, эдь зярс пертьпельксэсь ашти лембе ды сэтьме, норовонть кенерема пачтямс утомс. Кадык тевест топавтовить шкастонзо ды мелявкстомо!
Алена Артемьева
Фототне Эдуард Ретунскиень