Четверг, марта 28, 2024
Важное

Республикань Культурань кудосо ютась «Мокшасто саезь Сурас» регионъютконь морамонь фестивалень Гала-концертэсь. Сон мольсь «Раськень моронь декада» весероссиянь акциянть юрсо, конась алтавсь Россиянь Раськетнень культурань сюпавчитнень иентень. Мордовияв сакшность эрьва кодамо ёнкссто морамонь ансамблят. Колмо чинь перть сынь содавтсть жюринть ды ваныцятнень эсь творчестваст марто.



Чувашиянь Ядринской райононь Ядрино велестэ те фестивалентень сакшнось «Пилеш» («Пизёл») народной фольклорной ансамблясь. Сонзэ вети Чувашиянь культурань заслуженной роботникесь А. Н. Краснова.

– Минек ансамблянтень сы иестэ топодить кеветее иеть. Кото иеде икеле тенек макссть народной ансамблянь лем. Весемезэ тесэ морсить 22 ломанть: ават, цёрат, эйкакшт. Тей сынек 14 ломанть. Репертуарсонок ветькень раськень морот, теде башка, невтнетяно койть-кирдат, кенярксчить, конатнень тешкстасть покштянок-бабанок иень перть. Сцена лангсо невттяно, кода икеле ютыль эйдентень лемень максомань коесь: велень сыре ломантне пурнавильть вейс ды кочкильть лем. Мелят путынек тикшень анокстамонь кой. Морсицянок эрьва кодамо иень, сехте сырентень 76 топодить. Малав весе пенсиясот ды улить важодицяткак: тонавтыцят, микшницят, медроботникть, охранникть. Вейкесь репетицияв ардтни 20 вайгельбень тарка. Пурнавкшнотано велень Культурань кудосо. Сон, нама, ташто, эряволь бу витнемс-петнемс, арась эсенек тарканок, косо вастневлинек, ламо материалонок, кинень тень весементь кадомс? Ули мель панжомс музейне.

Морсеме ардтнетяно эрьва ков. Ульнинек Казаньсэ, Нижней Новгородсо, Тверьсэ, Волгоградсо, Санкт-Петербургсо, аволь умок велявтынек Комистэ «Завалинка» весероссиянь фестивальстэ. Свал мельспаросо сыргатано ковгак лия ёнксов. Лезды тенек Культурань министерствась, килангонть пандомс лездыть спонсорт. Мезе меревлинь, пандемиядо икеле седе шождаль ардтнемс.
Ветькень раськесь истя жо явови: улить верховойть, низовойть ды среднейть. Аламодо явовтано оршамопелень, моротнень ды келень-кортавксонь коряс. Минек раськесь моронь вечкиця. Весе дивсить, ансамблясонок зярыя цёрат морсить. Бути ломанесь а вечки моро – сон а кузтеви сцена лангс. Ансамблясонть монськак морсян ды седян баянсо. Мордовиясо «Пилеш» марто ульнинек кавтошка иеде икеле «Предания старины» фестивальсэ – сестэ саинек васенце тарка. Те коллективденть башка, ветян эштё кавто ансамблят, вейкесь эйкакшонь. Сынст марто истя жо ардтнетяно эрьва кува, – ёвтнесь Альбина Николаевна.

Сон школадо мейле прядсь культпросветучилища, седе тов – Чебоксары ошсо Музыкально-педагогической институт. 1985 иестэ саезь важоди школасо музыкань тонавтыцякс.
«Пилеш» ансамблясо кемень иеть морсить мирдть-нить Ятрушевтне. Нина Егоровна ды Алексей Степанович чачсть теке Ядрино велесэ, од шкасто тукшность эрямо Новочебоксарск ошов. Пенсияв лисемадо мейле састь эрямо мекев велев. Валост коряс, пек мелезэст тукшны. Алексей Степанович ансамблясо седи баянсо.

Чувашиянь инжетне «Мокшасто саезь Сурас» фестивальсэнть «Фольклорной ансамбля» номинациясо саизь колмоце тарканть.
Ули меленек ёвтнемс фестивалень лия инжетнедеяк. «Раздолье» раськень моронь ансамблясь – РФ-нь народной творчествань заслуженной коллектив. Сынь састь Калужской областень Товарково посёлкасто. Ветицяст – РФ-нь культурань заслуженной роботникесь В. Н. Токарев.

– Минь васенцеде Мордовиясо. Пек мелезэнек тусь. Ломантне паронь арсицят, инжень вечкицят. Ушосо пшкадят – кортыть мартот, ёвтыть, кода муемс кинть. «Раздолье» коллективенек сы иестэ тешкстасы 45 иень юбилеензэ. 1978 иестэ сонзэ пурнакшныя. Те уш омбоце состав. Минденек кемгавтово ломанть, улить од ломантькак. Кода сыть юткозонок одтнэ? Сынст эрявить манямс моротнень вельде. Тей сыть сетне, кить вечкить моро! Те ашти васенце таркасо. Морсетяно рузонь народной морот. Ардтнинек Россиянь кемзисемге регионов, ульнинек Италиясо, Швейцариясо, Германиясо, Белоруссиясо. Сюкпря ёвтавлинь коллективсэ морсицятненень. Сынстемест мезеяк а улевель. Неть ломантне – народной моронь алкуксонь вечкицят, – пачтясь Владимир Николаевич. «Раздолье» ансамблясь сайсь омбоце тарка «Раськень моронь ансамбля» номинациясо. А уш кодат мазыйть оршамопелест, валсо а ёвтави!

Те коллективсэнть уш зярыя иень перть морси Николай Калиничев. Моронтень вечкемась косто-бути чачсь эйзэнзэ уш вишкинестэ. Семиясост кияк а морси. Васня сон морсесь эйкакшонь ансамблясо, кемнилее иесэ сась «Раздолье» коллективев. Пек вечки морамо народной ды казаконь морот. Од цёранть лемдить «цёковокс». Сон аволь весть лиснесь изницякс раськень моронь весероссиянь пелькстамотнесэ.

– Бути Пазось макссь вайгель – мекс а кецявтомс ломантнень? Свал мельспаросо лиснян сцена лангс, минек ломантне вечкить народной морот, конат токшить ойменть. Арсян, раськень моротне седе товгак кармить эрямо! – мерсь тенек Николай.

Н. Калиничев саизе васенце тарканть «Сольное пение» номинациясо, сон морызе «Выйду на улицу» рузонь народной моронть. Морамсто кенерсь вешкемеяк, те седеяк кецявтынзе ваныцятнень.
Изницятненень ды весе пелькстыцятненень лембе валт ёвтась МР-нь Культурань, национальной политикань ды архивень тевень министрась С. Н. Баулина:

– Сюкпря В. Д. Поленов лемсэ Россиянь народной творчествань кудонтень. Россиянь Раськетнень культурань сюпавчитнень иестэ ульнесть культурань ламо кенярксчить. Мельспаро тенек, Мордовиясь кочказель народной моронь декадань панжицякс. Республиканок сюпав койсэ-кирдасо, культурасо, конатнень весе седейсэ ванстыть минек раськетне.

«Мокшасто саезь Сурас» регионъютконь морамонь фестивалентень сакшность морсицят Удмуртиясто, Комистэ, Костромань, Тамбовонь, Нижегородской ды лия областтнестэ. Весемезэ 29 коллективть.

Мордовиянть пельде эсест номинациява изнямонь таркат сайсть Рузаевкань райононь «Ару лихтибря» народной фольклорной ансамблясь (1-це тарка); Отяжбуень «Валскень зоря» раськень моронь ансамблясь (1-це тарка). Ськамост морыцятнень ютксто – Сергей Гаврюшов (1-це тарка); Татьяна Азоркина (2-це тарка).
Гран-прись максозель Тамбовской областень Покрово-Пригородное велень «Весёлый сувенир» раськень моронь ансамблянтень, РФ-нь народной творчествань заслуженной коллективентень.

Татьяна Маторкина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».