Артём Здунов пшкадсь Мордовия Республикань Государственной Собраниянтень Кучома марто
Ноябрянь 13-це чистэ Республикань Культурань кудосонть ютавтовсь МР-нь Государственной Собраниянь сессиясь, косо Мордовиянь Прявтось Артем Здунов пшкадсь эрьва иень Кучоманзо марто депутаттнэнень ды республикань весе эрицятненень. Сон пачтясь Отечествань ванстыцянь иень итогтнеде, тешкстынзе маласо иетнес региононь виевгавтомань прявт енкстнэнь. Башка мель явсь СВО-нь участниктненень ды сынст семиятненень лездамонь, демографиянь кевкстематненень, шумбрачинтень, од ломанень политикантень, культурантень, раськень-койтнень кирдатнень ванстомантень. Мельспарозонок, МР-нь Прявтось Кучоманть ушодызе эрзянь кельсэ ды мейлеяк аволь весть ютакшнось тиринь келентень башка енкстнэнь толковамсто.
Ине Изнямонь поладыцят
«Те иесь минек масторонь эрьва семиянть ды эрьва ломаненть туртов иневанькс. Минь кирдтянок мельсэнек, Мордовиясь кучинзе ятонть каршо тюремантень 240 тежадо седе ламо церанзо ды тейтерензэ. Оймевиень невтемакс кармась «Сурань рубежень» строицятнень покш тевест. Ине Изнямонь 80 иетнень топодемась – те минек раськень сюпавчи, каштанчи, весе раськетнень вейсэндявомань тешкс. Те Изнямось макссь тенек эрямо! Ды минек долгось – ванстомс историянь ледстнематнень сень коряс, кодамо питнесэ сон сатотсь, – мерсь Артем Здунов.
МР-нь Прявтось башка тешкстызе, минь эрятано историянь лия енов а молиця шкастонть – геройтнень шкасто, вейсэндявомань, патриотизмань лувсо касомань ды весе обществанть мелень явомань шкасто. Кода мерсь Артем Алексеевич, минь весе важодтяно Изнямонть кис. Прявт тевекс евтызе СВО-нь участниктненень ды сынст семиятненень лезксэнь максоманть.
«Миненек эряви теемс истят условият, штобу эрьва боецэсь содаволь: сонзэ семиязо ванновт ало, тиринь енксось жо учи велявтоманзо ды анок тензэ максомс вадря эрямо. Башка мель – СВО-нь участниктненень ды сынст малавикстнэнень пандоматнень кевкстематненень. Федеральной лезкстэнть башка, республикань 20 ламо социальной лезксэнь тевть явовить военнослужащейтненень ды сынст семиятненень. Эряви поладомс СВО-нь участникень чинть ютавтомань вадря практиканть», – мерсь Мордовиянь Прявтось.
Артем Здунов прявт тевекс евтызе военнослужащейтненень ламо уровенень реабилитациянь максоманть. СВО-нь эрьва участникенть туртов кармавтсь анокстамс карьеранть кастомга башка аравтлув, конанть вельде арсеви важодемань таркатнень муемась, эсь тевень панжомась. Прявт тарка теньсэ саи «Герои среди СВОих» региононь программась.
Маштовозтнень валдо лемест ледстизь чатьмонемань минутасо.
Эрицятнень ламолгавтомась
Российской Федерациянь Президентэсь Владимир Владимирович Путин кемекстась прявт аравтлув семиянь ды демографиянь политиканть коряс.
Кодамо лезкс максови минек регионсонть ламо эйкакшонь трицятненень, мезе тееви семиятнень ламолгавтомга, пачтясь МР-нь Прявтось: «Семья» национальной проектэнть лувсо тедеде районтнэсэ теевить тейтерьавань 5 од консультацият. Поладови чачтоматненень лездамонь службанть одкстомтомась. Сы иестэ неень шкань технологичной оборудования эряви одс ладямс Перинатальной центрантень. Явтано неть тевтнес миллиард целковойтнень малав нилеце пельксэнть. Кавто иень ютазь одкстомтсынек Республикань Эйкакшонь больницянть», – мерсь Мордовиянь Прявтось.
Те иень ноябрянь 1-це чистэнть саезь республикасонть совавтозь од тев – бюджетэнь енкссо важодицятнень семиятненень, конат сюлмить вандынь чинть Мордовиянть марто, кармить явомо эрямо таркат (сиведемань договортнэнь коряс ды рамамонь праванть марто). Прявт вешемась – эйкакшонь чачомась. Бути сиведемань договоронть кемекстамодо мейле 10 иетнень перть семиясонть чачить колмо эйкакшт, квартиранть мереви рамамс рынкань питненть эйстэ ансяк вейке кеменце процентэнть коряс.
Лездамонь эште вейке енксось – ламо эйкакшонь семиятнестэ весе эйкакштнень школатнесэ питневтеме андомась.
Саранск ошось ушодсь Семиянь таксинь важодеманть ладямонть. Иенть прядовомс китнень лангс лиси васенце партиясь – 30 седе ламо машинат.
Республикасонть примазь зярыя законт – те од аватненень, бути сынь чачтыть 25 иетнень топодемс, студентэнь ды од семиятненень колмоце эйкакшонь чачтомсто, региононь авань капиталонть эрьва иень индексациядо ды сонзэ тевс нолдамонь енкстнэнь келейгавтомадо решениясь, ламо эйкакшонь семиятнень туртов эрямонь помещениятнень ды транспортонь налогонь пандомс льготат.
МР-нь Прявтось евтнесь Семиянь советэнть парсте важодемадонзо. Сон теезель те иестэнть. Эйзэнзэ совасть семиянь 50 парат. Советэнть пельде евтазель арсема: республикасонть ламо эйкакшонь тетятнень-аватнень туртов государственной од казнень кемекстамодо.
Мордовиясо яволявтозь Шумбрачинь ие
Артем Здунов тешкстызе: ломантнень ванстомань прявт енксось – шумбрачись. Эряви кемекстамс орматнень каршо, конат аштить куломань прявт тувталокс (те онкологиясь, седеень-санонь системань орматне, лексемань органтнэнь патологиясь), бороцямонь комплексной системанть. Федеральной лезксэнть вельде, а те 4 млрд седе ламо целковойть, моли покш важодема Республикань Онкодиспансерэнь стационарной корпусонть стявтоманзо коряс.
«Покш мель явови сыре ломанень орматнень а нолдамонтень ды куроксто редямонтень. Национальной проектэнть лувсо поладови диспансеризациясь ды профванкшноматне. Ютазь иестэ саезь тевс нолдазь врачтнень-специалисттнэнь вахтасо важодемань лувось. Те лезды шкастонзо кучомс покш стационартнэстэ вадря персоналонть райононь больницятнес ды седе малавгавтомс лезксэнть тов, косо сон пек эрявикс. Минек пек талновты велесэ эрицятнень куломась. Тевесь – кувалгавтомс «сиянь» иень ломантнень эрямост», – тешкстызе Мордовиянь Прявтось.
Сы иестэ панжови Шумбрачисэ кувака эрямонь центра. Те федеральной проект. Центрань теемась аравтозь эрицятнень медицинань содамочист кастомантень, штобу ломантне покш мель явовольть эсь шумбрачинтень, содавлизь ормань невтевкстнэнь ды шкастонзо теевельть эрявиксэнть сынст анолдамонть ды лецямонть коряс.
Эсь прянтень мелень явомась кеместэ сюлмавозь эрямонь шумбра лувонть ды спортонть марто.
«Неть тевтнес эряви тонавтомс овсе вишка шкасто саезь. Сы иестэ ютавтано 15 аволь седе аламо покш мероприятият эрьва кодамо иень ды социальной группань эрицятнень туртов ГТО-нь комплексэнь максоманть коряс. Пшкадян минек предприятиятненень: важодемань чинть перть ютавтомс производствань гимнастиканть. Ули советской вадря опыт, ды сонзэ эряви эрязасто нолдамс тевс», – мерсь Артем Здунов.
Федеральной проектэнь топавтоманть лувсо Саранскойсэ сы иестэ тееви фиджитал-куншкакуро. Те площадка, косо спортсментнэ васня пелькстыть виртуальной средасонть, невтемакс, футболонь, баскетболонь симулятортнэсэ, мейле невтить ерокчист спортонь аренасонть. Сонзэ строямс явовить 120 млн ламо целковойть.
Сы иесь минек республиканть туртов карми сюпав спортонь пелькстамосо, Мордовиясь прими 50 ламо покш мероприятият. Сынь кармить раськеютконь ды весероссиянь уровенень.
Экономикась ды промышленностесь
Мордовиясь касты экономикань потенциалонть. Теде пачтямсто МР-нь Прявтось тешкстась:
«Ютазь вете иетнень перть региононь валовой продуктась кассь малав 13% ды васенцеде кармась пель триллионт целковойде седе ламо. Промышленной производствань индексэсь те шканть перть кассь 1,4-ксть. 60% кассь розничной микшнемань оборотось.
Региононь валовой продуктантень вишка ды средней бизнесэнь путовксось кармась 25%. Те секторонть марто сюлмавозь республикань экономикасо эрьва колмоце важодицясь. Колмо иетнень перть инвестициятнень покшолмась кармась 220 млрд целковойть, сынст эйстэ 80% – аволь бюджетэнь. Тедеде Мордовиясь совась масторонь васенце кемень регионтнэнь юткс инвестклиматонь вадрячинь Национальной рейтингсэнть, конань аноксты Стратегической инициативатнень агентствась, истя жо республикась Региононь инвестиционной стандартонь топавтомань коряс лидертнэнь ютксо.
Икеле Кучомасонть мон пшкадекшнинь весе прявттнэнень, кемекстыкшнынь аравтлув республикасо зарплататнень кастоманть коряс. Тешкстаса, те иень 8 ковтнень перть Россиянь келес касомась кармась 114% седе ламо, Мордовиясо – 118% седе ламо, – мерсь республикань Прявтось.
Велень хозяйствась
МР-нь Прявтось паро мельсэ пачтясь пурнавозтненень велень хозяйствань невтевкстнэде.
Тедеде Мордовиянь аграрийтне таго малавгадсть сюронь пурнамонь коряс рекордонь тешксэнтень – пивсэзь малав 2 млн тоннат сюро. Эрьва гектарсто саезь 40 центнердэ ламо. Урожайностень невтевксэсь кармась ПФО-со сехте вадрякс. Меельце вете иетнень перть ярсамопелень ды перерабатывающей предприятиятнень продукциянь производствань покшолматне кассть малав кавксть. Те иень невтевкстнэнь коряс республикасо велень хозяйствань валовой продукциянь покшолмась карми триллиононь колмоце пельксэсь.
Мордовиянь Прявтось тешкстызе: кода икелеяк, прявт тевтнень ютксо – велень хозяйствань отраслянть туртов кадратнень анокстамось. Тедеде тевс нолдавсь «Кадры в АПК» федеральной проектэсь, конань лувсо сентябрянь 1-це чистэнть саезь республикань школатнесэ панжовсть 17 агротехкласст. Тевесь – кавто иень перть эйстэст улест 60.
Региононь Прявтось пачтясь, тешкстазь Указ Мордовиясо чачозенть Виталий Платоновонь МР-нь велень хозяйствань ды продовольствиянь министракс аравтомадо, сон важодсь Россиянь Минсельхозсо ды ней велявтсь тиринь республикав.
ЖКХ-сь
МР-нь Прявтось Кучомасонзо покш мель явсь жилищно-коммунальной комплексэнтень, территориятнень вадрялгавтомантень. Башка таркасо – веденть вадрячинзэ кастомась. Артем Здуновонь валонзо коряс, маласо шкастонть полавтовить водопроводной сетень 285 вайгельбеть.
«Прявт кевкстематнестэ вейкесь – симема ведень вадрячись. Ризксэс, сеттнень одкстомтомань коряс тевтне икеле овсе эзть топавтово. Колмо иетнень перть арсеви витнемс Саранскоень ведень пачтямонь системанть. Миненек удалась получамс Россиянь Правительстванть пельде покш лезкс, федеральной Минстроенть марто вейсэ анокстамс колмо иень аравтлув ды ушодомс сонзэ топавтоманть уш тедеде», – тешкстызе Мордовиянь Прявтось.
Кода мерсь Артем Алексеевич, 2028 иентень ведень пачтямонь ды ведень отведениянь сеттнень одкстомтомантень явовить малав 2,5 млрд целковойть. «Модернизация коммунальной инфраструктуры» федеральной программанть коряс республикантень уш максозь финансирования 1,3 млрд целковоень покшолмасо. Ушодовсь кельме ведень пачтямонь трубопроводтнэнь полавтомась. 2027 иенть самс полавтовить малав 40 вайгельбеть магистральной трубопроводт.
Культурась ды од ломанень политикась
2026 иестэ Мордовиянь культурань повесткасонть – зярыя покш тевть. Вейкесь эйстэст – Степан Дмитриевич Эрьзянь чачома чистэнзэ саезь 150 иетнень топодемась. Юбилеень программасонть 80 седе ламо покш мероприятият. Сынст ютксо – лия енов а молиця выставкань проектэсь, конась васенцеде вейсэндясы Рузонь музеень, Третьяковской галереянь ды Эрьзянь музеень пурнавкстнэстэ важодевкстнэнь. Театрань искусствасо покш тевекс карми «Эрьзя» балетэнть премьерась.
Эште вейке прявт тевесь минек учи сы иестэ – те Иневанькс праведной воинэнть Федор Ушаковонь – Мордовиянь ды Россиянь Военно-морской флотонь менелень ванстыцянть – канонизациянь 25 иетне. Покшчитне, конат сюлмавозь юбилеенть марто, ютыть весе республиканть келес.
Меельцекс МР-нь Прявтось эште весть ледстясь, весе евтазь тевтне топавтовить экономиканть виевгавтозь, налогонь базанть покшолгавтозь. Те, васняяк, корты виевстэ важодеманть поладомадо.
Валентина Юдина