Пятница, марта 29, 2024
Важное

С. Д. Эрьзянь чачома чистэ 145 иетнень топодемантень

Содавикс ломантнеде минь седе пек карматано ледстнеме, зярдо тешкстави сынст се-тона юбилеест. Истя лисни минек раськень ине скульпторонть С. Д. Эрьзянь мартояк. Тедеде сонзэ лементь перька кортамотне седе виензасть. Ды те чарькодеви мекс. Скульпторонть чачома чистэ саезь (те – ноябрянь 8-це чись) топодить 145 иеть. Музейтнесэ, библиотекатнесэ, школатнесэ ды лия таркатнесэ сонзэ лемс ней ютавтовить эрьва кодат вастовомат, чокшнеть, урокт ды истя седе тов. Моньгак мелем таго сыремсь панжомс книгатнень, ташто газетатнень, ловномс сёрмадовкстнэнь, конат алтазь минек раськень ине цёрантень. Ды кемтядо-а кемтядо, теке понгинь се шкантень, зярдо эрясь С. Д. Эрьзя, ульнинь се кудосонть, косо сон чачсь-кассь, ютынь сеть янтнэва, кува якасть сонзэ пильгетне, седейган ютавтынь сеть ёжомарямотнень, конатнень савсь печтямс эстензэ скульпторонтень. Кой-кона сёрмадовкстнэнь таргсинь башка конёв лангс ды ней арсян ледстямс тыненкак.

Эрзянь вейке

велесэ чачсь цёрыне

 

Эрзянь вейке велесэ, Баеньбуесэ, ютазь пингень (вейке тёжа кавксосядт сизьгемень котоце иестэ) Нефёдовтнень кудосо чачсь таго вейке цёрыне. Лемдизь Стёпакс. Те ульнесь Степан Дмитриевич Нефёдов (Эрьзя). Каня, арсесь-арась авазо сестэ: шкань ютазь цёрадонзо кармить содамо масторлангонть келес? Нама, превезэнзэяк эзть сакшно истят мельть-арсемат. Косто велень авантень содамс теде? Сонензэ а зярдоль арсемс тень лангсо. Кода весе велень аватне сон пингензэ перть «лакась» тевсэ. Васенце мелявксозо ульнесь аволь се, касы-а касы цёразо «покш» ломанекс. Сон васняяк мелявтсь, кода бу шумбрасто кастомс эйкакштнень. Кода тосо мейле карми, Пазось содасы.

Степан Нефёдов уцясканзо, кода мерить, «чапизе» эсензэ кедьсэ, эсензэ вийсэ ды эсензэ превсэ. Те ней сонзэ ловтано эрзянь раськень ине цёракс. Теде икеле жо сонензэ савсь аволь вейке пондо ливезь валомс, ризксэнь-нужань пачк ютамс, оймень сэредькст цидярдомс. Эрямозо, тынсь содасынк (ней теде ламот сёрмалить), малавгак аволь тантеель ды аволь валаняль. Аволь пародо-мезде савсь тензэ тукшномс омбо масторовгак, косо эрясь аволь вейке кемень иеть. Эсензэ масторов велявтсь 1950 иестэ.

 

Вирьтяка

 

Содатадо-арась, Эрьзянень васня мернесть аволь Степан, пшкалесть тензэ истямо лемсэ, кона эрзянь кельсэ чарькодеви кода «вирень тяка». Зярдо сон чачсь, таргонь перть (сисем чить) ульнесь лемтеме – учость тетянзо, кона, кода эрзянь велень ламо лия цёратне, якась васоло таркав важодеме. Седикелень койтнень коряс ансяк чачозь эйденть а кодаль кувать кадомс лемтеме, пельсть, апаро виесь сельмедьсы эйкакшонть. Седе сыре ломантне кортавтызь аванзо молемс тумонь кужов, ков яксильть сюконямо, ды тосо кезэрень койтнень коряс ансяк чачозь цёрынентень макссть лем – Вирьтяка (вирень тяка). Зярдо тетязо велявтсь кудов, кецнезь саизе кедьс цёрынензэ ды, верев-алов утякснезь, серьгедсь:

– Ванодояк, а пелиця ломанекс касы, эзь тандадо ды эзь рангстаяк.

Авазо саизе мирдензэ кедьстэ эйденть, лепштизе мештезэнзэ ды покордавозь мерсь:

– Вирьтяка зярс вишкине, а тон налксят мартонзо, теке овтолевкс марто.

– Мезень те лем – Вирьтяка? Мон лия лем тензэ максан – Степан.

Ноябрянь талай чокшне, кардаз удалга, тетязо сыргась велень попонтень, лавтовонзо лангсо кандсь реве. Попось васня аламодо мурнизе, пекстызе ревенть эсензэ кардос ды мерсь:

– Ванды тонь цёрынесь карми Степанокс.

Истя Вирьтякась кармась Степанокс…

 

Лездась баягинесь

 

Зярдо чачсь Степан Эрьзя, кудосо весе кемсть, цёрынесь касы шумбракс ды уцяскавокс. Васня истя ульнеськак. Стёпа ульнесь шумбрыне, кепсесь-аволясь кеднесэнзэ, пстиесь-кучкорясь пильгесэзэ, вансь весень лангс валдо сельмесэнзэ, апак лотксе потясь розень кшинь порьксэнть. Мизолдсь, зярдо вишка вальминес варштнесь чипаесь. Тесэ апак учо редизь: цёрынесь эзь максне вайгелензэ. Тусть кортамот, келят-мелят. Ормас содыцятне тандавтнесть, келя, эйкакшонть кисэ кавто Пазт пелькстыть: эрзянсесь ды церьковансесь – Христос. Секс цёрынесь карми чатьмонеме се шкас, зярс вейкесь эйстэст а изнясы омбоценть. Сестэ Стёпань тетясь арсесь-тейсь ды ускизе цёрыненть ормас содыентень Торай покштянтень Алатырев. Варштась атясь цёрыненть лангс ды таргась варьга потсто баягине, кармась чольдердеме эйсэнзэ цёрыненть икеле. Вишка Стёпа сеске педявтызе вановтонзо баягиненть лангс ды цопадизе сонзэ кавто кедьсэ. Сестэ Торай покштясь мерсь истят валт:

– Кадык те баягинесь лезды тынк Стёпанень…

Казезь баягиненть понгавтызь лавсенть вельксэс сенень кемезь, цёрынесь пички. Седе покш цёрынест Иван ды сехте пек Ефимия тейтерькаст секе-тев нурсесть лавсенть эйсэ: сынст мельс пек тукшнось баягинень чольдердемась. Весть кудост пешкедсь велень эйкакшто, мартост совавтсть киска. Стёпа уш кармакшнось якамо, теке марто удсесь лавсьсэ. Тетяст-аваст вирьсэльть, покш цёраст Иван кадозель ваныцякс. Сонзэ превс сась мель менстямс баягиненть лавсенть эйстэ ды понгавтомс кисканть кирьгас. Сон сайсь пеель ды кармась керямо баягинень ведьменть. Окойники, баягинесь, чольнезь, вачкодевсь лавсень чирентень ды лажазь-кувсезь кармась кевереме кияксканть. Лавсесь чиремсь, ды, баягиненть мельга, эйстэнзэ менсь ды кияксос прась Стёпа. Эйкакштне тандадомадонть васня таймазкадсть, мейле, зярдо кудонть келес каятотсь, кода цёрынесь авардеманзо пачк, таго-мезень лапаксазь, моткоди, весе, кить ульнесть кудосо, теке старязь озязт, напустясть ушов, сеерезь:

– Кельтемесь вайгель нолдась!

Истя топавтовсть Торай покштянть валонзо. Баягинесь лездась цёрынентень нолдамс вайгелензэ…

 

Кода сёрмадсь

эсензэ эрямодо сонсь

С. Эрьзя

 

Скульптордонть нолдазь пек ламо книгат. Эйсэст седе ламо сёрмадовкстнэнь тешкстызь ломанть, кить содылизь сонзэ, вастневсть мартонзо. Сонсь скульпторось эсь прядонзо сёрмадсь пек аламо, сеяк, зярдо вешсть пельдензэ автобиографиянзо. Вейкесь сёрмадозель 1951 иестэ. Сон ванстовсь архивсэ ды совавтозь вейке книгас, конань лемезэ «Степан Дмитриевич Эрьзя». Пусмось нолдазь Мордовиянь книгань издательствасо 2001 иестэ. Эйзэнзэ пурназь Степан Эрьзядо ламо ледстнемат, сёрмат, эрьва кодат документт, конатне ванстовсть ютазь пингестэ саезь. Пурныцяст В. С. Дворецкая. Те книгась лиятнеде явови сень эйсэ: эйсэнзэ эрямось невтезь истямокс, кодамокс ульнесь се шкастонть, зярдо эрясь Степан Эрьзя. Ды весе, мезе ульнесь Степан Эрьзянь марто эрямонзо перть, невтеви книгас пурназь сёрматнень, ледстнематнень, икелень сёрмадовкстнэнь вельде.

Юткстост «Автобиография» лем ало сёрмадовксоськак, конань тешкстызе сонсь скульпторось. Эйсэнзэ Степан Эрьзя панжизе весе эрямонзо вишка пингестэ саезь 1950 иенть самс, зярдо сон ламо таркава якамодо мейле одов велявтсь Россияв. Макстано зярыя саевкст эйстэнзэ:

«Чачинь 1876 иень октябрянь 27-це чистэ (неень ноябрянь 8-це чи – Авт.) Ардатовань уездэнь ды волостень Баева велесэ… Тетям ульнесь бурлакокс Рав лангсо, тукшнось рана тунда, кудов велявтнесь ноябрясто. Тельня чокшне ланга ёвтнесь тень Царицын оштонть ды Волга лангсо лия оштнеде, косо сон некшнесь кшнистэ ды кевстэ теезь ломанть…»

«1891-1892 иетнестэ пек стакаль шкась, ульнесь вачочи. Минь лелянь марто якинек веледе велес, путнинек ды витнинек тапазь вальмат…»

«1893 иестэ тетям макссь тень 3 целковойть ды озавтымим поездс, ильтимим Казанев…» (49 л.).

«…1893 иестэ саезь 1897 иенть самс минь артынек-сёрмадынек кемнилее церьковат Казанской губерниясо...» (50 л.).

Кода нетяно неть сёрмадовкстнэстэ, Степан Нефёдовнень сатотсь аволь шожда эйкакшпинге. Ды мейлеяк уцяскась пансесь эйсэнзэ эрьва ков. Эрясь ды тонавтнесь Казаньсэ, Московсо. «1906 иестэ савсь оргодемс омбо масторов, мейле Миланов, Милансто Лаго Маджорев» (50 л.).

Мейле туить Венеция, Ницца, Париж, Флоренция, Рим. 1914 иестэ велявтсь Россияв. Понгсь аволь Московов, савсь эрямс Петербургсо, косо «…Сутеев докторось мусь тензэ важодема тарка пеень лецямо лазаретсэ кода муляжист ды рентгенограф. Кавто пель марто иеть эзинь лисне лабораториясто, ды ульнесть чить, зярдо тейнинь сядот снимкат…» (51 л.).

Мейле зярыя иеть эрясь Екатеринбург, Новороссийск, Баку оштнесэ. Сась Московов. Тосо тев эзь муеве. Таго тусь Парижев. «…1927 иестэ туинь Парижстэ Южной Америкав, Уругваев, Уругвайстэ сынь Аргентинав, Буэнос-Айресэв, косо важодинь меельце 24 иетнень перть…» (52 л.).

Весе неть сёрмадовкстнэнь ловномсто эрьва ловныцянть икелев Степан Эрьзя сти васняяк кода ёроков, стакачиде а пелиця ды виев обуця марто ломань.

 

Омбоце лемекс

саизе эсензэ раськень лементь – Эрьзя

 

Мекс Степан Дмитриевич Нефёдов эстензэ омбоце лемекс саизе Эрьзя лементь, тень аволь весе толковить вейкетьстэ. Вана кода сёрмады «С. Эрьзя» эсензэ очерксэ Б. Полевой.

«– Мекс тынь кочкинк те лементь? – кевкстия сонзэ весть чокшне ланга, зярдо сон оймсесь, аштесь озадо чувто мукорь лангсо, апак прядо важодевксэнзэ вакссо…

Сон мизолдозевсь ды ёвтнизе, кода живописень, ваяниянь ды зодчествань Московской училищасо тонавтнемстэ, снартнесь седе парсте содамс, мейстэ ашти ломаненть рунгозо, секс сёрмадызе прянзо Московской университетэнь медицинской факультетэв лекциянь кунсолыцякс. Тосо студенттнэнь ютксо вастынзе Алатырень вейке сюпавонть цёранзо. Те сюпавонтень зярдо-бути вишкинестэ якась аванзо марто эсест скалост вешеме, кона кундазель те помещикенть луга лангсо тикшень порнемстэ (ломань луга лангсо кундазь скалонть кис вешнесть натой ярмакт – Авт.). Сюпавонь цёратне кенерсть прядомо вейке курса. Сынь арсесть кармавтомс мезеньгак тееме эсест «шабраст» кедьстэ, кона пелезь ладсо якась анатомиянь театрасо уловтнень марто важодиця студенттнэнь юткова.

– Эй, эрьзя, кандыка кельмепаргостонть оно се пильгенть, – кортыльть тензэ.

Эли:

– Каня, мезе чарькоди те тутылкась медицинасо? Эрьзясь кадовияк эрьзякс».

Неть валтнэ седей юрс токизь од ломаненть. Се шкастонть саезь скульпторось сайсь мель, бути уцяскась кучи тензэ куш паморьксэшка паро кулянь кандома (слава – руз.), сон макссы эсензэ вишкине, инязоронь Россиясо лепштязь, нарьгазь раськентень.

Секс сон кармась эсензэ скульптуратнень алов сёрмалеме – «С.Эрьзя». (1959 ие).

Тень пес поладтано: скульпторось Эрьзя лементь саизе аволь ансяк вечкемань ёжонзо невтемга се раськентень, кона макссь тензэ эрямо. Тень теизе сень кемевтемга: сонзэ ёрокчись, кона макссь тензэ вийть теемс истят питнейдеяк питней важодевкст, сась эсензэ раськенть пельде, те ёрокчинть кастомасо лездасть ламо пингень перть таштазь койтне-кирдатне.

 

Чачома масторов кись кувакаль

Кода велявтсь скульпторось кудов, мезень пачк савсь тензэ те шкастонть ютамс, тедеяк улить сёрмадовкст. Вана кода пачтясь исторической наукань докторось В. К. Абрамов, зярдо ёвтнесь К.Г. Абрамов тетянзо С. Д. Эрьзянень алтазь книгадонзо.

«Россияв Эрьзя велявтсь 1950 иень сёксня. Сонензэ сестэ ульнесть сизьгемень ниле иеть. Эсензэ марто ускизе малав весе сень, мезе кенерсь тееме Аргентинасо. МАССР-нь Художникень союзонь се шкань прявтонть В.Хрымовонь вельде сон пшкадсь Мордовиянь прявттнэнень энялдома марто максомс тензэ квартира ды истямо тарка, улевель косо ванстомс ды невтнемс скульптуратнень. Ансяк МАССР-нь се шкань прявттнэ эзизь маря пшкадеманзо. Сестэ истямо жо энялдома марто пшкадсь Чувашской АССР-нь Алатырень прявттнэнень. Тосояк вастызь истя жо. Окойники, сонензэ макссть эрямо тарка ды мастерской алов кудо Московсо. Ансяк Сталинэнь куломадо мейле ды Эрьзянь шкинемань вечкицятнень лездамост пингстэ 1954 иень июньстэ панжозель чачома масторов велявтомадо мейле васенце выставкась. Московсто истямо паро кулянть марязь, сонзэ анокольть нолдамс Мордовиянь чиновниктнеяк. Ансяк Эрьзя эзь карма мартост кортамояк. 1957 иестэ сон пшкадсь Ленинградсо Рузонь музеев ды энялдсь саемс ванстомо важодевксэнзэ. Тосо те шкас ванстовить сонзэ сехте паро произведениянзо».

Весемезэ жо скульпторонть важодевкстнэде лововить 500 ламо ды весе сынь срадозь модамасторонть келес.

Кода Эрьзянь эзизь нолда эрямо чачома таркав

 

И. К. Инжеватов янксесь тень кувалма куломазонзо

В. К. Абрамовонь валонзо кемевтемакс ловса литературоведэнть, топонимистэнть В. К. Инжеватовонь видькстамонзояк, конань сон ёвтызе монень «Эрзянь правда» газетасо важодемстэнь.

Те ульнесь ютазь пингень вейксэньгеменце иетнестэ. Сестэ мон культурань отделсэлинь. Се шкасто газетасо важодицятнень эйстэ эрьванть ульнесть эсензэ ловныцянзо, кинь марто кирдсь кеме сюлмот. Моньгак сынь ульнесть. Вейкесь эйстэст – И. К. Инжеватов. Иван Корнилович сеедьстэ сакшнось редакцияв, совсиль моненьгак. Ламо мезе ёвтнесь эсензэ эрямодонть, седе, кода вастовсть эрий ялганзо Серафима Марковна Люлякина марто, кода сынь вейсэндизь эрямост. Весть сон таго совась. Озась икелень ды кувать, чатьмонезь, арсесь, мейстэ ушодомс кортамонзо. Мон учинь, арсинь, сон таго карми ледстнеме Люлякинадо. Иван Корнилович кувакасто лекстясь ды мерсь:

А содан, кода ушодомс. Умок уш кирдян седейсэнь вейке… салавань тев. Умок бажан видькстамс теде ды яла виень а сатыть.

Зярсыя кавтолдсь ды, окойники, панжизе седеензэ, кода Мордовиянь се шкань прявттнэ эзть мере Степан Эрьзянень самс эрямо чачома моданзо лангс.

Лиссь те тевесь, ёвтнесь сон, ведьгемень котоце иестэ. Се шкань обкомонь васенце секретаренть Василий Иванович Закурдаевень лемс (В. И. Закурдаев 1951 иень сентябрясто саезь 1958 иень январенть самс – КПСС-нь ВКП(б)-нь Мордовской областной Комитетэнь 1-це секретарь: саезь Википедиясто) сась сёрма С. Д. Эрьзянь пельде. Эйсэнзэ скульпторось энялдсь: «Саимизь монь кудов, Саранскоев, максодо тень эрямо тарка (кадык вишкине), косо карман роботамо, косо анокстан эсень тевень поладыцят».

– Паряк, аламодо лиякс сон сёрмадсь, но смустесь текель, – седе тов ёвтнесь Иван Корнилович.- Сёрманть ванкшномс максызь колмоненек туртов: идеологиянь коряс партиянь обкомонь се шкань секретарентень Г.Я. Меркушкиннэнь, пропагандань отделэнь прявтонтень Н.И. Лобановнень ды монень, школань ды наукань отделэнь прявтонтень (И.К. Инжеватов – 1954 иестэ саезь – КПСС-нь Мордовской обкомонь школань отделэнь прявт). Ловнынек сонзэ, карминек арсеме: топавтомс-а топавтомс Эрьзянь мелензэ.

Арсемскак ульнесь а мезекс. Закурдаев кармавтсь истя: «А нолдамс Саранскоенть маласкак». Кода тесэ коласак республикасо се шкань сехте покш прявтонть мелензэ? Ды колмонест путызь кедест «приговоронть» алов: а нолдамс. Тувталось, мезенть кувалма Эрьзянь явизь чачома таркастонзо, вейкель: сетнень, кить эсь шкасто тукшность омбо масторов, ловсть «эсь масторонь миицякс, народонь ятокс». Текень кувалма, кода ледстнить содыця ломанть, ведьгеменце-кодгеменце иетнестэ Эрьзядо, киде содасть уш весе масторлангонть келес, эсензэ тиринь масторсо жо эрзятне марсесть ансяк чульть-чальть (школасояк сондензэ а пек содасть). Сеяк лемензэ ледстнесть салава, пелезь ладсо. Сестэ, келя, шкась истямоль. Кинь лангс каильть чопода сулей, сетнень эйстэ ульть седе васоло. Кармат кисэст пшкадеме, тонськак понгат секе килькшентень. Секс ломантне тоналесть эрямо пелезь, вере аштицятнень кургс ванозь, сынст эрьва валост-кармавтомаст кунсолозь. Те «кочкарянть» алов понгонесь Иван Корнилович Инжеватовгак, кона мейле куломазонзо янксесь, мекс се шкастонть эзизе венстя кедензэ Эрьзянень.

 

Сонзэ скульптуратне свал кармить эждеме ломантнень седеест

 

Степан Эрьзянь ёрокчидензэ весемеде парсте кортыть скульптуранзо, конатнень эйстэ ламотне ванстовить Саранскоень куншка куросо аштиця музейсэ, кона кандтни сонзэ лементь. Кить тов якасть ды эсест сельмесэ неизь экспонаттнэнь, вейкеяк ломань эзь лисе тосто мелень апак вите. Музейсэнть кодамояк экспонатонть вакска а ютават малазонзо апак лотка. Сельмес сеске каятыть тейтерь-авань чачотне ды рунготне, конатнень ютксо улить эрзянь авань чачоткак. Апак тално ды апак дивсе а вановат «Моисей», «Ева», «Мать и дитя», «Леда и лебедь» ды ламо лия скульптуратнень лангс. Сынст эйстэ ламотне теезь чувтосто, конатнень лемест кебрачо ды альгарробо (квебрахо ды альгарробо – латиницэнь кельсэ). Неть чувтотне пек нардевть ды кеметь («кебрачо» валось кечуа индеецтнэнь кельстэ ютавтови, кода – «узереде калгодо»). Секс мастерэсь кочкинзеяк сынст эсензэ скульптуратнень теемс. Ды Аргентинасо эрямсто кенерсь тееме 300 ламо, конатнестэ малав 200-тнень ускинзе чачома масторов.

Степан Эрьзянь скульптуратнень ваномо капшить молеме весе, кинень сави улемс Саранскойсэ. Пек ламо ломанть якасть футболонь коряс масторлангонь чемпионатонь шкасто, кона ульнесь 2018 иестэ ды зярыя пелькстамот ютасть Саранскойсэ. Япониянь ды Колумбиянь командатнень ютксо пелькстамось ульнесь июнень 19-це чистэ. Сонзэ ваномо сакшнось Япониянь принцессась Хисако Такамадо ды васенце таркакс, ков саизе мелензэ молемс, кочкизе Степан Эрьзя лемсэ музеенть. Лисни, те масторсонтькак парсте содасызь минек раськестэ лисезь ине цёранть.

Степан Эрьзядо сёрмадозь ды лиссть пек ламо книгат. Учёнойтне нейгак вешнить од ёнкст сонзэ творчествасто. Весе сынь тешкстыть: сюпавчись, конань кадызе эсь мельганзо Степан Эрьзя, саи пек покш тарка Мордовия Республикань культуранть кемекстамосо. Кода теде мейле а аштемс мельспаросо ды каштанчисэ сонзэ кувалма? Весе, кить теевсть содавиксэкс скульпторонть шкинеманзо марто, эсест седейсэ свал кармить ванстомо Степан Эрьзянь ине лементь.

 

Раиса Щанкина

 

Павел Любаев

Эрьзя

 

Эрзянь мастор, Сура ёнксонь

вирь,

А мади, а энгами тынк славась!

Тесэ чачсь вирь тяка –

богатырь,

Сонзэ лавсьсэ нурсекшнесь

Вирьавась.

 

Эрямонзо перть тесэ лакась –

Невтемс мазычинть эрямонь

лувсто.

Аргентинавгак тень кис якась:

Чевте седейть панжсь калгодо

чувтсо.

 

Чувтсо невтсь историянь

геройть,

Конатнень лемест тештекс

сыреждить.

Микеланджело ды Лев Толстой,

Кинь тевест моданок течис

эждить.

 

Кевстэ маштсь панжомс авань

седей.

Тевензэ максыть валдос кемема.

Оймесэнь кенери паро мель –

Эрьва эрзянтень Эрьзякс улема.

 

 

Катаева Ирина

Эрьзя

 

«Ине Эрьзя! Ине скульптор»

Гайги, Мастор пешти.

Минек лемесь валдо тештекс

Кирвазсь моданть мештес.

Ливтясь верев – верев менельс

Ды манейстэ палы.

Максы эсь валдонть весенень,

Чоподачинть салы.

Аргентинань лембесь телекс

Марявкшнось сонензэ.

Тиринь ёнксось, эрзянь модась

Тердильть седеензэ.

Эрзянь цёрась –

Ине ломань!

Зяро лембе седей валт!

Арази сынь панжсызь ойметь,

Весе арсемат?

 

Ине Эрьзя! Мельспаронок,

Эрят оймесэнек ней,

Тон минек каштан коронок,

«Эйдеть» кецявтыть седей!

 

Семкина Олеся

Эрзянь цёра

 

Эрзянь цёра, превей аля,

Сюкпря теть мерян.

Теветь кисэ весень пельде

Пильгес сюконян.

Содан, стака тонеть ульнесь

Се берянь шкастонть.

Ютасть иеть, шкась

полавтовсь,

Теветь ней «валдомсть».

Несынек тонь важодевксэть

Мордовиясто,

Парот марятано эйстэть

Аргентинасто.

Превей цёра, паро аля,

Покш каштанчинек,

Лиссь сон минек раськенть эйстэ,

Кепси меленек.

Кадык ламо истят цёрат

Чачтыть аванок,

Мазылгавтыть Мордовиянть

Превей алянок.

Куш умок туить эйстэнек, –

Теке мартонок.

А стувтовить паро теветь,

Эрьзя – ялганок!

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».