Неть читнестэ Беларусь Республикань Витебск ошсо ютавтовсь «Славянский базар» искусствань раськеютконь XXXIII-це фестивалесь. Те иестэ сон алтавсь немецень-фашистэнь ятонть эйстэ Белоруссиянть олякстомтомань 80 иетненень, Витебскойсэ чачозенть, советской содавикс композиторонть Марк Фрадкинэнь чачома чистэ 110 иетненень ды «Сябры» эстрадной содавикс ансамблянь ведьгемень иень юбилеентень.

Фестивалень программась пек сюпаволь. Истя, июлень 12-це чистэ форумсонть васенцеде ульнесь ШОС-нь (сотрудничествань шанхайской организациянь) мастортнэнь Раськень культурань чись. Гала-концертсэнть Россиянть пельде эсь ёрокчист невтизь «Владимирские рожечники» ансамблясь ды минек республикасто «Мерема» фольклорной коллективесь.

Эряви меремс, Мордовиянь музыканттнэ ансяк прядызь гастролень покш марафононть Тверской, Ярославской ды Псковской областтнева, косо вейсэ лия регионтнэстэ коллективтнень марто Россиянь народной артистканть Надежда Бабкинань прявтсо макссть благотворительной 30 концертт. Гастрольтнень прядовомадо мейле сеске сыргасть «Славянской базаров».

Россиянь Культурань министерствась кучизе «Мереманть» Белоруссияв, штобу раськеютконь форумонь ваныцятне марявлизь ламо вайгельсэ раськень этнической морамонть, теевельть содавиксэкс эрзятнень ды мокшотнень шкинеманть марто ды седе ламо содавольть Россиянь раськетнень культурань сюпавчитнеде.
«Славянский базар» фестивалень инжекс истя жо ульнесть Мордовиянь филармониясто «Разгуляй» казаконь моронь ды киштемань государственной ансамблясь ды МР-нь заслуженной артисткась Евгения.