Вана уш зярыя иеть общественной транспортсо ардомсто лотксема таркатнень яволявтыть колмо кельсэ: рузонь, эрзянь ды мокшонь. Васенце шкастонть те весень дивавтсь, кие пейдсь, кие прясонзо чаравтсь, ней уш тонадовсь. Мон свал бажинь содамс, кинь вайгелезэ гайги эрзянь лотксема таркатнень евтамсто? Евтазь видестэ, чарькодевиксстэ, эрьва гайтесь путозь тарказонзо. Те – Анна Фадейкина, кона важоди Саранск ошонь округонь Культурань кудонь художественной творчествань отделэнь прявтокс.
Анна чачсь Ленинградсо. Тетязо, Петр Николаевич Демин, тонавтнесь тосонь А.А. Жданов лемсэ госуниверситетэнь журфаксо, Ставропольской крайстэ тов жо мольсь тонавтнеме Ирина. Одтнэ теевсть содавиксэкс, тусть вейкень-вейкень мельс ды сюлмизь эрямост вейс. Церась чачсь Покш Березникбуень Шугурвелесэ. Вузонь прядомадо мейле Деминтнэ састь эрямо Саранскоев. Вейкине тейтерест Аня тонавтнесь ошонь 12 № гимназиясо ды свал явсь покш мель художественной самодеятельностентень. Сонтемензэ эзь ютакшно школань вейкеяк покшчи. Истя жо тонавтнесь 1 № музыкальной школасо. Седе тов мольсь тонавтнеме Н.П. Огарев лемсэ МГУ-нь Аграрной институтов. Тейтересь сон оймамонь а содыця, кенерсь эрьва ков, тонавтнемеяк, улемс институтонь профкомонь председателекс, киштемс-морсемс «Студентэнь тундо» фестивальтнесэ. Студентэнь шкасто вастызе вечкевиксэнзэ, лиссь мирденень ды тусть эрямо мирдензэ чачома енксов – Дубенкав. Нама, ошонь тейтеренть тандавтсь районсо эрямось. Одтнэнень макссть ипотекас кудо, мирдезэ кармась роботамо агрономокс. Чачсь Танюшка тейтернест. Декретсэ улемстэ Анна прядызе вузонть. Кармась роботамо Дубенкань аграрной техникумсо тонавтыцякс. Ансяк лиссь покш зыян: армиясо службанть ютамо шкасто мирдезэ чавовсь. Мезе савсь цидярдомс од авантень, соды ансяк сонсь. Марявсь, весе эрямось прядовсь. Танюшанень ульнесть ансяк колмо иеть.
Эрямось мольсь седе тов
Весть, техникумонь профмастерствань конкурссо сон морась ды теевсь содавиксэкс райононь Культурань кудонь важодицятнень марто. Тонат сеске редизь Аннань ды тердизь важодеме эстест.
– Мон муия эсь таркам. Культурань кудосо весемесь тусь мелезэнь. Морсинь колмо ансамблясо ды ськамон, сермадылинь кенярксчинь сценарийть, ардтнинек морыцятнень марто лия регионов фестивалев, – ледстни Анна.
Кодамо-бути кенярксчис эрявсь невтемс эрзянь свадьбань кой. Сехте одтнэнь ютксто одирьвакс кочкизь Аннань, мирдекс – Дмитрий Фадейкинэнь. Косо ансяк эзизь невтекшне те свадьбанть. Натой ардтнесть Ульяновскоев, тосо ютась свадьбань койтнень регионъютконь покш фестиваль. Истя лиссь, теке мерят киносо, сцена лангсо невтезь свадьбадонть мейле сынь сюлмизь эрямост вейс, Анна лиссь мирденень омбоцеде ды Дмитриень туртовгак те – омбоце семиязо. Фадейкинтнэ сайсть мель самс эрямо Саранскоев.
Анна кармась роботамо Саранск ошонь округонь Культурань кудосо методистэкс. Сонзэ сеске ладизь кенярксчинь-концертэнь ветицякс. Сермадсь сценарийть, ульнесь аниматорокс, яксесь ростовой куклатнесэ. Тевтеме зярдояк эзь аштекшне. Дмитрий ушодсь морсеме васня «Мерема» ансамблясо, мейле – «Отрадасо», седе тов кармась ськамонзо морсеме.
– Кенярксчинь ветицянь тевсэнть свал ули покш ответственность. Ансяк весемесь сы опыт марто. Ламо мезесь ашти ветицянть эйстэ, кода тон лисят сцена лангс, кода ушодсак концертэнть. Покш концерттнэде икеле ламо превс путомат тенек максы ошонь Культурань управлениянь прявтось Т.Ю. Салищева, свал евты лембе валт, ды талномась еми, – корты Анна.
Кода пачтясь Анна Петровна, ошонь Культурань кудосонть явить башка мель раськень культурантень. Ули национальной отделэсткак. Концерттнэс свал анокстыть эрзянь ды мокшонь номерт. Теде башка, зярыя проектэст сюлмавозь раськень койтнень марто. Кавто иеть невтсть «Тевесь ульнесь Тавласо» евксонть, косо прявт героекс ульнесть Вирявась, Ведявась ды фольклоронь лия персонажтне. «Бажинек теемс шожда, чарькодевикс невтема, туевель эйкакштнень мельс», – корты Анна.
Паро тевекс кармась «Музыкальная история Мордовии» проектэсь. Сонзэ вельде сынь содавтсть школань тонавтницятнень моронь культуранть марто, фольклорсто саезь – неень шкань эстрадас. Кадык эйкакштне кармить содамо минек композитортнэде, саемга, В.Родионовдо, В.Чичайкиндэ, А.Панишевадо ды лиятнеде.
Ошонь Культурань кудонть эрямозо сюпав. Тесэ важодить весень туртов – вишкинетненень, покштненень, сыретненень. Ютавтовить морамонь, киштемань, театрань, авторонь моронь фестивальть. Концертэнь сезононь панжомсто ды пекстамсто эрьва ваныцянть мелезэ витеви: гайги классической музыкась, улить эрьва кодат виев номерт. Тесэ важодить морамонь ды киштемань ламо коллективть.
Тиринь келесь – автобуссо ды троллейбуссо
Зярдо ошонь Администрациянть пельде сась вешема сермадомс лотксема таркатнень лемест эрзянь ды мокшонь кельсэ – те марявсь а топавтовикс тевекс. Анна а корты эрзякс, ансяк чарькоди, кияк лия ломань эзь муеве. Ирина Новиковань марто (сон мокшокс ловнось) валскестэ саезь чокшнес ульнесть студиясо. Теезель покш важодема. Анна васня гайневтсь мирденстэнь, мейле тердизе ваксозонзо студияв. Кармавтызе кунсоломс ды евтамс, мезесь а истя, кодат ильведькст. Пшкалесь тетянстэньгак. Важодсть семиянек!
– Кой-кона валтнэнь пек стакаль евтамс. Сехте кувать сермадынек «Кемгавксовоце школась» лотксема тарканть. Сонзэ евтамсто тапавилинь валонть куншкас. Зярдо аудиозапистнень кармасть нолдтнеме общественной транспортсо, теде пачтясть ялгатне. Мейле монськак мария вайгелем ды талакадынь, теке аволь эсень вайгелем. Сехте пек кецнесть эйкакшон. Вечкить, зярдо ардомсто марясызь вайгелем. Рузонь кельсэ лотксема таркатнень истя жо мон яволявтан. Арсян, те пек паро мелесь, зярдо ардомсто марят тиринь келенть, эдь эрятано национальной республикасо, кельтнень а эрявить стувтнемс. Одтнэ мекс-бути виздить. Монь жо, зярдо кевкстнить, кодамо раськень, свал мерян – эрзянь, – тешксты Анна.
Вечкить ардтнеме васолга
Зярдо весе ломантнень оймсема чить, культурасо важодицятнень, мекевлангт, пси шка. Фадейкинтнэ аволь весть семиянек лиснесть сцена лангс морамо. Татьяна тейтерест тонавтни Н.П. Огарев лемсэ МГУ-нь Раськень культурань институтсо васенце курссо. Кочкизе хореографиянть. Киштеме кармась кото иестэ саезь, яксесь ошонь Культурань кудонть юрсо кружоктнес, киштсь хореографиянь группатнесэ. Сон, кода авазояк, прядызе 12 № гимназиянть. Тонавтнесь «нилес» ды «ветес». Эйкакш пингестэ саезь пек вечки ловномо, кодат ансяк книганзо арасть. Школасояк рузонь келесь ды литературась ульнесть вечкевикс предметэкс. ЕГЭ-нь максомсто кочкизе литературанть. Теде икеле анокстась онлайн-школасо. Зярдо састь экзаменэнь результаттнэ, васня кодаяк эзть кеме: 100 баллт! Кецнесть семиянек. Таня нейгак ловны, яви мель Япониянь ды Китаень литературантень. Илья церынест тонавтни омбоце классо. Сонензэ тукшны мельс спортось, якси каратэнь секцияв. Виев вайгелезэяк, ансяк зярс тунь а бажи улемс морсицякс, кода тетязо-авазо.
Семиясост паро коекс кармась кизэнь шкане ковгак ардтнемс. Пек вечкевсь тенст Санкт-Петербургось, тосо ульнесть аволь весть, ардтнесть лембе енксов иневедь чирев. Аннань валонзо коряс, эрьвантень эряви ковгак туемс, ковгак ардомс, пурнамс вийть ды паро мельть, те ежонть ванстомс седе кувать.
Татьяна Маторкина