Четверг, марта 28, 2024
Важное

А. С. Пушкин лемсэ библиотекасо ютась «Аватнень путовксост раськень культуранть сюпавчинзэ ванстомасо» кругловой столень важодемась. Сон алтавсь «Литова» эрзянь авань вейсэндявксонь 25 иетненень.
Ламо иетнень перть сонзэ вети Раиса Борисовна Щанкина. Те шканть перть теезь аволь аламо. Зяро ульнесть промкст, кенярксчить, вадря проектт – а лововитькак! Теде башка, нолдазь зярыя книгат.

«Литова» эрзянь авань вейсэндявксось ушодызе кинзэ 1997 иестэ. Сонзэ васенце бажамокс ульнесь ды кадови – кандомс тиринь валонть, невтемс эрзянь ды финнэнь-угрань лия раськень моротнень мазычист ды сюпавчист, а максомс куломо эрзянь ойментень. «Литованть» юрсо пурназь «Ламзурь» фольклорной ансамбля (сонзэ пурныцякс ульнесь Р. С. Кемайкина). Аватне сынсь вешнить кезэрень морот ды морсить сынст эрьва косо. Сынь а нузялдыть сыргамс васоло таркавгак. Зяроксть савкшнось ардтнемс мартост, республикань томбалевгак, эрзянь аватне а кадтадызь нусмакалеме. А лововияк, зяро морот содыть! Морыть ардомсто, кепедить весень ёжост, ёвтнить эрямонь тевтнеде. А кода вастыть эйсэст кунсолыцятне! Ков авольть моле, тосо мейле пек лембестэ ледстнить эйстэдест.

– «Литовань» аватне а кандтнить покш лемть. Но седейсэст палы вечкема эсь раськентень, сынст ули мелест лездамс тензэ цидярдомс, а ёмамс, кода ёмасть ламо лия раськетне. Ды тень теить аволь прянь шнамга, аволь сюпалгадомга, тень сынь теить седеест тердеманть коряс. Вейсэндявксонь аватне – вузонь ды школань тонавтыцят, эйдень кужонь воспитательть, морыцят, журналистт ды лия профессиянь ломанть. Мон сюконян эрьвантень. «Литова» вейсэндявксонтень сехте кеме нежекс аштить «Ламзурь» ансамблясо морыцятне. Эйзэнзэ пурнавсть истят ават, кинь седеест алкукс сэредить минек раськенть сы шкань уцясканзо кисэ. Комсьсисемгеде ламо иетнень перть, зярс эри те ансамблясь, пурнась ды од эрямо макссь аволь вейке кемень эрзянь кезэрень моротненень, конатне ней срадсть весе Россиянть келес.
Неть валтнэнь ёвтынь аволь мазынзэ кисэ. Те алкукс истя. Нейгак монень секе-тев гайневтнить, энялдыть кучомс се-тона моронь валтнэнь, моравксонть. Ней минек моротнень морсить кода велень клубтнесэ, истя покш сцена лангсояк. «Ламзурь» ансамблясо морыцятне васенцекс макссть сёлмот «Вирев молян» эрзянь моронтень, конась теевсь раськень гимнакс ды конась ней гайги натой сехте покш фестивальтнесэ. Мон аштян покш каштанчисэ «Ламзурень» аватнень кувалма ды а лоткан сюконямодо эйстэст эрьвантень сень кис, зяро шка ды вийть сынь макссть ды нейгак максыть седикелень койтнень одов вельмевтемга, кезэрень моротнень ванстомга! – кортась «Литовань» ветицясь Р. Б. Щанкина.
«Литовась» вельмевтинзе кезэрень кенярксчитнень ютавтомань койтнень. Истятнэнь, кода: «Роштовань кудо», «Тундонь ильтямот», «Ведявань налксемат», «Норовавань чи», «Пангонь чи», «Умарень чи» ды лият. Меельце иетнестэ сынь ютавтсть минек поэттнэнь ды писательтнень творческой чокшнеть.

Те вастовомасонть ульнесть пек мельстуиця кортамот. Сынст анокстызь ды ловнызь «Литова» эрзянь авань вейсэндявксос совицятне: филологиянь наукань кандидатось, «Известия Мордовии» автономной учреждениянь радиовещаниянь службань прявтось С. В. Пивкина, МР-нь заслуженной тонавтыцясь Р. Д. Жегалина, декоративно-прикладной искусствань артыцясь, Н. П. Огарёв лемсэ МГУ-нь ИНК-нь эрзянь ды мокшонь культурань ды неень шкань искусствань кафедрань доцентэсь Л. Д. Лёвина, филологиянь наукань кандидатось, М.Е. Евсевьев лемсэ МГПУ-нь тиринь келень ды литературань кафедрань доцентэсь С. Н. Маскаева, «Литова» вейсэндявксонь прявтонь полавтыцясь Т. Т. Чекушова ды ламо лият. Весе сынь ёвтнесть, кодамо тев топавты эсензэ таркасо тиринь келенть, культуранть, койтнень-кирдатнень ванстомасо.

– Эрзянь келентень покш мелень явомо карминь позда, зярдо уш тень ульнесть 40-де ламо иеть. Сестэ школасо важодемстэ эйкакштнень марто ютавтынек ламо кенярксчить. Мейле эрямозонок сась Интернетэсь. Тонавтния сонзэ. Стамбарнэ карминь путнеме тов морот, стихть, видеот, карминь ёвтнеме эрзятнеде масторлангонь келес. Минденек мезеяк арасель Интернетсэ ды те пек ацирьгавтсь. Ней «Одноклассниксэ» ветян зярыя курот. Вешить моронь валт, нотат – кучан. Кевкстнить эйсэнь, кона шкане кенерят? Ды бути ули мелеть, бути тевесь теть вечкеви – шкась муеви, – ёвтнесь Р. Д. Жегалина.
Лембе валт ёвтасть инжетне – В. И. Ромашкин лемсэ Этно-кудонь прявтось, МР-нь заслуженной артыцясь П. В. Рябов, книгань нолдыцясь К. И. Шапкарин, МВД-нь заслуженной важодицясь, отставкасо полициянь подполковникесь Е. Н. Шульгов.

Эрзянь авань вейсэндявксось нолдась аволь аламо книгат ды буклетт. Неть: «Тиринь кель», «Азбука», «Моя малая Родина», «Моронь пусмо» ды седе тов. «Литовань» 25 иетненень – од буклет, косо пачтяви союзонть тевтнеде ды изнявкстнэде. Сонзэ нолдамс лездась МР-нь Культурань, национальной политикань ды архивень тевень министерствась. Р. Б. Щанкина сонсь сёрмали проектт ды изни грантт, неть ярмактнень лангс нолдыяк изданиятнень. Союзось пек бажи панжомс народной театрань студия ды Интернетсэ эсест сайт.

Раиса Борисовнань топавтовсь эштё вейке мелезэ – кармась тееме «Вирявань сурсеме» раськень фольклоронь коряс фильма-ёвкс. Тосо ёвтневи, кода икеле семиятнесэ вансть покштнень мелест, кода ломантне ванстсть пертьпельксэнть. Теньсэ тензэ лездыть «Луч» Культурань кудось ды «Вармава» фольклорной коллективесь. Кизна съёмкатне ютасть Кочкурбуень Вирь Тавласо: «В. И. Ромашкин лемсэ Этно-кудо» музейсэ, веленть вакссо мазый таркатнева. Парсте лездась музеень важодицясь Р. В. Водясова.
Ней «Литовась» аноксты ютавтомс «Новая песня древней земли» регионъютконь фестиваль. Те проектэсь изнясь культурань инициативань Президентэнь фондонь грант.

Татьяна Маторкина
Фототне Эдуард Ретунскиень
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».