Меельце иетнестэ пек покш мель кармась явовомо раськень койтнень-кирдатнень вельмевтемантень. Велетнева панжтневить Этно-кудот ды музейть, косо невтеви икелень шкань эрямось, ёвтневи койтнеде-кирдатнеде ды башка мель явови велень кедьчелькев ломантненень, конат ванстызь покштяст-бабаст ремеслатнень ды бажить содавтомс мартост лиятнень.
Истят музейтне улить зярыя велетнесэ. Вейкесь эйстэст важоди Орданьбуень Орозбие велесэ. Тесэ музеесь лиятнень ёнов а молиця. Экспонаттнэ – понань лембе кемть, конат содавикст весе масторонть келес ды сонзэ томбале.
Музеесь тесэ панжозель 2006 иестэ ды ламо иень перть сон важодсь школанть юрсо. Зярыя иеде икеле музеенть алов теезель чувтонь кудо ды «Культура малой Родины» «Единая Россия» партиянь проектэнть лувсо теезельть витнемань-вадрялгавтомань тевтне, рамазель эрявикс ули-паро ды эсь таркаваст аравтневсть прявт экспонаттнэ – понань лембе кемтне. Тесэ невтневить эрьва кодат лия ёнов а молиця понань кемть, куш кодамо покшолмань ды тюсонь. Истя жо невтеви, кода юты кемтнень кевердемась. Ансяк тень седе паро неемс, аволь ёвтнемс. Мекс жо тесэ панжозель кемень музеесь? Паряк, сень коряс, понань кемень кевердемась Орозбиень эрицятнень туртов кезэрень тев. Ансяк весемеденть мельга-мельцек.
Понань кемень кевердемась Орданьбуень райононь Орозбие ды Кеченьбие велетнесэ (сынь аштить шабрацек) кезэрень тев. Весемесь ушодовсь 300 иеде икеле. Те тевесь свалшкане лездась карсемс лембе кемсэ аволь ансяк эсь семиянть ды малавикстнэнь, лездась ярмаконь теемасояк – кемтнень кевердильть миемань туртов. Ды ламо иетнень перть эрьва кудосо, эрьва семиясо ульнесь кемень теиця-кевердиця. Нама, ней весемесь полавтовсь. Сыре кедьчелькев ломантне, конат содылизь те тевенть, тусть эрямостонть, а сынст цёратне ды нуцькатне кочкить лия тевть. Ды кортамскак а мезе, понань кемень кевердемась – тевесь пек а шожда. Секскак течинь чине Кеченьбиесэ тевесь кармась уш стувтовомо, Орозбиесэ жо ремеслась эштё эзь ёма, понань кемень кевердицят улить зярыя.
Истятнэнь ютксо Аксёновтнень семиясь. Сынь те тевсэнть уш аволь вейке кементь иеть ды понань лембе кемест содавикст масторлангонь келес. Юрий Александрович ды Надежда Михайловна Аксёновтне минек республикасо ды томбалеяк ломантне содавикст. Сынтемест а юты вейкеяк выставка, а эрси вейкеяк ярмунка. Сынст лембе кемтне ды понасто эрьва кодамо теевкстнэ – аволь ансяк Орозбиенть, весе республиканть каштанчизэ.
Весемесь ушодовсь 1995 иестэ. Надежда Михайловна сестэ уш важодсь велень Культурань кудонь прявтокс. Ды весть сонензэ пшкадсь райононь ДК-нь важодицясь Татьяна Юрьевна Курбатова. Пшкадсь лия ёнов а молиця тев марто – максомс понань лембе кемть, конатнень Надежда Михайловнань мирдезэ Юрий Александрович кевердиль уш ламо иень перть, «Шумбрат, Мордовия!» фестивалень выставкасо невтемань туртов.
– Мон пурнынь кавто кескавт понань кемть ды максынь тенст, монсь жо эзинь яка, – корты Надежда Михайловна. – Выставкастонть усксть тень грамота. Зярыя шкань ютазь таго тень пшкадсть, мон арсезевинь, кемтнень а макссынь, монсь молян. Ды истя карминь ардтнеме эрьва кодамо мероприятиява, выставкава, карминь невтнеме эсенек кемтнень.
А эдь эрьва выставкасонть эряви невтемс мезеяк од, мезе икеле арасель. Ды Надежда Аксёнова свалшкане совавты те одонть. Кода тешксты сонсь авась, ёрокчись ансяк улезэ, фантазиясь теть эрьва мезе ёвты. Аламонь-аламонь понань кемтнень кармась мазылгавтомо кодамояк викшневкссэ, эрьгинесэ ды човалясо, педявтнеме эйзэст ривезень ды ведьпачань кедь марто тешкст. Ломантне седе покш мель кармасть явомо кемтненень, кармасть кевкстнеме, кодамо мазылгавтомка ды викшневкс марто седе паро саемс.
– Мон карминь ёвтнеме мазылгавтомкатнень коряс, карминь толковамо. Паряк, кинень седе паро саемс эрзянь викшневкс марто, кинень пизёлкувтёл марто, кинень лади минек раськень орнаментэсь, кинень теке понастонть теезь эрьва кодамо тюсонь цецине марто, кинень седе весёла кемтне – помпончик эли ведьпачань кедь марто. Кодат ансяк кемть весе неть иетнень перть эзинек тейне, кува ды кодамо мероприятиява ансяк мартост эзинек ардтне. Ламоксть ульнинек Московсо ютавтовиця мероприятиятнесэ-выставкатнесэ, ульнинек Московонь областень оштнесэ, Равчирень регионтнэсэ.
Кемтнень ды теевкстнэнь неить неть мероприятиятнесэ, пачтить малавиксэст туртов ды мейле тенек яла гайневтить ды кармавтыть, кинень мезе эряви. Минек кемтнень рамить весе Россиянть келес, аволь умок гайневтсть Норвегиясто, товгак кучинь лембе карсемапельтнень. Ды, эряви меремс, куш косо вастыть эйсэнек покш мельсэ, учить минек од теевкстнэнь, – ёвтни Надежда Аксёнова.
Кемтнеде башка Аксёновтне теить-кевердить тапочкат ды лия карсемкат, банясо парямонь туртов шапкат ды варьгат, шляпат, налксемань туртов кедьёнкст. Истя жо Надежда Михайловна тонавтнизе фильцеваниянь тевенть ды ней сонзэ кедь алдо лисить понасто теезь ковёрт, оршамопельть, конат мазылгавтозь эрьва кодамо тюсонь артовкссо. Мезе ансяк тесэ а неят – вана сэняжа эрьке ланга укшныть ашо мацейть, лиясонть ёжонть токить паксянь цецятне. Ды весе неть теевкстнэсэ маряви истямо лембе ды сэтьмечи, конанть зярдояк а марясак предприятиясо конвейер алдо лисиця оршамо-, карсемапельтнень ды кедьёнкстнэнь эйстэ.
Юрий Александрович жо кемень кевердемань тевсэнть колоньгеменде ламо иеть. Сынст весе раськест те ремесласонть важодсть.
– Монь тетямгак кевердсь, покштямгак, покштянь покштязояк. Нама, моньгак эштё овсе эйкакшокс тенень тонавтымизь, – тешксты Юрий Аксёнов. – Икеле яла, малав весе веленек, кемень кевердеме ве ёнов ардтнилинек. Пурнавиль бригада ниле-вете ломаньстэ, ды сёксня, зярдо паксянь тевтне прядовильть, туилинек. Ардтнинек Башкирияв, Оренбургов, Куйбышевав. Истя комсьветее иешка ве ёно кевердинь. Ней, паряк, кеменьшка иеть ковгак а якан, кудосо важодян. Велестэнтькак ве ёнов ардтницят арасть. Кевердицятнедеяк ламо эзть кадово, од ломантне те тевсэнть котьмамс а бажить. Ды эдь стакаяк тевесь. Аволь эрьванть туртов.
Лембе кемень кевердеманть туртов понанть Аксёновтне рамить Башкириясто. Тосо ревень племась вадря, понась парсте озы ды кевердемань туртов лади. Эряви меремс, Юрий Александрович кевердемань туртов эрявикс колодкатненьгак теи сонсь. Косто сынст лиясто саемат? Эдь сонзэ кемтне эрьва кодамо покшолмань, сынст туртов колодкатнень косояк а теить, секскак те тевенть тонавтнизе сонсь.
– Эштё зярыя иеде икеле телевизорга невтизь Ивановской областенть, косо тейнесть сувенирэнь кемнеть. Надежда Михайловна неинзе ды мери тень згилязь, келя, тон а маштат, паряк, истят тееме? Мон стяко кортамо эзинь карма, теинь 3 миллиметрань кемнеть, – тешксты Юрий Аксёнов.
Ды те шкастонть саезь, кодамо покшолмань кемть ансяк арасельть теезь: овсе вишкине сувенирной кемнестэ саезь истямос, конатнес эйкакш кельги. А вана 3 миллиметрань кемнетнень кисэ Николай Иванович Меркушкин (республикань сестэнь Прявтось) Юрий Александровичнень казсь эрзянь панар ды тешкстызе «Сехте вадря мастер» значоксонть, Надежда Михайловнанень макссь раськень мазый платия.
Паро, минек велетнесэ улить истят кедьчелькев ломанть, конат кемевикст эсь раськень койтненень-кирдатненень, конат бажить сынст ванстомс. Берянь, истятнэде кадовить аламо. Ансяк Юрий Александрович Аксёнов ремесланть ёмавтомс а арси. Секскак сеедьстэ мастер-класст невтни Савелий нуцькиненстэнь ды пек бажи эйстэнзэ кастомс эсь тевензэ поладыця.
Юлия ЕРЕМИНА