Ансамблясь ушодызе эсь кинзэ 1994 иестэ. Сонзэ пурныцякс ульнесь эрзянь содавикс поэтессась Маризь Кемаль. Васенце иестэнть саезь сынь ушодсть ютавтомо ламо вастовомат, чокшнеть: тешкстасть минек содавикс ломантнень – тонавтыцятнень, артисттнэнь чачома чист. Сынст ваномо пурнавкшность ламо инжеть. Ушодсть ютавтомо Озкстнэнь.
Ней коллективень ветицясь – МР-нь культурань заслуженной важодицясь, «Литова» эрзянь аватнень вейсэндявксонь прявтось Раиса Щанкина. 30 иетнень перть ламо мезесь полавтневсь, коллективентень сакшность од морыцят, тукшность лиятне… Ансяк эзь полавтово вейкесь: ансамблясь весе неть иетнень перть вансты эрзянь культуранть, вельмевти койтнень-кирдатнень, ютавтни эрьва кодат вастовомат, промкст, кенярксчить. Теде башка, пурнызь минек покштянок-бабанок кезэрень моротнень, морсить сынст эрьва косо. Мезесь пек кецявты, нолдасть неть моротнень марто кавто дискт. Снимасть «Кизэнь вастома» ды «Кшить-салт» телефильмат. Аволь умок тейсть «Вирявань сурсеме» ёвкс-спектакля.
Ансамблясь сеедьстэ ардтни концерт марто республикань томбалев, косо эрить эрзятне. Саемга, сынтемест а ютакшны Нижней ёнксонь Лукояновабуесэ «Эрзянь лисьмапря» кенярксчись. Покш мельсэ морыцятнень учить республикань районтнэсэяк. Эрьва косо сынст вастыть лембестэ ды паро мельсэ. Ламоксть савкшнось ардомс мартост ковгак концертэв, лия вастовомас. «Ламзурень» аватне содыть истя ламо морот! Сынст репертуарсо кода кезэрень моротне, истя неень шканьгак. Улить озномань, свадьбань морот. Истя жо мокшонь, коминь, удмуртонь ды маринь кельсэ морот. Ансамблясь, моротнеде башка, путни сценкат, сёрмадыть покш чинь сценарийть. Аватне свал ардтнить тов, ков тердьсызь. Сынь – оймамонь а содыцят.
Ней ансамблясонть морсить Н.В. Бочканова, В. И. Пронина, М.Л. Торбина, Л. Н. Фирсова, Т.И. Боброва, Т. М. Егина, Р.М. Пронькина, Р. С. Зорькина, ламот сценкатнесэ налкси В. И. Алямкина, аволь умок сась В.И. Щукина. Кода ёвтнесь Р. Б. Щанкина, ансамблянтень ламо лезды Т. Т. Чекушова, сон кадык а морси, теи-топавты лия тевть. Лиясто сакшны морамо Т.А. Владимирова. Тесэ бажить морамс лияткак, ансяк зярс а сатны шкаст. Кемтяно, шкань ютазь сыньгак кармить аватнень ютксо. Раиса Борисовна башка валсо тешкстызе Раиса Сергеевна Зорькинань. Шумбрачинзэ кувалма сон эзь саво юбилеентень. Эрямонзо перть важодсь эйдень кужосо музыкальной руководителекс, воспитателекс. Сон седи баянсо. Теде башка, свал налкси «Ламзурень» сценкатнесэ, сонзэ кондямо артистка стака муемс. Мазылгавтсы эрьва путовксонть. Кода те сонзэ лисни? Ёроков ломанесь.
– «Ламзурь» ансамбляв ветимим сазором. Те – Елена Воронина, МР-нь заслуженной артисткась, кона морси Г. И. Сураев-Королёв лемсэ «Келу» фольклорной ансамблясо. Ды вана уш вете иеде ламо морсян. Пек тукшны мелезэнь. Ардтнетяно морсеме фестивалев лия ошов. Ульнинек Пензань, Ульяновскоень, Нижнеень ёнкстнэсэ, – ёвтни Марина Торбина.
Марина Лаврентьевна чачсь Челябасо. Авазо Краснослободской райононь, тетязо – Покш Березникбуень Пермезь велестэ. Вастовсть ды теевсть содавиксэкс жо Челяба ёнкссо. Тосо важодсть кирьпецень теема заводсо. Чачсть эйкакшост. Састь эрямо Мордовияв. Тесэ роботат арасельть ды тусть мекев. Ансяк седеесь свал тердсь тиринь ёнксов. Истя сынь рамасть кудыне Покш Березникбуень Хониновка велесэ. Чачтсть-кастсть кавксо эйкакшт. Тетяст важодсь колхозсо конюхокс, ревень фермасо, стадаваныцякс, ванстыцякс, нешкепиресэ котьмас. Покш семиясь эрясь ялгаксчисэ, вейке-вейкенень лездазь. Малав весень сынст мазый вайгелест. Гайтев вайгельть ульнесть аванзо ёндо малавикстнэнь ды тетяст ёндо патятнень. Вейс пурнавомсто сынь свал морсесть эрзянь морот. Ялаксозо Валерий Исляйкин прядызе Л. П. Кирюков лемсэ Саранскоень музыкальной училищанть, тонавтнесь Московсо ГИТИС-сэ. Важоди Московонь опереттань театрасо. Елена Воронина сазорост прядызе Саранскоень культурань училищанть. Тосо тонавтнемстэ тенст сакшнось «Келу» ансамблянь се шкань прявтось Н.П. Спиркин, кунсолызе ды тердизе морамо эсензэ коллективс. Марина Лаврентьевна заочна прядызе Н. П. Огарёв лемсэ МГУ-нь филологиянь факультетэнть. Важодсь Литейной заводонь цехсэ, 16 иеть – «Электровыпрямитель» заводсо инженерэкс-технологокс. Стака шкатнестэ савсь тензэ роботамс базарсо микшницякс, ардтнесь товар мельга Московов. Ней роботы домоуправлениясо. Сонзэ кавто эйкакшонзо, ули нуцьказо. Лезды тенст эрьва мейсэ. Те эрзявась мельспаросо морси «Ламзурь» ансамблясо, эрьва юткошкастонзо капши репетициятнес, покш кенярксчитнес. Сон свал мизолкс марто, весенень паронь арсиця, лездыця.
«Ламзурень» юбилейстэ сцена лангсо невтезель «Вирявань сурсеме» ёвксось-спектаклясь. Сонзэ невтить уш аволь васенцеде, ялатеке улить сетне, кить эзизь некшне. Сон тусь мельс ваныцятненень. Эйсэнзэ налксить «Луч» Культурань кудонь «Вармава» ансамблянь тейтерьаватне ды лия коллективень артисттнэ.
Лембе валт пурнавозтненень ёвтасть «РФ-нь Финнэнь-угрань раськетнень ассоциация» весероссиянь общественной вейсэндявксонь прявтонть П. Н. Тултаевень лездыцязо Евгений Щукин, МР-нь культурань, национальной политикань ды архивень тевень министерствань раськеютконь кевкстематнень коряс отделэнь прявтось Александр Кочеваткин. Морыцятне казевсть Почётной грамотасо ды Благодарностьсэ.
– Сюкпря ёвтан тенк республикань томбале эриця эрзятнень ды мокшотнень пельде. Кадык «Ламзуресь» гайги седе товгак. Тынь весе седейсэ вансттадо минек келенть, культуранть, койтнень-кирдатнень. Вастневтядо школань тонавтницятнень марто, невттядо тенст кезэрень койтнень. Ардтнетядо лия регионов, косо лембестэ вастыть эйсэнк ваныцятне. Икелев молема ки тенк, кеме шумбрачи! – кортась Эрзянь ды мокшонь раськень регионъютконь общественной вейсэндявксонь исполкомонь прявтось Татьяна Ларина.
Кенярксчинтень сакшность инжеть лия ёнксстояк. Те: Пензань областень Бессоновской райононь Пазялго велестэ «Чевгелина» ансамблясь, Самарской областень Сызрань ошонь «Нармонь морыця» коллективесь, Самарасто морсицясь Анна Лачина. «Ламзуренть» ламо ялганзо эрьва косо. Ютксост МР-нь народной артисткась Анна Атласова. Ансамблянть марто вейсэ сон морызе «Тиринь веле» моронть, конась теевсь велетнень гимнакс.
Раиса Борисовна Щанкина ёвты покш сюкпря ансамблясо морсицятненень ды весенень, кие лездась ютавтомс те лембе кенярксчинть.
Татьяна МАТОРКИНА