Четверг, марта 28, 2024
Важное
«Лейне» ансамблясь полады эрзянь койтнень-кирдатнень


Тундонь чудикерьксэкс шольнезь шольнить Орданьбуень райононь Куцян велень «Лейне» фольклоронь ансамблянь аватнень виев вайгелест. Васов марявить сынст эрзянь морост, сельмс каявить цивтёрдыця оршамопелест ды прясост цецянь каштазост. Кодамояк гармошка тенст а эряви, сынь морсить эрзянь кезэрень койтнень коряс – ансяк валсо-вайгельсэ невтевить весе ёжомарямотне.

Те а покш ансамблясь, косо ней морсить колмо эрзянь ават, чачсь аволь умок, 2015 иестэ. Районсонть яволявтозель «За околицей» раськень моронь пелькстамо ды Куцян велень аватненень сась мель невтемс эсь докачист. Любовь Николаевна Доронькина, Елизавета Николаевна Прыткова ды Александра Михайловна Валдаева юткошкасто свал морсильть мельстуиця рузонь ды эрзянь морот, мекс бу покш сцена лангсто прянть а невтемс?! Аватне ве мельсэ пурнызь эсест художественной руководителекс Любовь Николаевна Доронькинань, эсест школасо музыкань уроконь тонавтыцянть, кона ладсинзе вайгелест. Елизавета Николаевна Прыткова, велень библиотекань прявтось, вейсэ биологиянь уроконь тонавтыцянть Александра Михайловна Валдаева марто арсизь репертуаронть. Ютасть велеванть ды мусть горобиясто эрзянь авань кезэрень оршамо- ды карсемапельть. Куцян велень аватне сынст оршнилизь свадьбав, зярдо якильть кудавакс. Мазый тюсонь атласонь панартнэ-юбкатне стазельть кеместэ, ванстовсть котатне-венгеркатнеяк, конатнесэ эрзяватне чавсть дробь, прязост путовиця, кода мерить Куцянвелесэ, «живой тветнэ» кадык аламодо олазельть, ялатеке тевс маштовсть. Истя пурназь-сэрнязь сынь мольсть концертэв ды сайсть васенце тарка!

Изнямось макссь од вийть. Шабра велень аватне кандсть тенст седе од оршамот, кодазельть од каштазт, ды ансамблясь натой гастролевгак кармась ардтнеме эсест тиринь районга. Рузонь моротнень морсесть рузонь раськень оршамопельсэ, эрзянсетнесэ гайгстыльть эрзянь морот. Сехте вечкевиксэкс сынст коллективсэ кармасть колмо моротне: «Эрзянь ава», конанть сёрмадызе Раиса Плотникова, «Раман Оксясь» раськень морось ды эсест вийсэ-превсэ арсезь Куцян веледе морось. Вейкеяк кенярксчи велесэнть ней а ютни «Лейненть» моровтомо, ансяк кезовось аламодо киртинзе сынст. Куцян велень аватне «педявтызь» моротненень вечкеманть школасо тонавтницятнененьгак ды ней ули эсест эйкакшонь ансамбляст, конань лемдизь «Килейне».

Сынь вейсэ сеедьстэнь инжеть «Шумбрат, Мордовия!» фестивальсэнть, конась ютни республиканть келес. Мезде ней арсить аватне? Васняяк, бажить одкстомтомс оршамотнень, ставтовтомс сынст од коцтсто, ансяк кезэрень койтнень апак кола. Омбоцесь, кастомс кезэрень моронь вечкицят, улевель бу кинень мейле кадомс эсь содамочитнень ды раськень моротнень. Кадык весемесь сынст топавтови, кадык лисить тенст лездыцят!

Марина ДЕВЯТОВА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».