Орданьбуе станциясь, конась те шкас мейсэяк эзь явово лия а покшке велинетнень эйстэ (ансяк бути чугункань кисэнть), омбоце ие гайги весе масторонть келес. Тесэ умарьковсто эрси «Край земли» фестивалесь, конань анокстыцякс ды ютавтыцякс кармась Александр Земченко бизнесменэсь, Орданьбуень районсо чачозесь-касозесь.
Александр Игоревич саинзе арендас тесэнь умарьпиретнень, озавтсь аволь ансяк эрьва кодамо сортонь умаринат, истя жо виноградт ды тиринь енкссонзо панжсь компания, конась нолды ведь, умарьстэ сокт ды ламо лия симемапельть. Ансяк теньс сон эзь лоткаво ды ламо иеть бажась сенень, штобу те васоло модадонть кармаст содамо весе. Нолдась Орданьбуенть вакска чудиця Ратор лейганть а покшке теплоход ды ней уйневти весень, кинь ули мелезэ. Аволь умок Орданьбуесэ васенцеде ютавтсть «Матрешка» электронной музыкань фестиваль, ды вана таго од кенярксчи – «Край земли» фестивалесь, конантень пачколинек миньгак.
Те ульнесь алкуксонь кенярксчи весенень: покштненень, вишкинетненень, сыретненень ды одтнэнень! Истя минь бу меревлинек те фестивальденть! Вана кода эряви ютавтнемс истят покш чить, кой-кинень эряволь бу саемс пример. Нама, анокстыцясь-ютавтыцясь эзь жаля ярмакт, бажась путомс весе оймензэ. Мезе тесэ ансяк арасель: важодсть эрьва кодат фотозонат, «Край земли» компаниясь питневтеме явшесь сахаронь вата ды варчавтнесь эсензэ продукциянзо, кедьчелькев ломантне ускизь эсест теевксэст-паневксэст, ожо-пиже, якстере тюстнэсэ мазыйстэ оршнезь (ламот сакшность эрьва кодамо раськень оршамопельсэ) инжетне мельспаросо снимсесть, ванкшность маласо аштиця умаринатнень ды каванясть эсь пряст питневтеме явшевиця умартнеде, весень кенярдовтсть ломанень сэрьсэ някатне…
Боксонь коряс олимпийской чемпионось, мирэнь чемпионось Александр Поветкин невтсь мастер-класс спортонь школав якиця од церынетнень туртов ды мельспаросо снимсевсь весень марто. Те шкане сценанть лангсо секе-тев полавтневсть артисттнэ ды содавикс ансамблятне: «Мерема», «Дерика», «Варма» этно-арт-театрась, Андрей Бочканов, Витава, Санкт-Петербургонь «Параллели» группась ды, нама, чокшнень хедлайнерэсь – Россиясо содавикс тештесь Тима Белорусских эсензэ «Незабудканзо» марто.
Кенярксчинь торжественной панжомань шкастонть Александр Земченконень Мордовиянь Журналистэнь союзонь прявтось Людмила Резяпкина казсь Россиянь Журналистэнь союзс совицянь билет ды сынь вейсэ арсесть од проект – эрьва иестэ те площадкасонть каземс региононь сехте редявиця од журналисттнэнь. Покш казне – Почетонь знак, союзонть пельде максозель МР-нь Прявтонь ды Правительствань Администрациянь руководителень лездыцянтень Анастасия Видяеванень. Благодарностьсэ тешкстазель «Маяк» газетань отделэнь редакторось Лариса Макаркина.
Марина Девятова