Четверг, марта 28, 2024
Важное

Умоктояк умонь шкасто минек покштятне-бабатне ютавтнесть эрьва кодат покш чить, конат сюлмавозельть се эли тона шканть марто. Ней сеть кезэрень койтнестэ ламотне стувтозь. Те минек раськенть туртов пек покш ёмавкс. Седикелень мазыйдеяк мазый ды сюпавдояк сюпав койтнень ёмамост кувалма кармась сезевеме се суринеськак, кона сюлмась эйсэнек ютазь шканть марто.



Виде, меельце шкастонть ламо таркава кармасть одов таргсеме раськень койтнень ды совавтомо сынст эрямос. Чарькодеви, се-тона коенть невтемстэ аволь весемесь лиси истя, кода ульнесь седикеле. Тень лангс апак вано, ялатеке мельспаро сайтянзат, зярдо марят, кодамояк ошсо эли велесэ ютавтозель эрзянь покш чи седикелень койтнень ладсо.

Истят снартомат тейнетяно миньгак «Ламзурь» морокуронть марто. Эрьва иестэ Саранск ошонь «Луч» Культурань кудосо, школатнесэ, библиотекатнесэ, музейтнесэ (нурькинестэ, тосо, ков тердтнесамизь) ютавтнетяно вастовомат, чокшнеть, косо ёвтнетяно седикелень койтнеде. Тедедеяк ютавтынек сындест аволь аламо: «Роштовань кудо», «Тундонь вастома», «Эрьбань чи», «Од толонь чи».
Ней ушосонть кизэ. Сась шка ледстямс седикелень таго вейке коенть – «Кизэнь вастоманть». Седикеле сон лововсь сехте мазый ды кенярксов покш читнестэ вейкекс. Секс анокстасть эйзэнзэ эрьва велесэ. Тень коряс ванстовсть ламо сёрмадовкст. Сынь, неть сёрмадовкстнэ, миненекак лездыть неть покш читнень ютавтомсто. Эрьга, ледстясынек тыненкак.

Седикеле (XIX пингенть прядовомсто) кизэнть вастомсто Оренбургонь ёнксонь Бугуруслан буень Павлушкина эрзянь велесэ од тейтертне валске марто пурнавильть вейс, юткстост кавтотнень оршневтилизь цёрань оршамос (сынст лемдсть «андямокс»). Неть «цёратне» лововсть прявтокс. Вирев сыргамодо икеле морасть:
Тейтерь-какат, пурнавинек,
Боярават, сэрнявинек,
Лангозонок минь оршнинек
Весе ашо минь палинеть,
Паля ланга минь оршинек
Весе мазый минь руцинеть.
Руця ланга минь каркснинек
Икельганок ней пацинеть.
Кавто тейтерть эсь юткстонок
Минь андямокс наряжинек,
Паро боярт, кавто цёрат
Юткозонок минь тердинек.
Мазыйнестэ сынь пряст пурнызь.
Ков истя минь пурнавинек?
Ков думинек минь, арсинек?
Минь думинек ней, арсинек
Кизэчинть мельга молеме,
Кизэчинть вейсэ вешнеме,
Киштевтеме, моравтомо,
Ульцянь кувалт ютавтомо.
Косо эри Кизэчинесь,
Косо ашти Мазычинесь?
Эри пиже сон лугасо,
Мазый тусто вирь маласо.
Самай мазый ней таркасо,
Адядо минь вешнесынек,
Ундокскева керясынек,
Кедне лангсо минь кандсынек,
Ульцянь кувалт ютавтсынек,
Киштевтьсынек, моравтсынек.

Лия сёрмадовкстнэсэ вейке од тейтересь пшкадиль ялганзо туртов истямо валсо:
Адядо, ялгат, минь ней адядо,
Пиже лугава да минь якамо,
Мазый цецянь, ялгат, сезнеме,
Вай прясуринень, ялгат, тейнеме,
Прясуринень, ялгат, керьксамо,
Кизэчинть, ялгат, вешнеме,
Кизэчинть, оят, тердеме.

Ки лангов сыргить моразь («Вирев молян», «Адя, адя, Оря патяй»). Виренть малас пачкодезь, энялдыльть Виряванть икеле керямс вейке килейне.
Вирень ванстый Вирява,
Вирень кирдий Азорава.
Пшкадтяно валдо оймезэть,
Сюконятано пильгезэть.
Энялдтано минь икелеть,
Мерть тенек совамс вирезэть,
Керямс вейке килей чувто.
Аволь стяконь кис сайсынек,
Кизэнть мартонзо вастсынек.
Седе тов килейненть тарадонзо пева сюлмсильть мазый парсейнеть. Тень теильть моразь («Вай, лугась, лугась»). Эсест туртовгак кодыльть каштазт. Путылизь пряваст ды наряжазь килейненть марто сыльть лей чирес, пшкадильть Ведявантень:
Ведявине, парсей черне,
Ведявине, сиянь рунгине,
Мастор алдо тон ней лисят,
Мастор ланга тон ней чудят,
Сия ладсо тон ней цитнят,
Сырне ладсо тон кеверят.
Ёрвалдык тон Кизэчинек,
Тон шлик-нардык Мазычинек.
Сия ладсо ашолгавтык,
Сырне ладсо мазылгавтык!
Ютавтсынек минь те мазынть
Паро ошка минь, велева,
Киштевтьсынек минь те мазынть
Ламо ломань минь юткова.

Килеенть ведьс навамодо ды ёрвалдомадо мейле од ломантне ютыльть мартонзо велева. Перькаст пурнавильть велень ломанть. Серьгедильть килеенть ды кизэнть эйсэ шнамо морот.
Вай, сась мазый кизэнек,
Сась инечинь алонок.
Чалгась кустемпесэнек,
Озась столь экшезэнек.

Вейке тейтерь ёвты истят валт:
Вана Кизэнть тердинек,
Парынестэ вастынек.
Мазыйстэ оршавтынек.
Моро тензэ морынек.
Эрьга, ней киштевтьсынек.

Весе ушодыть морамо ды киштеме. Тезэнь ладить истят моротне: «Пандо прясо од килей», «Комолявка», «Кавто цёрат тикше ледить».

Вейке од тейтерь пшкади Кизэнтень:
Кизэ, кизэ, кизыне,
Макста лембе пиземне,
Макста чевте вармине,
Тустот улест сюротне,
Ламо чачост эмежтне.
Серьгедеви «Масторавась лужакадсь».
Масторавась лужакадсь,
Масторавась аварьгадсь.
Мекс масторось лужакадсь?
Мекс масторось аварьгадсь?
Лиси чизэ пидизе,
Пси вармава костизе.
Секс масторось лужакадсь,
Секс масторось аварьгадсь.
Тусь пиземе, пизизе,
Тусь пиземе, начтызе (симдизе).
Ней масторось пижелгадсь,
Ней масторось мазылгадсь.
Мородо ды киштемадо башка ютавтовить налксемат ды пелькстамот. Вейкенть лемезэ «Кавал, нарвицька ды ципакат».

Кавал, нарвицька ды ципакат

Налксицятне:
Кавал.
Нарвицька.
Ципакат.

Те налксемасонть налксекшнить тундонть самсто кизэнь перть. Зярыя цёрынеть ды тейтернеть пурнавить вейс луганар лангс. Налксема таркась ниле ёндо пиряви кикссэ. Паксясь явови кавтов. Ве пельксэсь карми улеме Нарвицьканть ды Ципакинетнень кудост ды вальма икельксэст, омбоцесь – Кавалонть эрямо тарказо ды вирень пизэзэ.
Налксицятне пурнавить наронть лангс, эсест ютксто кочкить Нарвицька (седе покш тейтерне) ды Кавал (цёрыне). Ципакакс кармить улеме весе кадовозь налксицятне.

Теде мейле налксицятне явовить кавтов. Кавалось озы эсензэ пизэс, Ципакатне пурнавить Нарвицьканть перька эсест кудынесэст.
Ве. Весе матедевить. Зярыя шкань ютазь Ципакатне ушодыть цикнеме:
– Авай, чизэ уш верев кепететсь.
– Ушов лисемаль.
– Пекенек вачсь.
«Сёлмонь» нолдазь ды клокнозь Нарвицькась варшты ушов, мейле тердьсынзе Ципакатнень – сынь туить мельганзо кедте кедьс кундазь кавто рисьмесэ. Ципакатне перьгедьсызь кедест вейке-вейкень эйстэ, ушодыть налксеме. Чийнить, вешнить ярсамка, тюрьгалить вейкест-вейкест марто, кеверькшнить. Нарвицькась пижни лангозост, кармавты энгамомс, ваны мельгаст: иляст туе васолга якамо. Тосо эйсэст, секень вант, Кавалось учи.

Маряви виев вешкема ды сёлмонь вачкоема. Те явась Кавалонть удомазо. Вешкеманть марязь, Ципакатне лоткить налксемеде, кунсолозевить, мейле, чиезь, весе кекшить Нарвицьканть удалов, пулодо пулос кундсезь.

Нарвицькась аноксты прянзо тюреме, келейстэ келемтьсынзе «сёлмонзо». Куроксто тей лиси Кавалоськак.

Кавалонть ули мелезэ седе курок сеземс ципакань рисьменть Нарвицьканть пулосто – вейкень-вейкень сынст кундсемс ули седе шожда. Нарвицьканть мелезэ – ванстомс эрьва ципаканть. Секс весе вийсэ бажи а нолдамс Кавалонть Ципакатнень ваксс.
Налксемстэ а мереви тюремс, тостяемс-тулкаемс, авторямс-ноцорямс черде. Саты сеяк, бути Кавалось кундасы Ципаканть кедте, ды тона а карми эсь прянь нельгеме. Кундазь ципаканть Кавалось сайсы эсензэ ёнов, сонсь туи лия Ципакань кундамо. Нарвицькась снартни ванстомс ципакатнень. Ары Кавалонть каршо ды а нолды Кавалонть эйсэ ципакатнень малас.

Ципакатне сынськак а максыть пря кундамс Кавалонтень. Бути конаськак эйстэст перьгеди, кенерезэ прамс кутьмере лангс ды, цикнезь, аволямс сёлмосост (кедьсэст ды пильгесэст). Истямонть Кавалось кадсы ды туи лиянь кундамо
Налксемась прядови сестэ, зярдо Кавалось пештясы эсь пизэнзэ пелешкадо ламо ципакасо.
Теде мейле весе пуромить вейс ды кочкить од Нарвицька ды Кавал.

(Саезь В. С. Брыжинскоень «Сиянь рисьминеть» пусмостонть).


Раиса Щанкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».