Воскресенье, июля 21, 2024
Важное

А. С. Пушкин лемсэ Национальной библиотекасо ютасть «2022/2023 иень сехте паро книга» пелькстамонь цётамотне. Те конкурсонть анокстыцятне – библиотекань Книгань палатась вейсэ МР-нь Минкультонть марто. Те конкурсось эрси кавто иес весть, секскак 18 номинациянь коряс пурназельть-кочказельть 150 книгат, конатне лиссть кавто иетнень перть, ды сынст обязательной экземплярось пачкодсь ванстомс Книгань палатав.

 

Седе тов неть книгатнень ванкшнось экспертэнь комиссиясь, козонь совасть наукань, культурань, СМИ-нь представительтне. Сынст мелест коряс кочказельть 72 финалистт, ды неть книгатнестэ анокстазель выставка, конанть ванномсто ловныцятне кочкилизь вечкевикс книгатнень. Истя жо вайгеленть максомась мольсь соцсеттнесэяк. Истя, весень вийсэ, пурназельтькак изницятне, конатнень каземе сакшность МР-нь культурань, национальной политикань ды архивень тевень министрась Светлана Баулина ды эксперттнэ.

Светлана  Никитовна изницянь дипломонть казизе РФ-нь культурань заслуженной роботникентень, искусствоведениянь кандидатонтень, профессоронтень Василий Сергеевич Брыжинскийнень  «Каргонь кинь ломанть» сехте паро литературно-художественной произведениянть кисэ. 90 иетнень лангс апак вано, Василий Сергеевич сонсь сась казненть мельга ды весенень ёвтась сюкпрянь валт.

Полиграфиянь коряс сехте вадря книгакс кармась Иван Щанкинэнь «Искусство интерьера» арсевксэзэ. А вана научно-популярной книгатнестэ васенцекс ловозель  «Шокшинский могильник» пурнавксось (теицятне: О. В. Зеленцова, С. В. Видяйкин, Е. Н. Кемаев, А. С. Пронин, Ю. Г. Григорьев, Р. Е. Головин).

Тедеде пек виевельть номинациятне, косо кочкавсть тиринь кельсэ сехте паро книгатне. Литературно-художественной произведениятнестэ прозань номинациясонть мокшонь ды эрзянь  кельтнесэ изницякс лиссть Валентина Мишанинань «Кяпе менельге» ды Виталий Картышкинэнь «Ютан велева» книгатне.

«Поэзия» пелькссэнть изнясть Николай Циликин «Шачема масторть араласаськ» книганзо марто ды Татьяна Мокшанова «Кудов ки» пусмонзо марто. Рузонь кельсэ сёрмадовкстнэстэ изницякс кармась Виктор Мышкинэнь «Полное собрание стихотворений, поэм и песен» (пурныцясь  П. В. Громов) книгазо.

Эйкакштнень туртов сехте паро книгакс ловозельть рузонь кельсэ «Мордовские народные сказки» (пурныцясь А. А. Долгачёв);  мокшонь ды эрзянь кельтнесэ –  Раиса Орловань «Азбукась стихса» ды Геннадий Гребенцовонь   «Азбукась стихсэ» книгатне.

Краеведениянь номинациясонть изнясь «Краснослободск пешком: от Севостьяновых до Прамы и далее» А.В. Лютовонь книгазо, а Нина  Осянинань  «Мастер изящной кисти Иван Кузьмич Макаров» нолдавксось  сайсь васенце тарка «Лучшая книга по культуре и искусству»  номинациясонть.

Сехте мельстуиця мемуарокс кармась «Возвращение земляники» Камиль Тангалычевень книгазо.  Валентина Ковшовань «Их небо принимало с любовью»  ды  Николай Сульдяйкинэнь «Книга памяти Кочкуровского муниципального района» пурнавкстнэ кармасть сехте паро патриотической книгакс.

Валерий Юрчёнковонь «Норовавань ды Вирьавань ёвксонзо» кармасть изницякс   «Эпилог» номинациясонть; од лемтнестэ изнясь «На чужом несчастье счастья не построишь» Даяна Паршаковань книгазо, конань сёрмадызе лавшо шумбрачи марто од тейтерькась.

«Этнография. Этнология. Фольклор» пелькссэнть весень икельдинзе «Мордовский костюм» (автортнэ: Н.Н. Челмакина, Л. Д. Левина, О.А. Малаева) книгась.

 Конкурсонть шкасто яволявтозельть башка номинацияткак. «Лучшее эпическое произведение мордовского народа» номинациясонть сехте парокс кармась «Мордовский народный эпос» книгась (пурныцятне: В. А. Юрчёнков, Н. Г. Юрчёнкова, И. В. Зубов, И. И. Шеянова).

М. Е. Евсевьев лемсэ МГПУ-нь студенттнэнь «Русские народные сказки на мокшанском и эрзянском языках» арсевксэсь кармась  раськень кельсэ сехте паро проектэкс.

 А вана «Читательские симпатии» номинациясонть кочказель «Лапти снега не боятся» Николай Храмовонь книгазо.

Весе изницятненень явшезельть ледстнемань казнеть ды Дипломт. Сюкпрянь конёвсо Светлана Баулинань пельде тешкстазельть Книгань палатань сотрудниктне ды эксперттнэ.

Меельцекс теезель вейсэнь фотография.

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».