Пятница, марта 29, 2024
Важное

Саранскоень Культурань кудосо ютась «Кезэрень модань од моро» регионъютконь фестиваль. Морамонь пелькстамонть лездась ютавтомс Культурань инициативатнень Президентэнь фондось. Те проектэнть арсизе-теизе «Литова» эрзянь авань вейсэндявксонь прявтось Раиса Щанкина. Фестивалентень морамо сакшность республикань районтнэстэ ды Пензань, Самарань, Нижнеень, Саратовань, Волгоградонь ёнкстнэстэ.



Лембе вал марто инжетненень пшкадекшнесть РФ-нь АФУН-нь прявтонь полавтыцясь Евгений Щукин, МР-нь Госсобраниянь Председателень старшей советникесь Иван Москаев, МР-нь Культурань, национальной политикань ды архивень тевень министрань васенце полавтыцясь Александр Карьгин, Эрзянь ды мокшонь раськень регионъютконь общественной вейсэндявксонь прявтось Юрий Мишанин, Саратовань ёнксонь «Шумбрат» эрзянь ды мокшонь раськень-культурань центрань прявтось Валентина Кривошеева ды лият.
Благодарностьсэ ды Почётной грамотасо казевсть ансамблянь ветицятне, концертмейстертнэ.

Концертэнть ушодызь сехте вишкинетне – Саранскоень 4 № эйкакшонь музыкальной школань «Говорушки» ансамблясь. Истя жо сцена лангсо морасть Ялгань тетявтомо-ававтомо кадовозь эйкакштненень лезксэнь максомань Центрань тонавтницятне.

Ваныцятнень кенярдовтызь Покш Игнатовань «Пизёлнэ», Рузаевкань «Тяштенят» ансамблятне. Кода а шнамс лия ёнкссто сазь инжетнень? Неть: Пензань областень «Чевгелина» ды «Умарина» коллективтне ды лият. Виев цяпамосо вастозельть Андрей Бочканов ды Артём Мамаев.
Анна Степановна Лачина ды Татьяна Лачина – бабат-нуцькат. Сынь састь тей Самарасто. Кавонест морсить «Вияна» ансамблясо (ветицясь И. Романова). Те коллективентень уш кемень иеть. Эрьва кенярксчистэ сынст тердтнить ковгак морамо. Морсить ЗАГСсояк, зярдо тосо сёрмадстовить од семият, тердтнить раськень свадьбав. Анна Степановна чачсь Кочкурбуень Сурвелесэ, эри Самарасо. Морсеме кармась умок, швейной фабрикасо важодемстэ. Татьяна нуцьказо тонавтни университетсэ. Морси вишкинестэ саезь. Ледстни, васня кармась морсеме «Колмо штатолт» моронть. Мейле сон теевсь содавиксэкс Ирина Романовань марто, кона саизеяк морсиця тейтерненть сёлмонзо алов. «Виянасо» кемень ломанть, сынь морсить рузонь, эрзянь, мокшонь морот. Течинь фестивальсэнть Самарань инжетне морасть ськамост-ськамост. Анна Степановна эсензэ сёрмадовт моронзо алтызе вечкевикс мирдензэ ледстнемга. Татьяна морызе «Колмо штатолт» Раиса Кемайкинань моронть.

Васенцеде Саранскоев пачколесь Саратова ёнксонь Петровской райононь Оркина велень «Лисьмине» ансамблясь. Кода ёвтнесь коллективень ветицясь Екатерина Морозова, сынь морсить эрзянь ды рузонь морот. Эсь пряст невтить райононь, областень ды регионъютконь фестивальтнесэ. Сайнить изнямонь таркат. «Лисьминесь» важоди Оркинань эрзянь раськень центрасо, конась Культурань кудонть юрсо.
– Меельце шкасто ломантне кода-бути вейсэндявсть, мельспаросо сакшныть репетициятнес ды морсить тиринь кельсэ морот, – пачтясь Екатерина.

Волгоградсто фестивалентень сакшность кавто ават. Сынь морсить «Эрзяночка» дуэтсэ. Валентина Кунцевич чачсь пек васоло – Приморской краень Охотск ошсо. Тетязо-авазо – Пензань ёнксонь Шемышейской райононь эрзят. Сонсь Валентина 1976 иестэ саезь эри Волгоградсо. Кода ёвтнесь авась, дуэтэст пурнавсь аволь умок. Паро оякс тензэ кармась Наталия Рогова. Кавто эрзянь аватне пек кецнить, теевсть содавиксэкс ды ушодсть вейсэ морсеме. Наталия Викторовнань ундоксонзо Самарань ёнкссто. Чачсь Татарстанонь Лениногорск ошсо. Школадо мейле тонавтнесь Елабугань культпросветучилищасо режиссёронь отделениясо. Седе тов тонавтнесь пединститутсо. Ансяк весе эрямонзо перть яви мель культурантень. Сон морси вишка пингстэ саезь, семиясост тетязо вечкиль морсеме. Нать, Наташаненьгак ютась те маштомачись.

– Мон свал арсилинь: кить минь, кодамо раськень, косто саевинек. Карминь вешнеме Волгоградсо эрзянь ломанть. Истя, «Золотая пора» сыре ломанень клубсо теевинь содавиксэкс Валентинань марто. Тердия мартон морсеме. Икеле морсилинь ансяк рузонь кельсэ. Ней вана эрзякскак. Келенть парсте чарькодьса. Истя жо теевинь содавиксэкс Сурвелесэ чачозь Василий Кияев эрзянь цёранть марто. Сон лездась тенек самс фестивалентень. Интернетсэ теевинь содавиксэкс Р. Б. Щанкинань марто. Сон ламо тень лезды, тонавты, ёвтни минек культурадонть. Ёвтаса, лездась тенек эрзянь оршамопеленек коряскак. Кучсь раськень тешкст (нашивкат). Мон стынь эстень ды Валентинанень эрзянь оршамопельть. Лиссть пек мазыйть, ней аволь визькс морамс сцена лангсто, – ёвтнесь Наталия Рогова.

Истя жо фестивальсэнть ютась «Моронь керькс» сборникень презентациясь. Те рузонь ды лия раськень кельстэ эрзякс ды мокшокс ютавтозь морот. Сонзэ пурныцясь – «Литова» эрзянь авань вейсэндявксонь прявтось Раиса Щанкина, пусмонь нолдыцясь – Константин Шапкарин. Изданиясь лиссь Культурань инициативатнень Президентэнь фондонть лезксэнзэ вельде. Моротнень ютавтызь Раиса Щанкина, Римма Жегалина, Вера Алексеева, Татьяна Швецова, Александр Данильчев, Валентина Буртасова, Рая Орлова, Николай Чепанов, Вера Пронина. Улить авторонь произведеният: Серафима Люлякинань, Геннадий Гребенцовонь, Тамара Барговань, Андрей Бочкановонь, Анна Лачинань.

Ды кодат ансяк тесэ морот арасть! «Катюша», «День Победы», «Ламбада», «Синий иней», «Угонщица», «Широка страна моя родная», «Снег кружится», «Калина красная, калина горькая», «От людей на деревне не спрятаться», «Приходите в мой дом», «Подмосковные вечера» ды лият.

Ламотне уш минек артисттнэнь репертуарсот ды гайгить сцена лангсо. Саемга, ваныцятне покш мельспаросо вастыть Артём Мамаевень, кона морси «Золотое сердце» (Стас Михайловонь репертуарсто моронть), «Домик окнами в сад» весенень вечкевикс моротнень. Пусмостонть муеви Виктор Цоень «Кукушка» мороськак, конань гайгемазо Интернетсэ пек тукшны весень мельс. Моронь вечкицятнень туртов те пусмось – алкуксонь казне!

Татьяна Маторкина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».