Ютазь пецясто минек «Эрзянь правда» газетань коллективсэнть ютавтовсь покш кенярксчи. Сон алтазель «Невтинк ёрокчинк!» пелькстамонть коряс цётамотнень теемантень ды сыре ломанень ковонть тешкстамонтень. Ледстясынек, таштамковонь 24-це чистэ «Эрзянь правда» ды «Мокшень правда» газетатненень топодсть 100 иеть.
Те кенярксчинтень алтавсть ламо вастовомат, выставкат, тиринь газетадонть ветерантнэнь марто ледстнемат ды ламо лия мельвановикс тевть.
Виде, покш мель явовсь ёрокчинь невтемань пелькстамонтень, конань ютавтомсто минек ловныцятне кучсть тиринь газетанть марто сюлмавозь фотографият, морот, нурька морынеть, стихотвореният, видеопоздоровт, ёвтнемат кода эрзянь, истя рузонь кельтнесэ. Весе неть важодевкстнэ ульнесть печатазь кода минек газетань лопатнесэ, истя жо невтевсть «Одноклассники», «ВКонтакте», «Фейсбук», «Инстаграм» социальной сеттнесэ газетанть куротнесэ.
Васенцекс пелькстамодо яволявтоманок редизь Республикань эйкакшонь ды од ломанень «Надежда» социальной приютонь важодицятне. Те учреждениясонть весе эриця эйкакштнень ютксо ютавтозель покш пелькстамо, сехте паро важодевкстнэнь (эйстэст ульнесть кавксо) кучизь минек редакцияв.
Аламонь-аламонь пелькстамось пурнась вийть. Эрьва чистэ редакцияв кармасть само седейшкавань пачтямот Саранскойстэ, республикань районтнэстэ, велетнестэ.
Седе тов Мордовиянь томбальде, косо эрить ламо эрзят ды мокшот. Шкань ютазь пелькстамонок теевсь мик раськеютконь (международнойкс). Миненек састь поздоровт Таллинн ошсто Эстононь эрзя-мокшонь «Сятко» вейсэндявксонть пельде.
Виде, неень шкань апаро орманть мельс саезь, минь ламо инжеть редакцияв эзинек терде. Састь ансяк изницятне ды ветерантнэ, кить те шкас кирдить сюлмот тиринь газетанть марто. Неть: Татьяна Михайловна Ковалёва, Тамара Сергеевна Баргова, Татьяна Дмитриевна Рябова, Валентина Александровна Круглова. Сыненст ульнесь мезе ёвтамс редакциянь неень шкань коллективентень, эдь, ловт, малав пингест алтызь тиринь газетасо важодемантень. Сынст седейшкава кунсолость пелькстамосо изницятне, од ломантне, кить, паряк, сы шкасто истя жо сюлмасызь эрямост журналистэнь эли редакциясо важодицянь тевенть марто.
Тешкстасынек, пелькстамосонть ёрокчист невтизь ниленьгеменде ламо ломанть, редакцияв састь колоньгемень вете важодевкст, кемнилее фотографият, кавто нурька морынеть рузонь ды эрзянь кельтнесэ, вейксэ артовкст, эсь кедьсэ теевть кавто налкшкеть, ниле стихотвореният, колмо видеосюжетт.
Торжественной пельксэнть ветясть минек прявт редакторось Марина Девятова ды Саранск ошонь 80 № эйдень кужонь воспитателесь Валентина Дыдыкина. Койсэнь, сынь тейсть пек видестэ, зярдо кармасть кортамо кавто кельсэ – эрзянь ды рузонь.
Ледстясынек изницятнень лемест. Неть: «Надежда» приютсто Ксения Лазарева, Кирилл Шебаршев, Дмитрий Малов, Рузаевкасто – Резяпкина Людмила Николаевна Алсу ды Анастасия тейтерензэ марто, Саранск ошонь 80 № эйдень кужонь воспитателесь Валентина Дыдыкина вейсэ те учреждениянь эйкакштнень Ева Рогулева, Иван Пинякшев, Михаил Першин марто. Саранск ошонь 11 № школань тонавтницясь Иван Кумаев. Истя жо казнеть максозельть лия эйкакштненень ды покш ломантненень, кить невтизь ёрокчист минек пелькстамосонть.
Те вастовомасонть ёвтазельть ламо поздоровт «Эрзянь правда» газетантень 100 иетнень топодеманть кувалма ды максозельть казнеть минек ветерантнэнень.
Кенярксчинек витизе «Келу» ансамблянь морыцясь, МР-нь заслуженной артисткась Любовь Князькова. Сон морась тенек эрзянь, мокшонь ды рузонь кельтнесэ.
Виде, пелькстамонть ютавтомасо покш путовксост минек лездыцятнень, кенярксчинть мазылгавтыцятнень ды свал шкань оянок. Течи ёвтатано покштояк покш сюкпря «Аграрная производственная фирма «Норов» генеральной директоронтень Дмитрий Алексеевич Поздняковнень, те компаниянь группатнень правлениянь прявтонтень Александр Ильич Поздняковнень, «Тепличное» ОАО-нь генеральной директоронтень Александр Михайлович Живаевнень, «ЛВЗ «Саранский» ОАО-нь прявтонтень Кирилл Кириллович Чапайкиннэнь, «МордовАлкоПром» ООО-нь прявтонтень Евгений Николаевич Сидоровнень, «Талина» Компаниянь Группатнень президентэнтень Виктор Степанович Бирюковнень, «Оптикэнерго» Компаниянь группатнень директоронь советэнь председателентень Эвир Аврамович Боксимернэнь, «Ромодановосахар» ОАО-нь прявтонтень Александр Иванович Атласовнень, Республикань някань театрань прявтонтень Евгений Яковлевич Романовскийнень, Мордовской государственной филармониянь прявтонтень Сергей Николаевич Кузьминнэнь эйкакштненень концертс ды спектакляс билеттнэнь явшемаст кисэ.
Кода мерсь «Эрзянь правда» газетань прявт редакторось Марина Николаевна Девятова, те паро ушодксонть поладсынек икелепелевгак, тейтяно кой: эрьва иень сёксня, тиринь газетанок чачома чинтень, яволявтомо истят пелькстамот. Тень вельде кармить улеме седе кемекс ояксчинь сюлмонок ловныцятнень, газетань сёрмадстыцятнень марто. Лангс ливтеви се, мезе течи сынст талновты ды кенярдовты!
Валентина ЮДИНА