Неть читнестэ Эрзянь-мокшонь раськень драмань театрасо ютавтовсь «Иненармунь» мазычинь ды ёрокчинь регионъютконь омбоце пелькстамось.

Финалс кочкавкшность 18 иестэ саезь 35 иес 14 мокшават ды эрзяват, конатне содыть тиринь келест. Сынь Саранск ошонь ды Мордовиянь районтнэстэ, истя жо Пензасто вейке мазыйка. 

Пряст невтемадо икеле колмо чить тейтертне кодасть кекшемань алтымат, лембе оршамот, сёрмадсть седей токиця лембе сёрмат минек боецтнэнень.

Конкурсонь меельце пельксэнтень мазыйкатне анокстасть визиткат, мельстуиця номерт тиринь кельсэ ды раськень оршамотнень невтема, макссть каршо валт эрзянь ды мокшонь раськень культуранть марто сюлмавозь кевкстематнень лангс.

Жюринть ванноманзо коряс васенце таркась пелькстамосонть максовсь минек коллегантень – «Мордовия» ГТРК-нь «Сияжар» раськень программань ветицянтень, эрзянь тейтерентень Екатерина Евстигнееванень. Ваныцятненень мельс тусь сонзэ творческой номерэсь. Катя невтизе «Озкс Ведяве» эрзянь коенть. Омбоцекс кармась Эрзянь-мокшонь раськень драмань театрань актрисась, эрзянь тейтересь Татьяна Биушкина, колмоце таркасонть – Н.П. Огарёв лемсэ Раськень культурань институтонь студенткась, мокшонь стирнясь Олеся Пестова. А вана пелькстамонь Гран-прись максозь Н. П. Огарёв лемсэ МГУ-нь филологиянь факультетэнь студенткантень, мокшавантень Дарья Шиндяйкинанень.

Конкурсонть анокстыцятне – «Юрхтава» вейсэндявксось ды Мордовиянь Культурань, раськень политикань ды архивень тевень министерствась.