Мария Андреевна Бочканова Кочкуровань райононь Кацялай велень клубонь прявтокс важоди малав 18 иеть. Арась истямо чи, зярдо бу авась а мелявтоволь эсь тевдензэ. Маряви, те дока аванть шказояк а эрсекшни таргамс оймензэ. Истят уш сынь – велень аватне, свал лакить тевсэ. Маштыть аволь ансяк скалонь потявтомо ды тикшень ледеме, теде башка, явить мель образованиянтень, культурантень, тонавтнить од технологиятнень, бажить а кадовомс удалов неень шкань од ломантнеде. Путыть ламо вийть сенень, штобу сынст тиринь вишка велинедест содавольть масторонть келес.
Неень вешематнень коряс эсь важодемань цетамотнень Мария Андреевна путни Интернетс, вети «ВКонтакте» ды «Одноклассники» социальной сеттнесэ «Сельский клуб села Качелай» кулялопат. Зярдо важодят истямо таркасо, свал эряви маштомс дивавтомс ломантнень кодамояк кулясо. Миньгак содавтынек те кулялопанть ды кадовинек покш мельспаросо.
Зярдо сынек инжекс Кацялаень велень клубов, Мария Андреевнань, кода свал, неинек лезэв тевень топавтомсто. Авась пурнась СВО-нь участниктненень гуманитарной лезкс марто посылкат. Те тевенть сон тейсь велень почтань отделениясо. Самай тей эрицятне кандыть минек боецтнэнь туртов весе эрявиксэнть. Ниле иень перть истят посылкатнеде кучозь малав сядошка. Кацялай велестэ мобилизованнойть арасельть, ансяк те велень эрицятне весе масторонть марто вейсэ ризныть минек цератнень кисэ, ды бажить вейсэнь тевсэ тенст лездамс.
– Чачома таркам – Кочкурвелесь. Тосо жо прядыя кемень классонь школанть. Эйкакшон яла кевкстнить эйсэнь: «Авай, тон мекс ансяк кемень классонь образованият, нать, панидизь 11-це классто?». Пейдян каршост, неень шкань од ломантне а чарькодить: икеле эрямось ульнесь лия. Аволь кода ней, гаджеттнэде башка мезеяк лангс а варштыть. Мельсэнек ульнесь строямс ояксчинь мастор, косо весе ломантне кармить эрямо вейке-вейкень вечкезь ды уличисэ (в достатке). Арсинек ванстомс колхозтнэнь ды велетнень… Ней жо те весемесь емась чельке потс, – корты Мария Андреевна.
Школанть прядомадо мейле Мария Бочканова тусь тонавтнеме Ицялонь райононь Кемлянь велень хозяйствань техникумов, косо кочкизе «Агрономия» специальностенть. Прядомадонзо мейле кучизь важодеме тиринь райононь Кацялай велев. Важодема таркась кармась Мария Андреевнань туртов вечкемань венчекс. Эдь самай Кацялай велень колхозсо важодемстэ сон вастызе вечкевикс ломанензэ. Од ломантне кувать шка эзть таргсе, налксесть свадьба. Чачсть кавто церынест. Шкась нармунекс ливтясь. Эйкакштне кассть-виевгадсть, эрявсь сынст тонавтомс, истя Мария Андреевнань мирдезэ колхозсто тусь важодеме чугункань килангов.
Тешкстама, Кацялай веленть малава юты чугункань кись. Зярдо-бути тесэ ульнесь натой станцияяк, ней жо кадовсь ансяк лотксема таркась, козонь оймсема читнестэ лоткси Пенза енов ардыця электричкась. Велень эрицятнестэ ламотне важодить те кинть лангсо. Неень шкас важоди Мария Андреевнань мирдезэяк. Церанзо жо эрить ды роботыть ошсо. Сонсь жо Мария Андреевна прянек-пильгенек чопавтсь культурантень. Авась ледстни, кода васенце шкастонть ульнесь стака, ней жо весементень тонадовсь. Важодемань иетнень перть Мария Андреевна ветясь тежат мельстуиця мероприятият, анокстакшнось сядошка выставкат. Ютазь иетнестэ эрицятнеде велесэнть ков седе ламольть. Ней жо од ломантнеде овсе эзть кадово, важодемс а кинь кисэ. Ды мероприятиятнеяк седе сеедьстэ ютавтовить онлайн вельде. А эдь ульнесть шкат, зярдо велесэнть зэрнесь музыкась, куринкатнева секе-тев яксесть гармония марто, морасть эрзянь мазый морот. Ней жо неть шкатне кадовсть лембе ледстнемакс.
Мария Андреевна тешксты, Кацялай велесэ ульнесь «Лейне» фольклорной ансамбляяк. Ансяк кавто иеде икеле сон каладсь, морсицятне сыредсть, одт тарказост эзть са. Авась кортамонь перть невтнесь тенек умонь фотот, конатнесэ снимазь Кацялайсэ ветязь мероприятиятне. Фототнестэ неинек тесэ чачозенть, Мордовиясо ды Самарасо содавикс ероков гармонистэнть Николай Анатольевич Титаренконь ды Мордовия Республикань заслуженной артистэнть Андрей Бочкановонь. Вадрят ульнесть шкатне. Истя жо фототнесэ снимазель Петр Иванович Автаевгак. Сонзэ сюпав биографиянзо содасызь республикань весе эрицятне. Петр Иванович содавикс депутатоль ды «Саранскмежрайгаз» АО-нь прявтоль.
Седе тов Мария Андреевна невтизе тенек велень музеенть, кона вана уш ламо иеть ашти клубонь нупальсэнть. Музеесь пурназель 2008 иестэ, зярдо Кочкуровань районось тешкстынзе 80 иензэ.
– Ялгацек ламо яксинек велень чаво кудотнева, пурнынек кезэрень шкань экспонатт. Нама, ламо мезе макссть сынсь велень эрицятне. Истя весе вейсэ теинек музей, ков эрьва кизна сакшныть ламо инжеть – ошсто сазь эйкакштне. Свал ветян тенст мельстуиця экскурсият, – евтни Мария Андреевна.
Музейсэнть ули мезе ванномс. Кода соват, лангозот чевтестэ ваныть Ине Отечественной войнань ветерантнэнь фотост. Сынст портретэст аштить чувтосто керсезь рамка потсо. Неть ломантнень ютксто минь сеске содынек морыцянть Андрей Бочкановонь аванзо ендо покштянзо, конась войнань шкатнестэ тюрсь фронтсо. Седе тов сельменек икелев понгсть Филатовтнень лавсест, пивтемпаресь, сянготне, муськемань лазтнэ, мекшень кундсематне – роевнятне, сувтеметне, севонень кринкатне, тумонь парнетне, викшнезь нардамотне ды ламо лиятне, конатне евтнить веленть историядонзо. Сехте мельстуиця экспонаттнэ, нама, чугункань кинть маласо аштиця седикелень станциянь ванстыцятнень фонарикест. Натой кавто ванстовсть. Неть фонартненень малав сядо иеть. Истят экспонатт ванстовсть ансяк Кацялаень ды Саранскоень музейтнесэ. Теде башка, музейсэнть улить зярыя умонь фотот ды веледенть сермадовкст, конатнень Мария Андреевна пурнынзе Кацялайсэ кувака пингень эрицятнень кедьстэ. Ансяк музеентень ды целанек ДК-нтень эряви паро ремонт. Ней сон ашти ве таркасо велень поселениянть ды почтанть марто!
Зярдо-бути Кацялай велесэ важодсть школа, эйдень кужо, училища; ульнесь вадря механизированной оборудования ды техника марто колхоз, пурназель механизаторонь виев бригада, ней жо те весемесь нардавсь, теке арасельгак. Кацялай велесь, кода ламо лия велетнеяк, ашти емамо лангсо. Ансяк зярс тосо эрить эсь велест кисэ мелявтыця-ризныця ломанть, конатнень вийсэ, паряк, Кацялаесь эште кувать карми эрямо.
Алена Артемьева
Фототне Егор Горинэнь.