Пятница, марта 29, 2024
Важное

Неть читнестэ Россиянь Президентэсь Владимир Путин Россиянь Героень лемень кандтницятненень казсь «Золотая Звезда» медальть. Сынст ютксо минек республикань Дубёнкань райононь Орданьбуе (Ардатово) велень цёрась, ВДВ-нь гвардейской десантно-штурмовой 76-це дивизиянь 175-це разведбатальононь разведвзводонь механикесь-водителесь ефрейторось Давид МАЛЫЙКИН.



«Давид свал маштыль путомо эстензэ аравтлув ды топавтомо сонзэ, – кортыть цёрадонть тиринь велень эрицятне. – Важодемань вечкиця, панжадо седей, ялгаксчинь кирдиця, свал невтнесь прянзо эсь классонь ды школань мероприятиятнесэ. Сонтемензэ эзь ютне спортонь вейкеяк пелькстамо».

2014 иень декабрясто Давид Малыйкин тердезель армияв. Службанть ютась Псковской дивизиясо ды сонзэ прядовомадо мейле сёрмадстсь контракт.
Те покш лемесь Давид Малыйкиннэнь максозь мужестванть ды героизманть кисэ, конанть невтизе специальной военной операциянть ютавтома шкасто.

«Тюрема шкасто леенть ютамсто гвардиянь ефрейторось Малыйкин Д. А., артиллериянть ды танктнень леднематнень пачк, пултась неонацисттнэнь кавто танкт ды медицинань лезксэнь максомадо мейле тюремань паксястонть ливтинзе ранязь кавксо ялганзо. Эсь апелемасо идизе техниканть ды десантной подразделениянь личной составонть» – кортави документсэнть.

«Мон покш каштанчисан те казненть коряс истямо покш чистэ. Кемевттядызь, монь боевой ялгатне, конатне ней передовойсэть, парсте чарькодить минек эйкакштнень сэтьме вандынь чист ванстомань ды идемань эрявиксчинть. Весе шкатнестэ минек покштятне-бабатне стильть масторонть ванстомо, эзть нолда ятонть, пансть сонзэ. Истямо а шожда шкасто минь, Россиянь воинтнэ, анокт кастомс масторонть виевчинзэ ды а визделгавтомс покштятнеде ледстнематнень.

Весе стакачитнень лангс апак вано, минь топавтсынек икеленек путозь задачатнень ды маштсынек нацистской заразанть, конась снартни явомс минек раськетнень ды полавтомс историянть. Изнямось карми минек марто!» – мерсь Давид Малыйкин Россиянь Президентэнтень ды пурнавозтненень пшкадемстэ. Неть валтнэнь ёвтамсто Давид аламос лотказевсь, ансяк залось кирдизе сонзэ виев цяпамосо. Владимир Путин жо мольсь ваксозонзо, токизе лавтовонзо ды лембестэ пшкадсь: «Тесэ весе эсенек!»

Медальтнень явшемась ульнесь Кремлёвской дворецсэ ды ютавтовсь Отечествань геройтнень чиденть икеле, конась Российской Федерациясо тешкстави декабрянь 9-це чистэ. Кенярксчинь промкссонть ульнесть 200 ламо военнойть ды гражданскойть, конатне невтизь эсь героизманть, теке марто Советской Союзонь Геройтне, Российской Федерациянь Геройтне ды Иневанькс Георгиень орденэнь кавалертнэ.

«Течи государственной покш наградатне явшевить военнослужащейтненень, конатне невтизь эсь апелемачинть специальной военной операциянть шкасто ды конатненень максозь Россиянь Героень лемесь. Ёвтан тенк покш сюкпря Отечествантень службанть кисэ, кемеманть кисэ, мезесь свал вейсэндясь Россиянть. Истя жо пшкадян сетненень, кить передовойсэть: монь туртов, минек весе эрицятнень туртов эрьвась эйстэнк – Герой. Ды арсян, тынь марясынк минек седейтнень лембечинть, ломантнень кемеманть ды лезксэнть», – тешкстызе Владимир Путин.

А весе содыть, торжественной церемониядонть мейле Россиянь Президентэсь таго мольсь Давид Малыйкинэнь ваксс ды мерсь мездеяк а мелявтомс ды а ризнэмс, эдь сонськак, комсь иень перть важодеманть лангс апак вано, истя жо талны.

Каземадонть мейле Малыйкиннэнь поздоровт телефон вельде ёвтась Мордовиянь Прявтось Артём Здунов. Сон мерсь: «Ёвтан Тенк поздоровт «Герой России» заслуженной званиянь максоманть кисэ. Героень чинтень алтазь мероприятиясонть минь ёвтынек поздоровт Геройтненень, тынк каземадонть карминек содамо торжественной церемониядонть икеле. Ули мелем ёвтамс: зярдо ванынек Кремлясто съёмкатнень, пек кенярдынек. Сюкпря каштанчинть кисэ, конань минь кирдтяно!»

Фотось саезь riamediabank.ru интернет-сайтстэ

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».