Четверг, марта 28, 2024
Важное

Июлень 30-це чистэ Нижней ёнксонь Лукояновабуесэ ютась «Эрзянь лисьмапря» регионъютконь эрзянь ды мокшонь раськень культурань фестивалесь. Тедеде сон мольсь 12-цеде.

Кода свал, инжетне пурнавсть секе таркасонть – Кельмелисьмалеень лисьмапрянть вакссо аштиця этнопарксонть.  Важодсь декоративно-прикладной творчествань ды ярсамопелень выставкась-ярмункась. Кедьчелькев ломантне невтнесть ды микшнесть эсь теевксэст, ульнесть зярыя мастерт минек республикастояк. Каванямотнень пидизь-панизь Лукояновань райононь велетнень аватне. Теде башка, весе сазь инжетнень каванясть пси ямдо ды тикшень чайде. Эйкакштнень туртов важодсть спортонь площадкатне, косо сынь налксесть ды пелькстасть.

Фестивалесь ушодовсь раськень штатолонь кирвазтемасо. Озксонть ютавтызь Александр Данильчев, Раиса Щанкина, Михаил Безаев, «Ламзурь» ансамблясь. Кедте-кедьс кундазь, вейсэнь кирькссэ ютасть кужованть ансамблятне ды весе, кинь ульнесь мелест.

– Те кенярксчись вейсэнди эрьва кодамо раськетнень, конат эрить минек моданть лангсо. Сюкпря весенень, кить састь кенярксчис – районтнэнень, шабра ёнксонь инжетненень. Кадык седе кувать эри минек мазый фестивалесь! – кортась  Лукояновабуень местной самоуправлениянь прявтось С. Н. Малышев.

– Ломантне кецнить истят вастовоматненень. Тесэ сынь седейшкава кортнить вейкест-вейкест марто, кунсолыть тиринь кельсэ морот. Паро, зярдо ванстовить коенек-кирданок, культурась. Те парсте редяви тынк ёнкссо, – кортась МР-нь Культурань, национальной политикань ды архивень тевень министрань васенце полавтыцясь А. И. Карьгин.

Пурнавозтнень туртов лембе вал марто пшкадекшнесть Нижней ёнксонь Лукояновабуень «Лисьмапря» эрзянь ды мокшонь национально-культурной автономиянь прявтось М. К. Голодова, Эрзянь ды мокшонь раськень Регионъютконь общественной вейсэндявксонь исполкомонь ответственной секретаресь Т. Т. Ширманкина, теке жо вейсэндявксонь членэсь, фестивалень ушодыцятнень эйстэ вейкесь – М. И. Безаев ды лият.

Седе тов концертэнть ушодызе «Ламзурь» фольклорной ансамблясь. Тей сакшнось Покш Игнатбуень «Пизёлнэ» народной ансамблясь. Сынь морасть С. М. Люлякинанень алтазь моро. Сцена лангс лиснесь Мордовиясо чачозесь Дарья Великанова, кона важоди Санкт-Петербургсо «Буфф» театрасо актрисакс.

Пек лембестэ вастозель Шандрова велень «Умарина» ансамблясь (ветицясь ды седицясь Е. Акулин). Сынь морызь Е. Самаркинэнь «Велинем» моронть. Истя жо сцена лангсо морасть Покш Болдинабуень Пикшня велень «Чилисемась», Сеченовань райононь Васильевка велень «Умаринась», Лукояновабуень Иванбиёнь «Родники» народной хорось, Пичингушинь «Эрзяночка» коллективесь ды лият.

Истя жо тей сакшность Гагинской райононь Какино велестэ «Ялгат» коллективесь ды «Ялгинеть» эйкакшонь ансамблятне. Светлана Андреевна Шумилова самай вети эйдень куронть.

– «Ялгинеть» коллективсэнть морсить минек школань малав весе эйкакштне, сындест ансяк 17. Школанок вейксэ иень, основной. Усксить тенек шабра велестэ. Весе рузт, кавтошка ансяк эйкакшт эрзянь семиясто. Морсетяно кенярксчитнестэ, школань покшчитнестэ. 2019 иестэ саезь велесэнек вельмевтинек «Овтонь каямо чи» кенярксчинть. Те – тундонь ильтямо, кизэнь вастома. Икеле сон ютыль Троицядо мейле недлястонть. Те чистэнть сёлтс ёртыльть ава ды экшелясть. Мон ледстнян, кода вишкинестэ те чистэнть валнынек вейке-вейкенек ведьсэ. Арсинек ютавтнемс сонзэ Троицянь субутасто, истя седе ламо ломанть пурнавить, весе сыть велев кенярксчив. Важодян школасо физикань ды математикань тонавтыцякс. Морсян культурань кудонть юрсо «Ялгат» ансамблясо (ветицясь Л. М. Старостина). Мартонок морсить тонавтыцят, микшниця, социальной роботник. Ризнэвти, киньгак юткстонок арась музыкальной образованиязо, тень лангс апак вано, ули покш меленек морсемс. Вечксынек «Колмо штатолт», «Эряк, мастор», «Сюк, сюк, ковава» моротнень. Тей сакшнотано эрьва ие. Лия районгаяк яксетяно морсеме. Оршамопельтнень зярыя иеде икеле тенек ставтынзе М. И. Безаев, сон – минек велень. Сюкпря тензэ! – мерсь С. А. Шумилова.

Ольга Серафимовна Балаева эрьва ие сакшны «Эрзянь лисьмапряв». Чачомань коряс сон – Кильдюш эрзянь велестэ. Ней эри Лукояновабуень Покш Маресьева рузонь велесэ. Важоди культурань кудосо художественной руководителекс. Течи сон каванясь инжетнень позань салведте. Пек тантей! Кевкстинек, кода теизь ды мезе тов каясть.

– Сон минек «фирменной», эсенек. Тозо каятано модамарть, куярт, алт, колбаса, чурька, копёр, велькс марто човорязь майонез. Те весемесь човоряви позасо. Весе истя тейнить. Ансяк минь эштё каятано помидор ды редиска! Панинек течи прякат – капстань, ягода марто. Шнатано прянок, ули симемань явавтыця пек тантей веденек – сон теезь базилик ды лимон марто. Сэнь базиликень тарадкетнень-лопатнень каямат банкас. Лангозост лаки ведь ды кирдема 20-30 минутат.  Мейле каяви лимононь сок эли лимононть керсема палнэс ды сахар. Човоряма. Лимононть каямодо мейле – несынк, кода ведень тюсось сельменк икеле сэньстэ тееви валдо якстерекс. Лиси тантей симемапель! Мереви каямс мятаяк, ды, бути ули – эй покольнеяк. Варчадо теемс тыньгак, – мерсь мизолдозь авась.

Омбоце ие, кода тусь эрямосто «Эрзянь лисьмапря» фестиваленть арсицясь ды ютавтыцясь Н. И. Аношкин. Сонзэ скульптуранзо те шкас аштить тесэ, мазылгавтыть тарканть. Ансяк сонсь азорось ней арась, а чийни инжетнень перька, а мелявты покшчинть кис. Маряви, этнопаркоськак чамсь сонтемензэ. Сон кортыль яла: «Мондень башка, тесэ киненьгак мезеяк а эряви». Кода несынек, эряви, те аволь истя, кенярксчинь ютавтомась поладови Нижней ёнксонь моданть лангсо, косо паро мельсэ вастневить тесэ эриця ламо раськетне.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».