Неть читнестэ Мордовия Республикась вастынзе Россиянь зярыя регионтнэстэ сисемзядто ламо инжетнень. Тувталокс тенень кармась Эрзянь-мокшонь раськень регионъютконь общественной вейсэндявксонь VIII-це Инекужонть ютавтомась.
Те промкссонть теевинек содавиксэкс Мария Викторовна Грибанова марто, кона сась инжекс Севастопольстэ. Те покш чинтень сон сась а ськамонзо – ялганзо марто. Весе сынь совить Севастополень «Ялгат» эрзянь-мокшонь раськетнень культурань вейсэндявксонтень. Сонзэ важодемазо моли Николай Николаевич Балашов прявтонть пшти вановтонзо ало. Те вейсэндявксонтень совить малав 500 эрзят ды мокшот. Эрьванть седейсэ пии-палы тиринь келентень ды раськентень вечкемась.
Тешкстама, те вейсэндявксонть лувсо важоди «Келуня» морокурось. Эйзэнзэ совить эрзянь-мокшонь кемень морыця аватне ды гармониясо ёроков налксицясь. Те морокуронтень сови минек героинясь Мария Викторовна Грибановаяк. Те шкинемань коллективсэнть сон морси вана уш кеветее иеть. Эряви меремс, Севастополень «Келуня» морокурось куш кодамо кенярксчинь свалшкань участник. Мария Викторовна тешксты, Мордовияв сынст коллективесь пачкодсь аволь васенцеде. Кемгавтово иеде икеле сынь сакшность Эрзянь-мокшонь раськенть Российской государствань лия раськетнень марто вейсэндявомань тёжа иетнень кенярксчинть тешкстамо. Сеть шкатнестэ саезь Мордовиясь салынзе неть ломантнень седеест. Секскак Инекужосонть важодеме сынь састь покш мельсэ. Кода корты Мария Викторовна, Мордовиясь инжетнень вастомга ды кенярксчинь теемга пек моли сонзэ тиринь Нижней Новгородонь областенть ёнов. Эдь самай те ёнксстонть ушодовитькак минек героинянть ундоксонзо.
– Чачома таркам – Нижней Новгородонь областень Лукоянов буень Од велесь. Тетям-авам эрзянь ломанть. Сюкпря тенст, кастымизь важодемадо а пелиця ломанекс, эдь сынськак свал лакасть тевсэ. Аюткошканть лангс апак вано, минек кудосо свал гайгильть эрзянь морот. Авам ды патям пек вечксть морамо. Мон свал кунсолынь эйсэст сельмень сявадозь ды эсь пачка арсилинь: вана седе касан ды монгак карман морамо. Истя лисськак. Школасо тонавтнемстэ вейкеяк кенярксчи а ютниль монтемень. Свал ульнесь мелем невтемс эсь ёрокчинть. Сцена лангсо морсилинь ансамблясо, лиясто ськамонгак. Меремс, морамонтень яван мель пингем перть. Школанть прядомадо мейле тонавтнинь Лукояновань А. М. Горький лемсэ педагогической училищасо. Ансяк тонавтыцякс эзинь карма. Советской шкатнестэ пек вечкилинь ловномо «Следователь» од ломанень журналонть. Арсян, тень кувалма саськак те мелесь – тонавтнемс юристэкс. Истя молинь тонавтнеме Казанень В.И.Ульянов-Ленин лемсэ государственной университетэв, косо прядыя «Юриспруденция» специальностенть. Тонавтнеманть прядомадо мейле од специалисттнэнь туртов макссть направленият. Монь кучимизь важодеме Севастополев. Сеть шкатнестэ ютасть малав 45 иеть, – мельспаросо ёвтни Мария Викторовна.
Важодемадонть башка, аванть эрямосо ули лия покш мельспарозо, те – малавиксэнзэ. Мирдензэ марто трясть-кастсть кавто боярава тейтерть. Мезесь дивавты, сыньгак тусть аваст киява. Кавонест важодить юристэкс. Тешкстама сеньгак, Мария Викторовнань покш нуцьказояк тонавтни те специальностенть коряс. Лисни, те юристэнь алкуксонь династия.
Фотось авторонть.
Алена Артемьева