Неень шкане республикань малав эрьва районсонть ули краеведениянь музей, косо невтеви райононть эрямозо меельце зярыя пингетнень перть, культурась, покштянок-бабанок койтне-кирдатне, тесэ неень шкась кеместэ сюлмавсь историянть марто. Эдь те весемесь – эрямо.
Отяжелень краеведениянь музеесь республикасонть сехте од. Сонензэ сы иень майстэ кармить комсь иеть. Районной музеенть туртов те аламо, эдь кой-конатненень 100, конатненень 70 иеть. Ансяк одчинть лангс апак вано, музеесь сюпав экспонатсо, сюпав сонзэ историязояк. Нама, содавтомс музей кодамояк районсо аволь эрьванть ули шказо. Секскак минь эсь ловныцятнень течи ютавтсынек Отяжелень райононь краеведениянь музеень залтнэва, содавтсынек экспонаттнэнь марто, ёвтнетяно музеев сынст кандомань историядонть. Лезды тенек теньсэ райононь краеведениянь музеень прявтось Галина Михайловна ЛЕБЕДЕВА.
– Отяжелесэ музеенть панжомадо меленть ёвтакшнызь Ине Отечественной войнань ветерантнэ, – ёвтни Галина Лебедева. – Васняяк сонзэ алов таркась явовкшнось аволь покшке. 2014 иестэ Отяжелесэ панжозель Раськень культурань центрась ды сонзэ юрсо явозель тарка музеенть алов. Тесэ миненек максовсть мик 526 кавонзазь метрат, конатнестэ 480 – экспозициянть алов. Истя жо ули фондтнэнь ванстома тарка. Экспонаттнэнь пурнамо эсь шкасто ушодокшность музеень арсицятне-панжицятне – мирдть-нить Василий Иванович ды Татьяна Ивановна Гордеевтне. Ды течи лововить малав 5 тёжат экспонатт. Ансяк тень лангс минь а лотксетяно, пурнатано весементь нейгак. Седе ламотнень кандыть музеев экскурсияв сыцятне. Весть сыть, ванносызь весементь, мейле велявтыть ды мартост мезеяк туить. Лиясто минськак велетнева якатано, мезеяк усктано. Минек музеенть юрсо ули эрзянь кудоюрт. Сонзэяк пештятано од экспонатто.
Отяжелень краеведениянь музеень экспозициясь ашти колмо залтнэсэ: «Этнографиянь», «Воинской Славань» ды «Историясь ды неень шкась».
Этнографиянь залсонть максови эрзянь кудопотмось ды невтевить минек покштятнень-бабатнень ремеслатне. Истя жо тесэ улить кедьёнкстнэ, конат невтить эрзянь-мокшонь ёнксонть эрямонзо XIX-XX-це пингетнестэ. Залганть якамсто несынек, кодамо ули-паро ульнесь сеть шкатнестэ кудотнесэ, кодат кедьёнкст тевс нолдавсть важодемстэ ды ярсамопелень пидемстэ-панемстэ, кодамо оршамосо якильть. Улить штердемань туртов пряхат, кодамонь стан, муськема очко. Неень шкань од ломантненень ды эйкакштненень те овсе а содавикс теевкст.
– Те залсонть покш каштанчикс минь ловтано таксидермиянь коллекциянть, косо лововить малав колоньгемень теевкст. Авторост – Андрей Васильевич Карпинчик. Андрей Васильевич ней уш ветеце ие кода тусь эрямостонть, ансяк сонзэ роботатне – покш казне минек музеенть туртов. Ломанесь сон ульнесь пек эрудированной, превей. Сон ульнесь I-це группань инвалид, ансяк те эзь лоткавто сонзэ теемс эсь роботатнень. Васенце нецяенть (чучело) – озязонть, теизе кемгавтово иесэ. Ды седе мейле ульнесть эрьва кодат ракшат, нармунть. Те курось пек тукшны эйкакштнень мельс. Секскак тесэ свал ютавтневить занятият. Эряви меремс, эйкакштнень марто аволь ансяк экскурсият ютавтнетяно. Минек улить образовательной программат, культурной нормативть. Пек ламо занятият эрсить сынст коряс. Важодемась ветяви эйдень кужосто ушодозь ды покш класстнэс. Эрьва группанть туртов эсест занятият. Ды седе ламонть бажатано максомс налксема вельде, – корты Галина Михайловна.
«Воинской Славань» залось, кода васняяк арсевськак, алтави войнатнесэ ды лия тюрематнесэ Отяжелень райононь эрицятнень улемантень. Экспозициясь ушодови Масторлангонь васенце войнастонть.
– Зярдо пурнынек те экспозициянть (2015-16 иетне), материалось пек аламоль. Ней ули мель эштё пурнамс. Эдь 2021 иестэ минь изнинек Президентэнь грант электронной базань тееманть лангс. Грантонь конкурсос анокстакшнынек «Помни обо мне, внук» проект. Сон нолдавсь тевс, ды пурнынек 2 тёжадо ламо ломаньс электронной база. Пурнынек материал, фотографият, документт. Те пек лезды важодемс электронной книганть коряс, – тешксты музеень прявтось.
Экспозициянь седе покш пельксэсь алтави Ине Отечественной войнантень. Кода ёвтнесь Галина Михайловна, ульнесть истят пачтямот, келя, Отяжелень районсто фронтов туекшнесть 15,5 тёжат ломанть. Ней жо ули списка, истятнэде ульнесть 20 тёжат ломанть. А те малав пелест эрицятне. Войнадо икеле районсонть лововсть малав 48 тёжат эрицят.
– 2014 иестэ, зярдо ушодынь важодеме, минек тесэ мольсь эштё стройка. Ды зярдо совинь те залонтень, васенцесь, мезенть превсэ неия – вана те ужиненть (угол), – Галина Лебедева невтни войнань шкань кудопотмонь экспозициянть лангс. – Музеесь эдь те аволь ансяк документт, фотографият, эштё те кедьёнкст, ули-паро. Ды те экспозициянть минь уш кавксо иень перть пельксэнь-пелькс пурнатано. Те вана трельяжонть эсензэ историязо. Алатырьстэ мирдть-нить вейке ие састь, омбоце, а мейле колмоцеде састь ды усксть мартост трельяж. Мекс ускизь? Мерсть, музеесь пек мелезэст тусь. Эштё вейке ава Саранскойстэ 50-це иетнень платият казсь. Вана те чемоданчикесь истя жо 50-це иетнень. Сонзэ вейке ломань кандызе, мерсь, авазо мартонзо Ивановав торфов ардтнесь. Сон те ужинентень истя жо пек ладясь. Кандсть ютазь пингень шкатулкат, духить. Минек арасель кисет. Стынек. Эдь эйкакштнень марто тесэ интерактивной занятият ютавтнетяно ды сыненст эряви весемеденть ёвтнемс, невтемс, штобу содавольть, кодамо те эли тона предметэсь, токшевлизь эсь кедьсэ. Эсенек райононь сывелень комбинатонть кедьстэ вешинь теемс пецька-буржуйка. Сондензэ истя жо эйкакштненень ёвтнетяно.
Райононть каштанчикс Галина Лебедева ёвтынзе Советской Союзонь Геройтнень, Отяжелень чачозтнень. Весемезэ 11 ломань. Райцентрань площадьсэ аштить сынст бюсттнэ, музейсэнть жо ули стенд, косо ёвтневи эрьванть эрямодонзо, подвигтензэ. Геройтнень коряс районось седе сюпавгак улевель. Поисковиктне эштё муизь сетнень, кить ёвтазельть Героень лементень, ансяк кодамо-бути тувталонь коряс те лемесь сыненст эзь максово. Те эштё ниле ломанть. Ютксост Иван Гусев, сон ней ламонень уш содавикс, ланганзо снимавсь фильма. 21 иесэ цёрась тейсь танконь васенце таран.
Истя жо те залсонть ёвтневи Афганонь войнадонть, косо чавовсть Отяжелень райононь ниле цёрат. Вейкесь эйстэст – Александр Живаев вертолётчикесь. Минек республикань чавовозтнень эйстэ сон васенце. 1980 иень февралень 13-це чистэ сонзэ вертолётось ледезель, весе экипажось чавовсь.
Те залсонть ули мезе ваномс, ули мезе невтемс эйкакштненень, ули мезес сынст тонавтомс, штобу улевельть алкуксонь патриотокс. Тесэ минек историясь, конань а эряви стувтнемс.
«Историясь ды неень шкась» залось алтави райононть касомантень-виевгадомантень, тесэнь содавикс ломантненень, неень шкань эрямонтень. Тесэ эряви ёвтамс, советской шкатнестэ районось гайгиль весе республиканть келес, свал васенцетнень ютксоль. Ульнесть кавто колхозт-миллионерт – Дюрькинань ды Аловелень хозяйстватне. Отяжеленть свалшкане ульнесь сюпавдояк сюпав культуразо, конась истя жо невтезь пек келейстэ. Теке залсонть башка тарка явозь «Степан Эрьзя – скульптор мира» экспозициянть алов, косо невтевить ине мастерэнть роботанзо копиятне.
Ды весе те сюпавчинть ванстыть ансяк колмо ломанть – прявтось Галина Михайловна Лебедева, кона музейсэ важоди 1990-це иестэ саезь. Ушодокшнось Орданьбуень краеведениянь музейсэ, косо 24 иеть макссь научной сотрудникень тевентень, ды 2014 иестэ саезь топавты прявтонь тевенть Отяжелень музейсэ. Фондтнэнь ванстыцякс важоди Светлана Анатольевна Тюрина ды смотрителекс Любовь Ивановна Лапшова.
Эрьвась эйстэст эсь тевень вечкиця алкуксонь специалистт, конатне маштыть важодеме. Ды бути ломанесь вестешка ульнесь тесэ экскурсиясо, аламо шкань ютазь велявты одс.
Вечкевикс ловныцят, тынк туртов те ульнесь экскурсия ёвтнемасо, минь жо мертяно молемс алкуксонь экскурсияс ды весементь неемс эсь сельмесэ.
Юлия Еремина