Неть читнестэ Кочкурбуень Вирь Тавлань В.И. Ромашкин лемсэ «Этно-кудо» музейсэнть вастсть инжеть. Тей сакшность Саранскоень «Надежда» эйкакшонь социальной приютонь ды Рузаевкань «Солнышко» социально-реабилитационной центрань эйкакштне. Сынст туртов ютасть спортонь пелькстамот ды мельстуиця экскурсия.
Кода карминек содамо, истят пелькстамотнень ютавты Павел Мигунов, кона вети «Тюштянь налксемат» клубонть.
– Эрзянь ды мокшонь раськень Инекужосонть улемстэ теевинь содавиксэкс Артем Коняшин марто, кона сакшнось Московонь «Мордовская диаспора» благотворительной фондонть пельде. Нама, евтнинь раськень налксематнеде, кода ды косо сынь ютыть, кода вечкевить эйкакштненень. Сон шнызе меленть – ардтнемс эйкакшонь кудотнева ды ютавтомс тосо спортонь пелькстамот, евтнемс минек сюпав койтнеде. Истя, те иенть ушодовомсто саезь ульнинь Темниковасо, Инсарсо, Краснослободскойсэ, Ельниксэ. Ардтнинь тов мастер-классонь невтеме ды налксемань ютавтомо, казнекс усксинь спортинвентарь. Сынст рамамс лезды Артем Коняшин. Лездамс эйкакшонь кудотненень – те сонзэ паро мелесь, – евтни Павел Мигунов.
Вирь Тавласо эйдетнень ды тонавтыцяст кши-сал марто вастызь Этно-кудонь азортнэ П.В. Рябов ды Р.В. Водясова. Васняяк ютавтсть вадря экскурсия. Эйкакштне тей понгсть васенцеде. Кудопотсонть экспонатт, ушосо – фольклоронь ды мифологиянь геройтнень чувтонь скульптурат.
– Минек пелькстамотнень улить лемест: «Сабанонь вий», «Ведявань суре», «Вирявань кольнемат», «Тюштянь тюрема», «Пурьгинепазонь ендолт». Эйкакштне пелькстыть пикс велькска кирнявтнемасо, палкань ускомасо, тодов марто тюремасо, тапарить суре, ертнить пеельть, леднить налсо ды седе тов. Васняяк толковаса тенст, мезе эряви теемс, кодат улить салавачить. Кие седе парсте ды эрязасто топавты, се изни. Весе казевить дипломсо ды медальсэ. Эйкакшонь кудотне-интернаттнэ свал покш мельсэ ютавтыть неть вастовоматнень. Мон жо пелькстамотнеде мейле вечкан ванномо фотографиятнень. Кодат уцяскавт эйсэст эйдетне! Пейдицят, ежост вадря, кенярксов! Кадык неть вастовоматне свалшкас кадовить оймезэст лембе ледстнемакс! – мерсь Павел Мигунов.
Пелькстамотнеде мейле эйкакштнень каванизь тол велькссэ пидезь ямдо ды тикшень чайде. Тонавтыцятне видькстасть, эйкакштнень туртов истят вастовоматне – алкуксонь кенярксчи.
Кода пачтясь П.В. Мигунов, седе тов арси ютавтомс Вирь Тавласо «Тюштянь пандозо – Йовлань Олонь янозо» пандопряс чиема. Изнить сетне, кить седе куроксто пачкодить пандопрянтень. Шкась тень туртов явови кавто част.
Татьяна Маторкина