Республикань велень хозяйствань предприятиятнесэ моли виев важодема. Аграрниктне нуить сюротнень. Зярс читне аштить манейть, эряви кенеремс пивсэмс паксятнень. Неть читнестэ пачколинек Отяжбуев. Тесэнь «Сабанчеевское» ООО-со минь свалшкань инжеть.

Тосонь прявтось, содавикс аграрникесь, Мордовиянь велень хозяйствань заслуженной роботникесь, Славань орденэнь кавто степентнень кавалерэсь Дмитрий Николаевич Игушкин зярдояк а моли каршо, бути яволявттано эсь самодонть. Сон свал тешксты, трудий ломантнеде эряви ёвтнемс.

Дмитрий Николаевич марто вастовинек предприятиянь конторасо. Сон ёвтнесь хозяйствасонть сюронь нуемань тевтнеде.

– Тедеде иень коряс сюрось чачсь аволь берянь. Озимой товзюрось гектарстонть невтсь косо-бути 40 центнерт, яровоеськак аволь седе аламо. Теке марто, эряви тешкстамс, те иестэ сюрось вадрячинь коряскак седе паро. Тесэ пси читнеяк лездасть, тевс нолдавиця технологиятнеяк, – ёвтнесь Дмитрий Николаевич. – Сюронть нуемасо важодить 13 комбайнат ды малав 15 автомашинат. Важодицятнень коряскак мелявкст арасть, улить од специалистэнекак, техникань паркоськак минек свал одкстомтови. Те иестэ раминек кавто од комбайнат. Вейкенть руль экшс озавтынек опыт марто комбайнёронть Пётр Иванович Учеваткинэнь. Хозяйствасонть истя жо комбайнёрокс роботы цёразо – Виталий Петрович. Тетят-цёрат кавонест важодить парсте. Свал пурныть сехте ламо сюро. Чинь невтемаст эрьванть малав сядо тоннат пивсэзь сюро. Сынст эйстэ а кадовить А. Ю. Аньчков, В.А. Какуркин, И. С. Кочурин, В.П. Федотов, А. Н. Мишайкин, А. М. Бакшайкин, Н. Д. Кажаев, Н. В. Козин, М. Ф. Удалов, А. С. Туров, В.М. Пшеничников. Цёратне пек вадрясто роботыть.

Кода тешкстызе Дмитрий Николаевич, штобу тинге лангсо сюрось аволь таштаво, эдь чизэнзэ нуеви малав тёжа тоннат, кодамо-бути пельксэнть пештить эсь утомтнес, кадовозенть ускить «Элеватор» ды «Элеком» предприятиятнес.

«Сабанчеевское» ООО-нь растениеводствань коряс прявтонь полавтыцянть Вера Сергеевна Кочуринань валонзо коряс, хозяйствасонть сюронть алов те иестэ явозь 6100 гектарт.

– Нуемась минек ушодовсь июлень 16-це чистэ. Ютазь иень коряс недлядо седе икеле. Озимой товзюронть коряс эрьва паксянть невтеманзо эсензэ – косо-бути малав 40 центнерт гектарсто, косо-бути 43 ды седе ламо. Сюрось коське, вадря, – корты Вера Сергеевна. – Паро, зярдо норовонть нуемстэ аштить пси чить. Сюронть костямонзо лангс шканть ёмавтнемс а эряви.

«Сабанчеевское» ООО-со озимой товзюронть пивсэманзо неть читнестэ прядызь. Аламодо икеле нуизь кснавонтькак. Сондензэ хозяйствасонть видезельть сядо гектарт. Гектарстонть саезь 30 центнерт. Ней кундасть яровой сюротнень нуемантень.

– Бути видестэ кортамс, те иень пертьпельксэнть коряс минек учоманок васня ульнесть овсе лият. Тундоськак экшель, пиземетькак арасельть. Кснавонтькак, озимой товзюронть коряскак невтематнень учинек седе вишкинеть. Алкукс жо сюрось чачсь овсе а берянь, – тешксты Вера Сергеевна. – Нама, ютазь иенть коряс норовонть а пурнатано. А мезть кортамс, ютазь иестэ невтематне ульнесть рекорднойть.

Сабанцеленть эйстэ ве ёно аштиця паксясонть мольсь виев важодема. Комбайнатне мельга-мельцек эсь жаткантень пурнасть ожолдыця колозтнэнь.

Комбайнёрось Алексей Юрьевич Аньчков – вадрясто важодицятнестэ вейкесь. Сюронь нуемасо важоди котоце ие. Лия шкастонть роботы коромонь урядамонь комбайнасо, погрузчиксэ. Тевсэ иензэ перть.
Алексей Аньчков эри Отяжелесэ, Сабанцелев эрьва чистэ ардтни. Хозяйствасонть важодемась тукшны сонзэ мельс. Варчнизе прянзо лия профессиясояк, механизаторонь тевесь кармась седе малавикс. Цёранть колмо образованиянзо, прядсь Н. П. Огарёв лемсэ МГУ-нь колмо факультетт: довузовской анокстамонь, светотехникань ды аграрной.

Эштё вейке комбайнёрось – Николай Дмитриевич Кажаев. «Сабанчеевское» ООО-со важоди весе эрямонзо перть – 1986 иестэ саезь.

– Мон – Таразбуень. Школасо тонавтнемстэ эштё карминь колхозсо роботамо. Сестэ комбайнёронь лездыцякскак ульнинь, тракторсо сокамо-изамо варчнинь, – ёвтни Николай Дмитриевич. – Школанть прядомадо мейле колмо иеть ютынь служба армиясо. Ды 1986 иестэ сынь тесэнь колхозов. Те шканть перть хозяйстванть лемезэ зярыяксть полавтневсь, мон жо яла тескан. Роботась мелень коряс, секс а туянгак. Хозяйствась минек вадря. Покш сюкпря Дмитрий Николаевич Игушкиннэнь, сон путы весе виензэ сонзэ ванстомга. Те ёнкссонть аштиця велень эрицятнень туртов предприятиясь – важодема таркань прявт максыця.

Кода тешкстызе Николай Кажаев, иензэ перть сон роботы тракторсо. Модатнень анокстамось, сюротнень видемась, телень перть фермасояк лезды, китненьгак ловонть эйстэ уряды. Весементь теи, ансяк вана сехте вечкевикс шказо – кизэсь, зярдо паксятнесэ кенери сюрось ды эсь комбайнасонть сон лиси нуеме.

– Те шканть пек вечкса. Пертьпельксэськак, мерят, полавтови, – тешксты Николай Дмитриевич. – Те комбайнасонть мон уш кемень иеть. Кода рамизь, озынь сонзэ руль экшс, те шкас роботан. Важодеманзо мельга пштистэ ванан, нуема шкантеньгак анокстан эйсэнзэ монсь. Техникась сон кода ломань, мель тензэ явомс эряви.
Кирилл Андреевич Мокшин хозяйствасонть од специалист. Важоди весемезэ омбоце ков. Сонзэ техникась – ведень усксема машинась, конась чинзэ перть дежури се паксясонть, косо нуить комбайнатне.
Од цёрась сонсь Орданьбуень, тонавтни тосонь медицинской колледжсэ. Кизэнь каникулатнестэ стяко шканть а ёмавтнемга сась важодеме велень хозяйствав.

– «Сабанчеевское» ООО-нть ланга карминь содамо ялган пельде. Сон пачтясь, кизэнь шкастонть тезэ свал саить од ломанть. Арсия, мекс бу а роботамс ярмакт, – корты Кирилл. – Машинасо ардтнемга праван улить ды ведень усксемась – тевесь а стака. Велень хозяйствасо важодемадонтькак карман содамо седе ламо.

Покш важодема ветяви аволь ансяк паксясо, тевтне лаказь лакить тинге лангсояк. Тедеде тесэ важодицятненень истя жо лездыть Сабанцелень школань тонавтницятне.

Сюротнень урядамонть марто истя жо хозяйствасонть моли сы иень сюротнень алов модатнень анокстамось – механизатортнэ сокить-изыть озимой товзюронть ды ламбамо якстерькаенть туртов модатнень, каить удобрениятнень. Сокамонь-изамонь тевтнесэ весемезэ важодить вете тракторт.

Вейкенть руль экшсэ хозяйствань механизаторось Владимир Иванович Учеваткин. «Сабанчеевское» ООО-со сон важоди уш ламо иень перть. Кода 1982 иестэ озась тракторонь руль экшс, те шкас те тевсэнть. Механизаторось видемань тевтнесэяк важоди, тень туртов модантькак соки-изы, фермасояк яла лезды. Куш кодамо тевсэ дока.

– Трактористтнэ хозяйствасонть эрьва кодамо тевсэ эрявикст, – кемексты Владимир Иванович. – Тунда прявт тевесь – видемась, конань эряви ютавтомс шкастонзо ды вадрясто. Кизэнь перть тикшень анокстамосо-усксемасо котьмат, сёксня модатнень эрявить сокамс-изамс озимойтнень видеманть алов, телень перть жо фермасо лезкс эряви: мезеяк ускомс, ванськавтомс. Лиякс меремс, тевтеме а аштетяно.

Зярдо сыргинек Сабанцелестэ, седеесь кенярдсь. Зярс велень хозяйствань предприятиятнесэ важодить истят трудий ломанть, ули кемема вандынь чинтень.

Юлия ЕРЕМИНА
Фототне Эдуард Ретунскиень