Сентябрянь 17-це чистэ Чувашиянь Порецкой райононь Алвелесэ (Напольное) ютась «В семье единой «Вместе – Перле» Эрзянь-мокшонь культурань чи. Кенярксчись мольсь Алвелень культурань кудонть вакссо, тей сакшность творческой коллективть республикань зярыя районтнэстэ – Алатырской, Батыревской, Ибресинской, Порецкой, Шемуршинской, Шумерлинской. Нама, ульнесть инжеть Мордовиястояк.
Лембе вал марто пурнавозтненень пшкадекшнесь Чувашиянь Культурань, раськетнень ды архивень тевтнень коряс министрась Светлана Каликова:
– Минь аштетяно каштанчисэ эрьва раськенть кувалма, конат эрить республикасонок. Сынст ютксо аволь аламо эрзят ды мокшот. Россиянь Раськетнень культурань сюпавчинь иестэнть Чувашиясо ютавтозельть ламо вастовомат ды покшчить, мельспаро тешкстамс, тосо ёрокчист невтизь эрзятнеяк ды мокшотнеяк. Ванстодо келенк, культуранк, кезэрень койтнень-кирдатнень!
Истя жо инжетненень пшкадсть Порецкой райононь администрациянь прявтось Евгений Лебедев, Чувашиянь Эрзянь ды мокшонь культурань центрань прявтось Владимир Седойкин ды лият.
– Эрзянь ды мокшонь культурань центрась важоди 30 иень перть. Сюкпря весенень, кить ушодсть тосо ветямо покш тевтнень. Нейгак поладовить минек раськень культуранть ванстомань коряс тевтне, – пачтясь «Эрзянь этнокультурной сюпавчинь ванстомань ды виевгавтомань фондонь» прявтось Татьяна Ларина.
В. П. Седойкинэнь валонзо коряс, Чувашиясо улить эрзянь зярыя творческой коллективть: «Эрзянка», «Килейне», «Лейне», «Умарина», «Горнипов», «Поречанка». Сынь невтнить концертт Россиянть келес, содавтыть ломантнень эрзянь ды мокшонь музыкальной культуранть марто.
Фестивальсэнть важодсть ламо площадкат: «Эрзянь кудоюр» – тесэ невтневсть этнографиянь ули-паротне; «Эрзянь аванть оршамонзо» – эрьвантень меревсь оршамс эрзянь паля, теемс фотот; «Перезвон талантов» таркасонть кедьчелькев ломантне ютавтсть крючоксо ды спицасо кодамонь, чувтосто керсемань, картинань теемань мастер-класст.
Саемга, Порецкой райононь Мурза велень авась Нина Акентьева усксь мартонзо суреть. «Мон уш 30 иень перть кодан спицасо ды крючоксо. Эрьва мезть кодсян куш кодамо сурестэ. Течи кедьсэнь кодазь малав сядо ули-парот. Творчествасон тевс нолдан эрзянь раськень тешкстнэнь. Течи ёвтнян мастер-классо кодамонь салавачитнеде, кода видестэ кирдемс крючоконть, кода сюлмамс суретнень, ловомс петелькатнень», – ёвтнесь эрзянь авась.
Сонзэ вакссо ашти Раиса Горбылева, кона чачсь Алвелесэ. Сон сась тей электропрялканзо марто:
– Ледстнян, эйкакшпингстэнь Алвелесэ эрьва кудосо аватне штердсть ревень понасто суре. Сырькайтне ды аватне тонавтсть тенень тейтерест. Минек кудосо прялкась ульнесь питнейдеяк питней сюпавчикс, эрявикс тевекс. Васенцеде варчинь штердеме нилешка иесэ. Ней вана штердян электропрялкасо, нама, седе шождасто ды куроксто штердеви суресь.
Истя жо те кенярксчисэнть невтезель «Одирьвань валске» мирденень лисемань-урьвакстомань эрзянь коесь. «Эрзянка» народной ансамблясь урнесь одирьвань урнемкат.
Вейсэнь покшчись прядовсь мельстуиця концертсэ, конань невтизь кавто республикань, Мордовиянь ды Чувашиянь артисттнэ.