Октябрянь 15-це чистэ саезь минек масторсо ушодовсь Эрицятнень весероссиянь сёрмадстомась. Сон карми молеме ковонь перть. Мордовиясо важодить 1445 сёрмадстыцят, конат якить кудова. Кода моли сёрмадстомась, кода седе шожда те тевенть теемс, миненек ёвтнесь Мордовиястатонь прявтось И.В. Парамонова.
– Эрьва ломанентень мереви ютамс сёрмадстоманть колмо ёнксонь коряс:
-Васенцесь, те зярдо сёрмадстыцясь сы тенк кудос.
-Омбоцесь, бути арась меленк совавтомс кудос сёрмадстыцянть, моледе тынсь кудонк маласо аштиця сёрмадстомань участкантень. Сынь кармить панжозь республикань весе МФЦ-тнесэ. Тосо ёвтнетядо эсь прядонк ды весе семиядонк.
-Колмоце ёнксось сехте паро, шожда ды куроксто теевиця. Те – ютамс сёрмадстоманть Госуслугань порталсо. Тосо улезэ стандартонь эли кемекстазь учётной записенк. Эряви совамс порталонтень телефонсто эли компьютерстэ. Панжомс «Ютамс эрицятнень сёрмадстоманть» невтеманть ды сёрмадомс электронной лопантень. Сёрмадстомс мереви эсь прянк ды весе семиянть. Мейле лепштямс «прядомс сёрмадстоманть» ды кучомс те конёвонть Росстатов. Зярыя секундань ютазь, сы код. Ниле ломань лангс – ниле кодт ды весе семиянть лангс – вейке QR-код. Неть кодтнэнь ванстынк. Зярдо сови тенк сёрмадстыцясь, невтинк, сон теи скан.
Минь тейтяно весементь, сёрмадстомась ютаволь зыянтомо. Сёрмадстыцятне кармить важодеме весе шканть перть, максозь оймсема читнестэяк. Чамасост – маскат, кедьсэст – сурварьгат. Минек важодицятне весе теевтсть прививкат. Эрьва недля ютыть пцр-тестт. Минздравонть марто кемекстынек тевконёв – сынь ёвтыть тенек, кодамо кудосо улить ковидсэ сэредицят, тов минь а мольтяно.
Эряви меремс, Росстатось регионтнэсэ эрьва чи вети сёрмадстомань коряс мониторинг. Истя, пецясто, октябрянь 22-це чистэ, Мордовиясь аштесь колмоце таркасо сеть регионтнэнь ютксо, конат ютасть сёрмадстома Госуслугань порталсо. Тосо сёрмадстызь пряст минек 16,5 % ломанть. И.В. Парамоновань валонзо коряс, седе паро ули ютамс сёрмадстоманть Госуслугань порталсо.
Татьяна Маторкина