Саранск ошонь округка Россиянь УМВД-нь 1 № ОП-нь дежурной частьс пшкадсь ошонь эйдень кужосо важодиця 25 иесэ воспитателесь ярмаконзо саламодо яволявтома марто.
Тейтересь евтнесь, неть читнестэ мессенджерс тензэ гайгстась а содавикс тейтерьава ды, цецянь микшнемань лавкасо сотрудницакс прянзо евтазь, мерсь цецяпусмонь пачтямодо, сонзэ саемга, сон вешсь евтамс тейтеренть телефонс СМС вельде сазь кодонть. Теде мейле зыянс понгозенть телефонс сась «Госуслугань» личной кабинетэзэнзэ аволь санкционированной совамодо пачтямо. Тейтересь сеске жо полавтызе порталсонть пароленть ды гайгстась тешкстазь сообщениясонть «пси линиянтень», косо тензэ пшкадсь буто Роскомнадзоронь сотрудник, конань марто тейтересь поладызе кортамонзо видеосвязь вельде. Седе тов те видеоконференцсвязентень вейсэндявсть «юрист» ды «следователь», сынь кемевтизь тейтеренть, буто мошенниктне сонзэ лемс анокстыть весе уликс счетстонзо ярмаконь саемадо доверенность, истя жо пачтясть, буто тейтеренть лангс панжови уголовной тев терроризмантень лездамонть кис. Неть весе тевтнень кардамга, сон нолдавтызе прянзо важодема таркасто ды банксо, кассирэнть кардамонзо мельс апак сае, саинзе счетсто 300 000 целковоензэ. Маласо аштиця сотовой связень салонсто тейтересь рамась 10,5 тежат целковоень питнесэ телефон, ладясь тозонь сим-карта ды сонензэ кучозь СМС ссылканть вельде совась приложенияс, косо вейсэндявсь конференциянтень. Кортамосо «правоохранительной органонь сотрудникесь» мерсь тензэ кадовозь ярмактнень кучомс «безопасной счетс». Маласо аштиця банкоматсо сон кучинзе аферисттнэнень 282 тежат целковоензэ. Теде мейле сонзэ марто кияк уш седе тов эзь корта.
Зярыя шкань ютазь сон чарькодсь, понгсь мошенниктнень алтымас, ды пшкадсь полицияв.
Мордовия Республикава МВД-сь кармавты ломантнень кадовомс валдо превсэ а содавикс ломань марто телефонсо кортамсто. Мельсэнк кирдеде: правоохранительной органонь алкуксонь сотрудниктне зярдояк а кармавтыть кучомс ярмаконк «безопасной счетс», а вешить телефонозонк кучозь СМС вельде кодаткак кодт. Бути тыненк гайневтить истямо вешема-кармавтома марто, сеске жо путынк трубканть ды тынсь гайгстадо эсенк банконь официальной службав эли «Госуслуги» порталс официальной сайтонь номерганть.