Августонь 13-це чистэ Отяжелень муниципальной райононь Андрей Первозванный лемсэ Кафедральной соборсо Ардатовань ды Атяшевань епископось Вениамин владыкась ютавтсь Пазонь литургия. Сон алтавсь Петроградской ды Гдовской митрополитэнть, священномученикенть Вениаминэнь лемензэ ледстямонтень.
Владыканть тезоименитствань чистэнть мартонзо служамо ды сонензэ поздоровонь ёвтамо сакшность: Канашской ды Беловолжской епископось Стефан, Алатырской ды Порецкой епископось Феодор, Ардатовань ды Атяшевань церковной округонь благочиннойтне ды духовенствась.
Рана валске Отяжелень куншкакуросо, Андрей Первозванный лемсэ Кафедральной соборонть перька, пурнавкшность ламо ломанть. Сынь седейшкава учость Архипастыренть. Те мазый таркантень сакшность аволь ансяк те ёнксонь эрицятне, истя жо ульнесть инжеть Орданьбуень, Дубёнкань, Покш Березникень ды ламо лия районтнэстэ, Саранскойстэ ды мик Санкт-Петербургсто.
Епископонть вастсть эрзянь коенть ванстозь: кши-сал марто. Соборонть совамо таркасонть видестэ ды мазыйстэ аштесть кадеттнэ. Отяжелень васенце номер школасо тонавтниця тейтерькатне владыкантень ёвтнесть стихотвореният, Пазнэнь кемицятне казсть тензэ цецят.
Пазонь литургиясь ютавтовсь, кода кортыть, вейке лекстямосо. Пастырень валонть ёвтамодо мейле ушодовсть Вениамин епископонтень поздоровонь ды сюкпрянь валонь ёвтамотне. Эдь ули мезень кисэ!
Ледстясынек, Вениамин владыкась Ардатовань ды Атяшевань епархиясо служи кемень иеде ламо шкань перть. Те шкас сонензэ эзть стувтово кенярксчитне, зярдо Московонь ды весе Русень Кирилл Патриархось 2011 иень тунда баславизе Ардатовань ды Атяшевань епархиянь прявтокс. Теде икеле Вениамин игуменэсь (Кириллов) ульнесь Саранской епархиянь клирикекс, Чуфаровань цёрань монастырень наместникекс. Теке жо иень октябрясто Ардатовань ды Атяшевань епархиясь совавтозель Мордовиянь Митрополияс. 2011 иестэ Покровонь кенярксчистэ Московонь Христа Спасителень храмсо ютавтозель хиротониясь Вениамин архимандритэнть лемс.
Вана уш кемень иеде ламо шкань перть владыкась служи республикань кото районтнэсэ: Отяжелень, Орданьбуень, Чаунзань, Покш Игнатовань, Дубёнкань, Покш Березникень. Сонзэ покш путовксозо од ломантнень патриотизмань лувсо кастомасонть, сыретненень лезксэнь максомасонть.
Минь тиринь газетань лопатнесэ аволь весть пачтинек ловныцянок туртов сонзэ бажамонзо вельде од ломантнень ютксо эрьва кодат пелькстамотнень ютавтомадо: волейболонь, футболонь, хоккеень ды ламо лия тевень коряс.
Ледстясынек, Вениамин владыканть чанстямонзо ды ярмаксо лездамонзо вельде те иень тунда Чаунзань райононь Комсомольской посёлкань «Комсомольская ДЮСШ» МБОУ-нь ДОД-со ютавтовсь республиканской турнир кедьвиень тюремань коряс, конась алтавсь иневанькс праведной воинэнть Феодор Ушаковонь лемензэ кундамонтень ды Ине Изнямонь 77 иетнень тешкстамонтень. Эряви меремс, Вениамин владыкась – Мордовия Республикань Рукопашной боень федерациянь президент. Сонзэ бажамонзо вельде неть пелькстамотне теевсть регионъютконь. Минек республикав кармасть сакшномо командат Мордовиянь томбальдеяк: Ульяновской, Нижегородской ды лия областтнестэ.
Владыкась кеме сюлмот кирди эйдень кужов якицятнень, вузсо ды школасо тонавтницятнень марто. Сеедьстэ сонензэ инжекс сакшныть врачт, экологт ды ламо лия профессиянь топавтыцят. Сонзэ лезксэнзэ вельде пурназель «Доброволец» православиянь вейсэндявксось, Ардатовань медицинань колледженть юрсо теезь «Милосердие», «Волонтёрт-медикть» группатне.
Ардатовань ды Атяшевань епархиянть юрсо сеедьстэ ютавтнить образовательной ловномат, конат алтавить Симферополень ды Крымень иневанькс Лука просветителенть лемс. Ламо ломанть ёвтыть сюкпрянь валт Чаунзань Михайло-Архангельской храмсонть ды Епархиянь управлениясо гуманитарной лезксэнь складонть панжоманзо кисэ, косо нужасо эрицятненень максови гуманитарной лезкс. Истя жо покш лезкс максови сеть ломантненень, кить вастовсть эрямонь апак учонь стакачи марто.
Кемень иень перть Вениамин владыканть важодеманзо вельде Ардатовань ды Атяшевань епархиясо одс стявтозельть ды вельмевтезельть комсте ламо храмт. Аволь умок путозь ушодкс Отяжелень Каменка велесэ икелень клубонть храмокс теемань коряс, косо службанть ветить отец Евгений (Самаркин) ды отец Василий.
Владыкась свал покш мель яви правань ванстыця органонь сотрудниктненень. Васняяк сетненень, кить службаст кандыть «пси» точкатнесэ. Аволь вишка мель яви армияв служамо туицятненень, Донбассов спецоперациянтень сыргицятненень.
Лиясто ванат владыканть лангс ды арсезеват: косто сон амольди зняро вийть? Эдь те оймамонь а содыця ломаненть эрьва чистэ учить ламо тевть, конатнень вельде сон служи Пазонтень ды весе сеть ломантненень, кить пельдензэ учить лембе валт, оймавтыця превс путомат неень а шожда шкастонть. Нать, а стяко Ангелэнь тешкстамонь чистэнзэ истя ламо ялгат састь тензэ поздоровонь ёвтамо, паронь арсемань валонь каземе. Владыкась эсь ёндо весень каванинзе ликшань кашадо ды тантей прякадо.
Теде башка, кенярксчис сыцятненень анокстазель мельстуиця концертэнь программа, косо ёрокчист невтизь Мордовия Республикань Государственной филармониянь артисттнэ ды инжетне.
Валентина ЮДИНА