Ноябрянь 23-25-це читнестэ Мордовиясо ютавтовсь предпринимателень регионъютконь инекужось. Минек республикав сакшность бизнесэнь ветицят Московсто, Саратовасто, Нижней Новгородсто, Пензасто, Смоленскойстэ ды Сургутсто. Колмо чинь перть инжетне содавтовсть Мордовиянь бизнес-климатонть марто.

Те мероприятиянть анокстыцятнестэ вейкесь – Мордовия Республикань Государственной Собраниясь. Эйсэнзэ мольсь кортамо регионтнэсэ предпринимательтнень деловой активностенть кепедемадо, сынст коряс нормативной правовой базанть кемекстамодо. Мордовиянть туртов те эрявикс тев. Те тувталонть коряс республикасонок кемекстазь ды совавтовить эрямос предпринимательтненень лезксэнь максомань мератне. Невтемакс, совавтовсть полавтомат налогонь законодательствантень.

Тешкстазель, бизнесэнть туртов неень шкане сехте эрявиксэсь – санкциятнесэ колазь промышленной цепочканть вельмевтемась, сеть таркатнесэ, конат чамсть ушодомс нолдамо эсенек продукция.

Кода мерсь МР-нь Госсобраниянь Председателесь Владимир Чибиркин, бизнес-туронь участниктнень марто кортамсто, вейке-вейкень маринек.

– Тосо ёвтазь лезэв превс путоматнень карматано нолдамо предпринимательтнень марто вейсэнь важодемантень. Васняяк, властень органтнэнь ды общественностенть марто, кода эсенек республикасо, истя жо виевгавтсынек лия регионтнэсэ раськеютконь экономической сюлмотнень, – мерсь Владимир Васильевич.

Инжетне Мордовиясо улемстэ якасть республикань содавикс предприятиятнес, путсть покш питне сенень, кода ютыть тосо тевтне.

Владимир Чибиркинэнь вановтонзо коряс, лия регионтнэстэ сыцятне редизь се сатышка меленть, конань Мордовиясо явить бизнесэнь ветицятненень, сынст проектэст эрямос совавтомантень. Сехте эрявиксэсь те мероприятиясонть вейке-вейкень пельде тонавтнемась ды весе лезэвенть эрьванть эсензэ таркасо тевс нолдамось.