Четверг, марта 28, 2024
Важное

Чаунзань муниципальной райононь эрзянь кезэрень Покш Эрьмезёнка веленть моданзо сравтовсть Аморда леенть малава. Саранскоенть эйстэ сон ашти овсе маласо, колоньгемень вете вайгельпень туросо.

2001 иень ловоматнень коряс, тесэ эрицятнеде ульнесть малав ветесядт, коллективизациянь иетнестэ жо вейке тёжадо цють седе ламо. Энциклопедиянь пачтямотнень коряс, те велесь совакшнось Пензань губерниянь Алатырень уездэнтень, ды васенце кулятне эйстэдензэ вастневить 1869 иестэ саезь.

Самай те таркастонть саи ушодкс Ботайкинтнэнь кезэрень раськесь. Аволь умок прась уцяска теевемс содавиксэкс сынст раськенть эйстэ вейкенть марто. Те – «Ремезёнское» ООО-нь прявтось, «ООО МАПО и К» ТНВ-нь генеральной директоронь полавтыцясь Александр Борисович Ботайкин.

Тешкстасынек, Александр Борисович аволь весть кочкавкшнось Покш Эрьмезёнка велень поселениянь советэнь депутатокс. Ней вана сайсь мель улемс Чаунзань муниципальной райононь советэнь депутатокс. Те эрзянь цёрась ламо теи тиринь велензэ ванстомга, тосо эрицятнень коряс мелявтомга. Ледстясынек, сонензэ аволь весть пшкалесть сынст велень эрицятне эрьва кодамо энялдома марто. Невтемакс, китнень паролгавтомга, апак учонь тевтнень коряс лездамга ды истя седе тов.
Велеванть ютазь, ломантнень марто кортазь, васняяк сельмс каявсь, тесэ эри ды важоди истямо прявт, конась арси, мезе карми улеме ванды веленть марто. Александр Борисович седеень ризнэзь ды покш мелявкс марто пачтясь школаст аволь пек умок пекстамодо…

Культурань кудонть ланга ёвтнемстэ чамазо сеске валдоми, эдь тов якить од ломантне, тосо зярс ютавтовить кенярксчить. Сехте эрявиксэсь тесэ – ули виев ды эрязасто важодиця кеме хозяйства, косо трявить ракшат ды кастови паро урожай.

– Александр Борисович, инескеть, пачтядо аламошка эсенк ланга, ёвтнеде ундокстонк.

– Чачома-касома велем – Покш Эрьмезёнкась. Тесэ эрясть покштям-бабам, тесэ пингень перть «Победа» икелень хозяйствасонть важодсть тетям-авам. Вишка пингень ледстнематнестэ те шкас кадовсть сеть читне, кода вейсэ тетянь Борис Петрович марто тундосто саезь сёксес важодинь паксянь тевтнесэ. Эштё школавгак эзинь туекшне, а вана покш мелем озамс тетянь тракторс, комбайнас свал ульнесь. Малав весе эйкакшпингем ютась видемань ды сюронь урядамонь тевтнесэ. Нать, а стяко школанть прядомадо мейле кадовинь эсенек хозяйствас важодеме, теке шкасто колмо ковт тонавтнинь ДОСААФ-со. Мейле саимизь армияв, масторонть икеле долгом топавтыя Московсо. Кавто иень ютазь велявтынь тиринь Мордовияв ды ушодынь тонавтнеме Н.П. Огарёв лемсэ Мордовской государственной университетэнь велень хозяйствань факультетсэ «агрономия» специальностенть коряс.
Вузсо тонавтнемань шкась савсь перестройкань стака иетненень (1990-1995). Юткошкам тагояк ютнесь велесэ, малавиксэнь туртов лездамосо.
Важодемань кинть ушодыя теске, тиринь таркасо. Васня ульнинь специальностень коряс агрономокс, мейле – механикекс. 2005 иестэ саезь роботан «Ремезёнское» ООО-нь прявтокс, «ООО МАПО и К» ТНВ-нь управляющеень полавтыцякс.

– Александр Борисович, ёвтнеде нурькинестэ коллективденк ды кить сехте виевстэ важодсть видемань шкастонть.

– Течи «Ремезёнское» ООО-со 57 важодицят. Тешкстаса, малав весе сынь прок вейке семия, путызь виест шкастонзо видематнень прядомантень. Сюкпрянь валт парсте важодеманть кисэ ёвтатано трактористэнтень-механикентень Александр Николаевич Короковнень. Седейшкава тевест топавтсть тетят-цёрат Олег Анатольевич ды Дмитрий Олегович Наумкинтнэ. Тешкстаса, Дмитрий Наумкин ды сонзэ ялгазо Андрей Алексин ве шкасто прядызь университетэст, ды армиясо служамодо мейле од специалисттнэ састь важодеме минек хозяйствантень. Кавонест цёратне чинек-венек паксясот, весе виест ды содамочист максыть вейсэнь тевенть парсте топавтомантень.
Башка тешкстасынь важодицятнень: Александр Николаевич Коробковонь, Евгений Васильевич Прокинэнь, сыненст видьмекстнэнь усксицянть Александр Николаевич Акимовонь. Неень шкане хозяйствасонок юты видезенть гербицидсэ валномась, зыянтнэде сынст ванстомась ды сатышка удобрениясо андомась. Те тевенть топавтыть Евгений Васильевич Прокин, Сергей Платонович Паркин, Сергей Порфирьевич Акимов, Владимир Иванович Акимов, Николай Парчайкин.

– Неень шкане ули-арась сатышка техниканк ды косто седе сеедьстэ сонзэ раматадо?

– Ёвтаса видьстэ, минь бажатано рамамс седе ламо эсенек масторонь техника. Омбо масторонсентень яжавомстонзо рамама пек питней пелькст (запчастть). Теке марто эсенек техникань теицятненень эряви лездамс сынст производстваст кирдемс. Неть читнестэ ветятано кортамот «Росагролизинг» акционерной обществанть марто.
Минек хозяйствасонть ули сатышка техника видемань тевтнень ютавтомс, моданть кавшакавтомс, тикшень ледемс ды урожаенть паксясто шкастонзо урядамс. Неень шкане видемань моданок сравтовсть 2 тёжат 151 гектар лангсо.

– Ракшатнень коряс кода ютыть тевтне тынк хозяйствасо?

– Минек «Ремезенское» ООО-со неень шкане весемезэ 1060 прят, потявтовиця скалтнэде юткстост – 356. Сынст туртов свал анокстатано теле лангс сатышка кором, эдь теде ашти ловсонть ламочизэ. Виде, аволь умок хозяйствасонок стявтозь ракшань кирдемс паро кардот, эйзэст аравтозь неень шкантень ладиця од оборудования. Вана неть читнестэ ракшатнень ютавтынек кизэнь калдас, тосо карми тенст седе ламо вадря кором. Эдь тундось кенярдовтымизь паро пертьпелькссэ: ульнесть пиземеть, мейле ламо лембе чить. Тикшесь кассь эрязасто.

– Александр Борисович, васень шкасто важодеме ушодомсто кить ульнесть тонавтыцянк, превс путыцянк?

– Виде, вузонь прядомадо мейле эрьва од специалистэнтень эряви эштё тонавтнемс сенень, кода седе лезэвстэ тевс нолдамс содамочитнень, тонавтнема алкукс важодеме. Монень прась уцяска важодемань пингем ушодомс тевензэ парсте содыця, кадратнень марто важодеме маштыця ломань марто. Те – «Победа» икелень колхозонь прявтось Николай Владимирович Кедяров. Сонзэ марто важодемань сюлмотнень поладтано те шкас. Истя жо покш сюкпря ёвтан «ООО МАПО и К» ТНВ-нь управляющеентень Николай Всеволодович Ютяевнень. Сон лезды тенек велень хозяйствань предприятиянть виевгавтомасо кода тевсэ, истя превс путомань валсо.

Текенень поладса, монь ды ялаксом, Алексей Борисовичень, обуцятнень кемекстамосо покш путовксост тетянь-авань Борис Петровичень ды Клавдия Степановнань. Тешкстаса, авам ды ялаксом эрить теске, тиринь велесэнек, вейке ульцясо ды мик шабрацек.
Вана истя, самай Ботайкинтнэнь кондятнэнь вийсэ-превсэ кирдевить велетне, максови тев аволь ансяк тосо эрицятненень, истя жо ве ёндо сыцятнененьгак.

Ине Отечественной войнань шкасто Чаунзань райононь Покш Эрьмезёнка велестэ масторонть идеме туекшнесть малав кавтосядт ломанть. Сынст валдо лемест ледстнемга те веленть куншкакуросо стявтозь покш, мазый кеврунго, козонь сёрмадозь весе маштовозтнень лемест. Те ине тевенть топавтомасо покш путовксост те велень эрицятнень – мирденть-нинть Николай Владимирович ды Галина Николаевна Кедяровтнень, «Ремезёнское» ООО-нь прявтонть Александр Борисович Ботайкинэнь. Тешкстасынек, Кедяровтне аволь ансяк лездасть стявтомс-кепедемс те кеврунгонть, сынь саизь эсест лангс сонзэ мельга якамонть, перьканзо тарканть ваньксстэ свал кирдеманть.
Текенень поладсынек, кеврунгонть перька таркась чопода шкане валдомтови электричестванть вельде. Нама, тень туртов ды лия тевтнень топавтомс путовить ламо вийть ды шка.

Валентина Юдина
Фототне Эдуард Ретунскиень
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».