Те чевте седей тейтерентень те иень апрельстэ, Муниципальной важодицянь чистэнть, максозель «Лучший муниципальный служащий Республики Мордовия» лемесь. Сон изнясь «Организационное правовое обеспечение» номинациясонть. Конкуренциясь покшоль, ансяк весень ютксто кочкизь Наталья Вадяевань: «Пек кецинь, зярдо тень макссть покш казне. Васенцеде варчия прям истямо покш конкурссо. Кенярдан, важодемам тешкстызь. Паряк, те секс, мекс весе тевтне миненек велявтыть мекев: теят паро тев, тонетькак парось сы кавонзазь. А стяко эрзянь валмеревксэсь корты: «Паро теят – паро неят».
Ошонь администрациясо важодемась веши ламо вийть ды цидярдомачи. Тесэ малав эрьва чистэ ванкшновить а шожда кевкстемат, конань лангс эряви видестэ муемс каршо валт ды куроксто максомс лезкс эрицятнень туртов. Ды бути важодемась вечкевикс, кодаткак стакачитне а тандавтыть. Вана истя, ломанень вечкезь ды кодамояк роботадо апак пеле важоди Наталья Геннадьевна Вадяева.
Те ёроков од тейтересь кенери эрьва ков. Наталья Геннадьевна важодеме кармась 2011 иестэ саезь, зярдо эштё тонавтнесь Н. П. Огарёв лемсэ МГУ-нь Историко-социологической институтсо. Университетэнть прядомадо мейле вейке ие важодсь соцзащитасо. Тосто тердизь Ленинской местной отделениянь «Единая Россия» Мордовиянь местной отделениянь Весероссиянь политической партияв. Ней сон сисемеце ие – «Единая Россия» партиянь Ленинской райононь местной отделениянь Секретарень полавтыця ды нилеце ие кода Саранскоень Ленинской райононь администрациянь прявтонь полавтыця – Организационно-правовой отделэнь прявт. Теде башка, сови «Союз женщин Мордовии» общественной организациянтень ды «Добро-13» благотворительной вейсэндявксонтень. СВО-нь участниктнень туртов «Мордовия-Z» группань волонтёртнэнь марто яки алтымань кодамо.
Наталья Геннадьевнанень сыть эрицятнень весе энялдомаст. Сехте сеедьстэ, те – ЖКХ-нь коряс кевкстематне, домкомтнень марто вастневематне. Ютавтови покш важодема ды ветявить кортамот сеть семиятнень марто, конатне аштить учётсо иредстиця симемапелень коряс ды а ваныть эйкакшост мельга.
Истя жо администрациянть тевс сови ошонь ульцянь читнень ютавтомась, Ошонь чинтень анокстамось, Изнямонь чинтень ды Од иентень ошонь ульцятнень мазылгавтомась. Тунда ютавтневить субботникть ды «Чистый город» акциясь. Октябрясто тешкстыть Сыре ломанень ковонть.
«Нама, ней администрациянть важодемасо сехте эрявикс ёнксось – СВО-нь семиятнень марто сюлмотнень кирдемась, штобу ломантне авольть маря пряст кадозекс. Эдь аволь ансяк эйкакштне, истя жо сыре аватнеяк ськамост кадовсть. Ветяви вейсэнь важодема «Защитники Отечества» фондонь филиалонть марто, ды максови эрьва кодамо лезкс СВО-нь семиятнень туртов. Вана а умок лездынек частной кудос ветямс ведь, чувомс канализация. Азорось тусь СВО-в, лия покш цёрат кудосонть арасть ды семиясь сась истямо энялдома марто. Минь сюлмавинек Горводоканалонть марто ды топавтынек энялдоманть. Лиясто кинень-бути эряви допрок а покш тев – ведень кранонть витемс, электрической уське ветямс… Ве валсо, истят тевтнесэ, косо эряви цёрань кедь, минь бажатано лездамс эрьва мейсэ. Мукшнотано ломанть, конат топавтсызь неть тевтнень, – ёвтни Наталья Геннадьевна. – Лиясто истя малавгадат семиятнень марто, натой, ушодтано мартост кирдеме ялгаксчи.
Наталья Геннадьевна тешкстась, кадык кенкшензэ лангсо сёрмадозьгак сонензэ сакшномань читне, ансяк бути ломантнень улить кевкстемаст, кенкшезэ свал панжадо весенень куш кодамо шкасто: «Мезе вийсэнь, свал лездан. Важодемам пек вечкса. Монь арась истямо – чись ютась ды паро. Монень эряви неемс паро результат. Лиясто, зярдо лездат ломанентень ды весемесь тееви парсте, прок сёлмот касыть кутьмерезэть. Содат, ломанесь кедьстэть туи паро ёжосо».
– Наталья Геннадьевна, кодат мероприятият Ленинской администрациясь ютавтсь меельце шкастонть?
– Минек важодеманок пек мельстуиця ды саи эрямонь ламо ёнкст. Эйкакшсто саезь – пенсионерс. Вана а умок, августонь 15-це чистэ, Поповонь ульцянь 49-це № кудонть икеле ютась куронь праздник. Марявсть эйкакшонь кенярксов вайгельть ды покштнень седейшкавань кортнемат. Казнекс эрицятнень туртов кармась Саранскоень Культурань Кудонь артисттнэнь концертэст.
А умок Ленинской райононь отделениянь «Единая Россия» партиянть марто «Женщины за жизнь» благотворительной фондось тейсь проект – «Здравствуй, мама!». Августсто Ленинской райононь администрациянь покш залсонть явшезельть ламо эйкакшонь триця аватненень ды СВО-нь семиятненень аволь умок чачтозь эйкакштнень туртов казнеть.
Апак лотксе важодтяно сыре ломантнень мартояк. Минек администрациянь кудосонть улить «Совет ветеранов Ленинского района» ды «Городской совет ветеранов». Мартост юты важодема иень перть, аволь ансяк октябрясто. Сынь сынськак теить ламо тев. Саемга, сыргить кодамояк спортивной соревнованияс эли анокстыть музеень конкурсос. Вана а умок якинек поздоровонь ёвтамо Ине Отечественной войнань ветеранонтень, тылэнь важодицянтень Василий Григорьевич Шеяновнень. Сонензэ топодсть 90 иеть. Василий Григорьевич – философиянь наукань доктор, важодсь Н. П. Огарев лемсэ МГУ-нь Правоведениянь кафедрасо 55 иеть.
Неть читнестэ Ленинской администрациясь «Минь вейсэ!» од ломанень фестивалентень ванськавтсь ды мазылгавтсь ульцятнень ды площадтнень. Кой-кува тееельть витнемань-петнемань тевть.
– Наталья Геннадьевна, ёвтнеде эсь семиядонк, косо чачиде-касыде?
– Мон чачинь Отяжелень райононь Цёлпанова эрзянь велесэ. Семиясо эйкакшось ульнинь ськамон. Велесь ней уш аволь истямо покш, кода ульнесь икеле, косояк кавтосядт эрицят кадовсть. Тетям важодсь автобусонь ветницякс – шабра регионс усксесь робочейть. Сон уш колмо иеть кода арась. Тетям пек вадряль, монь тонавтсь свал кадовомс ломанекс, кодамо бу покш тарка эрямосонть аволинь сае. Мернесь, мейсэ маштат, свал лездак лиятненень.
Авам важодсь школасо начальной классонь тонавтыцякс. Ней сон пенсиясо. Ансяк лиясто шабратне нуцькаст ветнить тензэ тонавтнеме. Сон паро мельсэ мартост важоди. Кадык школасто умок тусь, ансяк профессиясь кадовсь оймезэнзэ.
Пек вечкса тиринь велем, свал бажан тей самс. Тосо истямо мазый пертьпельксэсь! Сан тов ды седеемгак, рунгомгак ливчакадыть, оймсевить. Вечкан вирьга якамо, тикшень-пангонь кочкамо.
Ошсо ютко шкасто якан спортзалов. Седе икелень шкатнестэ пазават човалясто викшнинь. Те тевесь пек оймавты ды кази паро ёжо. Мон яла кортан, чисэнть-весэнть 24 част, улезэ ансяк мель, кенерят эрьва ков.
– Мезе тыненк эрзянь келесь?
– Те монь тиринь келем. Те кода ванькс ведь, корштат ды мельспаро теть тееви. Зярдо сан велев, авань марто кортнематнеде седеемгак витеви! Тиринь келень содамось малавгавты эсь ундоксот марто, эсь прят марят кавксть ломанекс. А стяко кортави, зяро ломанесь соды кельть, зняроксть сон ломань. Мон зярдояк а виздян кортамс эрзянь кельсэ. Транспортсо ардомстояк, бути тень гайгсты авам, мартонзо кортан ансяк эрзякс.
Тешкстасынек, неть читнестэ Наталья Вадяева важодсь Рузаевкасо «Ялгат» од ломанень форумсонть. Теде башка, ёроков тейтересь тагояк анокстась управленческой од пелькстамос. Арсетяно те мазый эрзянь тейтерентень изнямо ды важодемасо од тёкшт!
Марина Агафонова