2004 иень сентябрянь 1-це чись кандсь покштояк покш седейризкс аволь ансяк Северная Осетия-Алания Республикань Беслан ошонь эрицятненень, истя жо весе масторонь ломантненень. Эдь тосо те чистэнть 1-це № школань зданиянтень апак учо совась террористэнь отрядось.
Те покш кажось сайсь 334 ломанень эрямот, сынст ютксо – 186 эйкакшт.
Нать, а стяко эрьва иень сентябрянь 3-це чистэ масторонь келес тешкстави Терроризманть каршо бороцямосонть солидарностень чись. Теевезь коень коряс минек республикасо неть читненень алтавить ламо мероприятият. Терроризмань идеологиянь а нолдамонь ды экстремизмань профилактикань координационной центрань важодицятне вейсэ Мордовия Республикань Антитеррористической комиссиянть марто анокстасть #«МордовияПротивТеррора!» ледстнемань акцият ды ламо лия вастовомат.
«Сердце Беслана»
акциядонть
Сентябрянь 3-це чистэ, обед малав, Тёжа иетнень площадьсэнть од ломантне ютавтызь «Бесланонь седей» акциянть. Од ломантне явшесть #МордовияПротивТеррора тешкстнэнь, конатне теезельть седеень ёнов молицякс. Стамбарнэ, апак капша сынст малав ютасть кода од ломантне, истя жо сыретнеяк. Ламот юткстост эштё весть ледстизь сеть зыянов читнень, конат покш седейризкс кандсть минек масторонь эрицятненень. Кить чатьмонезь, кить апак пеле ёвтасть мелест террористтнэнь апаро тевдест.
Од ломанень форум
«Противодействие терроризму – общая задача» лементь ало ютавтовсь республикань од ломанень форумось, косо мольсь кортамо кодат тевть ютазельть комсь иетнень перть Беслан ошсо кажов тевтнень а стувтомга. Те мероприятиясь ульнесь Мордовия Республикань А. С. Пушкин лемсэ Национальной библиотекасо.
* * *
Н. П. Огарёв лемсэ МГУ-нь Культурань ды искусствань кудосонть журналисттнэ вастневсть РУДН-нь Стратегической исследованиятнень ды прогнозтнэнь институтонь прявтонь полавтыцянть Виктория Федосова марто.
Теде мейле теке жо таркасонть, Н. П. Огарёв лемсэ МГУ-нь Культурань ды искусствань кудосонть, ютавтовсь «Мордовиясь терроронть каршо!» ледстнемань акциясь.
«Цифровой мир: как остаться человеком» панжадо кортамось ютавтовсь Н. П. Огарёв лемсэ МГУ-нь Культурань ды искусствань кудосонть. Сонзэ ветизе «Метаметрика» интернет-каналонь содавикс блогерэсь, РУДН-нь Стратегической исследованиятнень ды прогнозтнэнь институтонь прявтонь полавтыцясь Виктория Федосова.
«Старт» стадионсонть ульнесь «Спорт против экстремизма и терроризма» футболонь турнирэсь. Сон алтавсь террористической актонь жертватненень, правань ванстыця органтнэнь сотрудниктненень, кить маштовсть терроризманть каршо бороцямсто воинской долгост топавтомсто.
Ледстизь лемест
палыця штатолсо
Терроризманть каршо тюремасонть солидарностень чистэнть мероприятиятне ютавтовсть позда чокшнес. Соборной площадентень од ломантне пурнавсть «Сердце Беслана» акциянть ютавтомо. Сон ушодовсь штатолонь кирвазтемасо, поладовсь Феодор Ушаковонь кафедральной соборонь священнослужительтнень марто «Вечная память» моравтомасо. Истя свал теить православной Богослужениясо кулыцятнень лемест ледстнемга.
Седе тов ульнесь чатьмонемань минута, мельганзо мероприятиянь участниктне палыця штатолсто пурнасть седей, куншказонзо истя жо штатолсто сёрмадызь: «Беслан, мы тебя помним!» валтнэнь.
Валентина Юдина