Минек семиясь покш ды эрятано вейке-вейкенень лездазь, мелень ванозь. Сеедьстэ пурнавкшнотано вейс ды те уцяскав шкастонть свал гайги пейдема. Вечкемадонть, кона кармась минек семиянь юрокс, мон карминь содамо покштянь пельде.
Покштям, Иван Васильевич Терешкин, чачсь 1917 иень октябрянь 17-це чистэ Салазгорь велесэ. Велесэ эрямось а шождаль, мольсть революциядо мейлень иетне, теевсть колхозтнэ, стявтовсь, кода кортыть, од эрямо.
Терешкинтнэнь кудосо кассть 9 эйкакшт. Тетяст чавовсь, секскак весе стака тевтне, весе мелявкстнэ аштесть аваст лангсо. Мезе сон бу теевель ськамонзо, бути аволь цёранзо? Сындест ульнесть ниле. Эйкакштне важодсть колхозсо. Покш цёракс семиясонть ульнесь покштям, сонензэ сатокшнось сехте ламо. Ансяк зярдояк эзь пеняця эрямонть лангс, кие карми ваномо ды трямо вишка ялакстнэнь ды сазортнэнь? Весе те шкане эрясть стакасто.
Весть весемесь полавтовсь ды стакачитнеяк эзть карма марявомо стакакс. Тенень лездасть од ёжотне, конат вельместь покштянь ды Аня тейтеренть ютксо.
Тейтеренть семиясь сась велентень эрямо лия таркасто. Аня эзизе сода веленть, секскак сон кевкстизе кинть од цёранть кедьстэ. Покштям ёвтнесь, кода муемс эрявикс куронть, кува седе паро ули ютамс, косо жо килангось берянь. Покштям ледстни, Аня сеске тусь мелезэнзэ, арасель мелезэ явомс мартонзо ды мольсь ильтямонзо. Се шкастонть саезь кармасть вастневеме. Аня ульнесь превей, ламонь содыця, маштсь эрьва меззе ёвтнеме, покштям кунсолось эрьва валонзо. Шкань ютазь чарькодсь, те сэтьме тейтеренть а нолдавлизе ваксстонзо ве минутаскак. Пельиень ютазь ёвтызе мелензэ саемс никс. Истя, мольсть тейтеренть ладямо, теезель свадьба. Семияст кассь, савсь седеяк ламо важодемс. Иень ютазь сынст чачсть тейтернест-кавтаськест, мейле - таго тейтерне. Те ульнесь 1941 иень июньстэ.
Войнадо кулясь копачизе весе масторонть. Зыянось сась эрьва кудос, цёратне кармасть пурнамо фронтов. Покштям тусь войнав 1941 иень августсто. «Эзинь ваново авань, сазоронь ды Анютань сельмтнес, - ёвтнесь сон, - аватне апак лотксе авардсть, ансяк кодат валт муемс те шкастонть, мезе тенст ёвтамс? Кутмордынь, палынь, седеяк кеместэ кутмордыя ним ды меринь, мон сан».
Фронтов велестэ тусть 37 ломанть, тюрсть эрьва кодамо таркасо, ламот эзть велявто кудов. Велесэяк эрямось а шождаль. Вачочи. 1942 иестэ покштянень сась куля, косо пачтявсь тейтернетнень-кавтаськетнень вачочиде куломадост... А ёвтавикс ризкс пештизе покштянь, седеезэ тердсь велев, неемс нинзэ, лездамс стака шкастонть, ансяк войнастонть а туят. 1944 иестэ покштям вастызе эсь велень эрицянть, кона ранявомадо мейле ардтнесь кудов отпускс. Сон ёвтнесь велень эрямодонть, кода тосо стака, пачтясь, покштянь семиясо весе шумбрат, омбоце тейтернезэ уш покшке. Те кулясь эждизе покштянь, сон онстонзояк неизе тейтернензэ, кона чийсь каршонзо (тень ёвтнемстэ покштянь сельмстэнзэ лиссть сельведть).
1945 иень апрельстэ Берлин ало тюремстэ покштям ранявсь, сон понгсь госпитальс. Майстэ велявтсь кудов. «Кие бу содаволь, мезе ульнесь оймесэнь, зярдо пачкодинь веленть малас. Эрьва кодат мельть чарасть пряван, парт ды берянть, сынст эйсэ пансь велявтомань кенярксось». Кудонть малас пачкодемстэ сон неизе Анянь, кона авардезевсь ды мерсь: «Сась!».
Эрямось лиякстомсь, семиясь кассь. Весементь эрявсь кепедемс: хозяйстванть, кудонть. Вакссонзо свал ульнесь виев Аня. Покштям ёвтни, сон зярдояк эзь пеняця, свал лездась мирденстэнь. Стакаль, ансяк весе стакачитнень ютамс лездась вечкемась, кона войнань иетнень перть седеяк виевгадсь.
Покштянь ёвтнеманть вельде чарькодинь, кода ломантне изнясть те войнасонть, мезесь лездась ютамс стакачитнень тылсэ. Те - вечкемась. Сон пазонь казне, конань эряви ванстомс.
Наталья Шнякина,
«66 № эйкакшонь кужо»
МДОУ-нь тонавтыця