Вторник, ноября 30, 2021
Важное

Евгений Ледяйкин, Государственной Собраниянь депутат:


– Течи паспортсо апак сёрмадо, кодамо тон раськень. Эрьвась ёвты эсь прянзо мелензэ коряс. Кодамояк конёвсо, договорсо минь апак сюлмазтяно, ды ялатеке ловтано эрявиксэкс сёрмадомс, ёвтамс прянок эрзянь ломанекс. Истя жо тейтяно эрьва сёрмадстоманть ютавтомсто. Мекс, кодамо тенень смусть путови государстванть пельде, кодамо раськень лем сёрмадомс ды мекс? Неть кевкстематнень лангс варчаса каршо вал максомс мартонк вейсэ.

Вете кевкстемат, конатнень лангс а лисить лия кевкстемат. Сынст ютксо кие тон: цёра эли ава? Кодамо раськень тон? Кодамо тиринь келеть? А стяко кевкстневи. Минек ёвтамонок коряс государствась карми важодеме раськень тевсэ сыця кемень иетнень перть. Секс истя эрявикс ёвтамс прянок минсенек раськень ломанекс. 2010 иень сёрмадстомась Мордовиясо (17 %) невтсь раськень ламолгадома ды, мекевлангт, 100 тёжадо ламоксть аламолгадсть эрзятне ды мокшотне лия регионтнэсэ. Те пек парсте невти – республикасонок раськесь ванстови, ды пек лавшот тевтне лия регионтнэсэ, косо эрить пеледе ламо минек раськень ломантнеде. Ютазь шкастонть саезь течинь чис седеяк лавшомгадсь лия регионтнэсэ эриця раськенек марто важодемась. Ялатеке 100 тёжатне ковгак эзть ёма, ансяк сынь эзизь сёрмадсто пряст а эрзякс, а мокшокс. Мекс? Паряк, арась мелест ёвтамс эйкакшост туртов ундокстост? Паряк, а учотано эйкакшонок пельде улемс истямокс, кие минь минсь?

Улить ломанть, конат учить, зярдо весе раськетне вейсэндявить вейке раськес. Улить истят, конат путыть вий ванстомс раськест истямокс, кодамокс сынь сонзэ содасызь. Кода эряви? Кода карми? Эдь кияк эйстэнек а содасы, мезе карми валске. Ансяк содасынек, кода ульнесь, кие минь, мезе вечктяно – секс минь а сёрмадсынек прянок лия раськень ломанекс, ды секс эряви путомс вий ды сёрмадстоманть топавтомс педе-пес, а кадомс сонзэ переписчикенть мелензэ лангс.
Кодамо лемсэ ёвтамс раськенек? Минь содасынек минсенек кельсэ лементь – эрзят ды мокшот. Содасынек, кодамо лемсэ содасамизь минек лия раськетне – мордва. Мордовия Республикась вансты ды виевгавты минек раськенть. Секс карми виде сёрмадстомс, кодамо раськень ломантядо графантень, истя: мордвин-эрзя, мордвин-мокша.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».