МР-нь Пресс-центрасо ютась вастовома, кона алтавсь эрицятнень весероссиянь сёрмадстомантень. Сон ушодовсь ожоковонь 15-це чистэ саезь ды карми молеме сундерьковонь 14-це чис. Промкссонть ульнесть Мордовиястатонь прявтось Ия Парамонова, МР-нь Цифровой развитиянь министрась Игорь Вольфсон, МР-ва МВД-нь УООП-нь прявтонь полавтыцясь Олег Коробков ды лият.
– Россиянть историясо те сёрмадстомась кемгавтовоце. Минек республикась анок сонзэ ютавтомс. Кармить важодеме сёрмадстомань 242 таркат, 1445 ловомань участкат, сёрмадстоманть ютавтыть 1962 ломанть. Те – эрьва кодамо предприятиянь важодицят, местной самоуправлениянь органонь роботыцят ды студентт. Пурназь волонтёронь куро. Сынь кармить лездамо сёрмадстомасо МФЦ-тнесэ ды сёрмадстомань лия таркатнесэ. Сёрмадстыцятне тонавтнесть, кода эряви важодемс. Ожоковонь 18-це чистэ саезь кармасть якамо кудова, – пачтясь Ия Парамонова.
Тедеде сёрмадстомасонть од ёнкс – ломанентень мереви, ковгак апак яка, эстензэ ютамс сёрмадстома Госуслугань порталсо. Мереви тешкстамс тосо весе семиянть. Тень эряви теемс сундерьковонь 8-це чинть самс. Сёрмадстоманть ютамодо мейле максови цифровой код, сонзэ эряви невтемс кудов сыця сёрмадстыцянть туртов. Кода пачтясть те вастовомасонть, седе паро ули ютамс сёрмадстоманть Госуслугань сайтсэ, электронной лувсо, шка ламо а саи. Уш зярыя миллионт ломанть ютызь сёрмадстоманть Интернетсэ.
– Чарькодеви, те шкане апак учне лиснить ломанень манчицятне. Илядо маняво, телефонга гайневтемстэ сёрмадстома а ютавтови! Сеске лоткадо кортамо асодавиксэнть марто. Бути сыть кудов, илядо невте тенст кодаткак документт ды илядо максо ярмакт, – кортась Игорь Вольфсон.
Малав весе сёрмадстыцятне ютасть вакцинация. Сынь кармить маскасо ды кирдеме дистанция. Эрьва недля максыть пцр-тестт.
Сёрмадстоманть вельде карми содавомо, зяро эрицянок, зяро эйкакшт. Эряви-арась кодамояк таркасо стявтомс эйдень кужот, школат, ФАП-т, больницят, кить.
Истя жо сёрмадстовить Россиясо эриця омбо масторонь ломантне (конат састь важодемань коряс, конат эрить аволь свалшкас тесэ).
Сёрмадстомань васенце цётамотнеде пачтить те иень ацамковсто. Яволявтсызь, зяро эрицятнеде. Седе тов пачтить чадыковсто ды 2022 иенть прядовомсто.
Татьяна Маторкина