Ютазь недлясто Отяжелень районсо ютасть мероприятият, конатне алтазельть Дюрькина велесэ чачозенть, государственной ды общественной деятеленть, Социалистической Трудонь Героенть, Ленинэнь колмо ордентнэнь, Октябрьской революциянь орденэнь кавалерэнть, МАССР-нь велень хозяйствань заслуженной роботникенть, Калинин лемсэ колхозонь прявтонть, СССР-нь Верховной Советэнь депутатонть, Отяжелень райононь васенце секретаренть Александр Трофимович Куняевень чачома чистэнзэ 90 иетнень топодемантень.
Отяжелесэ зярдояк а стувтнить сеть ломантнень, конатне кастызь-кепедизь райононть верев, ды кирдить кисэст покш каштанчи. Ды нейгак, мартонь 22-це чистэ, тесэнь краеведениянь музейс пурнавкшность Александр Трофимович Куняевень роднянзо-раськензэ, ялганзо-оянзо, мартонзо важодицятне, райононь прявтонь тевтнень топавтыцясь Константин Николаев, МР-нь Государственной Собраниянь депутатось Михаил Подмарёв, ютазь пингень 90-це иетнестэ райононь прявтось Александр Воробьев, школасо ды агротехникумсо тонавтницятне, кадеттнэ, республикань ды райононь ветеранонь организациятнестэ представительтне, штобу ледстямс Героенть лемензэ овсе чачома чистэнзэ. Отяжелень краеведениянь музеень сотрудниктне, конань прявтсо Галина Лебедева, Куняевень тейтерензэ Аннань, Верань ды Татьянань лезксэст вельде анокстасть фотографиянь ды документэнь покш выставка, конань лемдизь «Человек долга и чести», ды пурнасть сынст коряс видеопрезентация.
Александр Трофимович Куняев кулось 1993 иестэ, тензэ ансяк топодекшнесть 60 иеть. Те ульнесть стакадояк стака 90-це иетне, конатне пек раздесть седеензэ, полавтовсь масторось, тиринь ёнкссонть тевтне ульнесть истя жо ризнэвтицят. Ды седеесь эзь цидярдо... Малав 30 иеть ютасть се чистэнть, ансяк сонзэ лемесь те шкас а тукшны Отяжелень райононь эрицятнень мельстэ-превстэ. «Куняевень шкатнень» ледстнить ламот, кить эрясть те ёнкссонть ютазь пингень 60–80-це иетнестэ. Те эрзянь цёрась чачсь, кода икеле кортыльть, сокицянь-видицянь семиясо, ушодокшнызе важодеманзо тиринь колхозсо сока мельга якицясто ды комбайнёронь лездыцясто, 27 иесэ жо ладязель председателекс. Истят тевть чуросто марсевсть Союзонть келес, ансяк уш од порасто саезь неявсь те виев ды покш лавтов цёранть обуцясь: кеме ды нардев, икелев ветиця, теке марто ломанень вечкиця ды сынст паро эрямо лувост кисэ аштиця. Тень неезь, важодицятнеяк сыргасть мельганзо, комсь иес, зярс сон ульнесь председателекс, Куняев пурнась ваксозонзо тевень содыця команда ды ливтизе Калинин лемсэ колхозонть республикасонть ды масторсонтькак васенцетнень юткс. Кемгавтово тесэнь важодицятне парсте роботамонть кисэ казезельть Ленинэнь орденсэ!
Сон пек вечкилизе тиринь моданть ды модаськак пандсь тензэ паросо. Дивань тевть, неень шканеяк а весе велень хозяйстватнесэ вейке гектарсто саить 70 центнерт, Куняевень жо колхозось неть цифратнес уш пачколесь 50 иеде теде икеле. Ды модатнеяк тесэ, меремс, а пек уш вадряльть, ансяк эсь тевень содамось, паро видьметнень рамамось-кастомась пачтизе Калинин лемсэ колхозонть сехте покш тёкштнес: казезель Якстере знамясо, Ленинэнь орденсэ ды кавто рубиновой тештесэ, кандтнесь «Хозяйство высокой культуры земледелия» лементь. Сеть комсь иетне колхозонть туртов ульнесть «тештень шкакс». Дюрькинась гайгсь масторонть келес, тезэнь сакшныльть тонавтнеме лия хозяйствань прявттнэ кода республикань, истя лия ёнкстнэстэяк. Александр Трофимович пек вечкилизе аволь ансяк моданть, сон бажась тиринь велестэнтькак теемс алкуксонь ош: колхозонь ярмактнень лангс строясь од школа, Культурань кудо, фермат, эйдень кужо, сэдть, кить, важодицятнень туртов од кудот. Тесэнь школасонть эйкакштне уш сестэ андовильть питневтеме, ильтявильть сехте паро лагерев… Колхозось васенцекс республикасонть кармакшнось пандомо ярмакт роботыцятнень туртов, аволь сёрмалеме «трудоденть», ды тесэ васенцекс ушодозель эрямо кудотнень газификациясь. Пек ламо паро тевть тейсь Александр Трофимович тиринь велентень, секскак сонзэ а весть кочкакшнызь депутатокс кода Мордовиянь Верховной Советс, истя жо СССР-нь ды РСФСР-нь. Куняев ульнесь Верховной Советэнь Президиумонь Председателень полавтыцякскак.
…Те пек аламо, мезде бу минь ёвтневлинек, ансяк газетань форматось а максы тень теемс ды секскак велявттано Отяжеле посёлкань Изнямонь 40 иетнень площадентень, косо торжественной мероприятиядонть икеле кадеттнэ ды инжетне путсть цецят Славань аллеясо аштиця А. Т. Куняевень бюстонтень. Мейле ушодозельгак вастовомась, сонзэ панжизь Отяжелень 1-це № ПСШ-нь кадеттнэ, конатне келейстэ ёвтнизь героенть биографиянзо. А Дюрькина велень морыцятне Мария Акимова ды Любовь Агафонова морызь тиринь веледе А. Т. Куняевень вечкевикс моронзо. Мельстуиця морот эрзянь ды рузонь кельтнесэ морасть Отяжелень Раськень культурань центрань «Валскень зоря» ансамблянтень совицятне (седицясь Виктор Шулгин).
Райононь прявтонь тевтнень топавтыцясь Константин Николаев мероприятиянть панжомсто тешкстась: «Те ломаненть эрямо кизэ – тиринь масторонтень, тиринь райононтень ды эсь раськентень служамонь пример. Сонзэ тевензэ питнейчись минек туртов а онкставиця. Од ломантнень туртов сонзэ эрямо лувозо – невтема, кода простой велень цёрынькасто касомс истямо покш масштабонь ломанекс!»
А. Т. Куняевде ледстнематнень поладызь инжетне: А. С. Яшкин, М.В. Слушкин, А. В. Воробьев, А.Г. Арзамаскин, ды весенень ламо мезе ульнесь ёвтнемс те ломанденть, конась кармась алкуксонь се шкань героекс, неень шкань легендакс ды покш буквасто Ломанекс. Мордовиянь содавикс журналистэсь Анатолий Столяров ёвтнесь седе, кода аноксты книга Александр Трофимовичте, сон уш малав анок, ды авторось арси лемдемс сонзэ истя: «Четыре ступени ракеты Куняева».
Лембе ды седейшкавань ледстнематнень кисэ сюкпрянь валт ёвтасть Куняевень тейтерензэ – Анна Александровна ды Татьяна Александровна. Сынь – врачт, тетяст обуцясь ламосо ютась сынст туртовгак. Неть аватне икелев молицят, ве таркасо а шешкицят ды бажить ансяк изнямотнес. Анна Александровна Усанова – медицинань наукань доктор, Мордовиянь заслуженной врач, профессор, Н.П. Огарёв лемсэ МГУ-нь Медицинской институтонь икелень директор, ней госпитальной терапиянь кафедрань прявт. Татьяна Александровна Куняева – медицинань наукань кандидат, МРЦКБ-нь прявт врачонь полавтыця, республикань главной терапевт.
Анна Александровнань ледстнематнес тиринь ломанесь кадовсь кода пек вечкиця ды ламо важодиця тетякс, кона чуросто эрсиль кудосо. Колхозось сонзэ ульнесь омбоце семиякс. Председателекс сон ульнесь, кода мерить, «истовоекс», прявтонть арасельть оймсема чинзэ, отпусковгак сон тукшныль ансяк сестэ, зярдо прядовильть сёксень тевтне, а теленсетне эштё а ушодовильть. Ниле тейтерьканзо туртов тетяст кудов самось свал ульнесь покш кенярксокс: вейкенть кепедилизе лавтов лангс, омбоценть кутмордылизе мештес, колмоценть кирдсь кедьпеде, нилецесь поводевиль ожазонзо… Тетяст виесь, кеместэ кирдемась лезды тенст весе эрямонь перть ды нейгак сынь марить сонзэ лембензэ. Нинзэ Нина Михайловна марто Александр Трофимович эрясть пек парсте, сынст кудост свал пешксель чарькодемадо, тантей прякань чинеде, ловнозь книгатнеде чокшне ланга састыне кортнематнеде.
– Минь пек уцяскавт сеньсэ, што тетянок ульнесь истямо алкуксонь паро ломанекс. Сюкпря весенень, кить анокстызь те чокшненть, ды сюкпря ледстнематнень кисэ! – седейшкавань валсо прядызе кортамонзо Анна Александровна.
Теде мейле весе инжетне тердезельть Отяжелень Ленинэнь ульцяв, 26-це кудонть ваксс, косо куломазонзо эрясь А. Т. Куняев. Те кудось Куняевтнень семиянь курыне, конась семиянть, райононь администрациянть, меценатонть В. С. Бирюковонь вийсэ теезель кудокс-музеекс. Тесэ панжозель Социалистической Трудонь Героенть лемс ледстнемань лаз. Татьяна Александровна Куняева тердинзе весень тиринь кудос, косо ламо ёвтнесь тесэ ютавтозь эйкакш шкадост, тетянзо-аванзо марто кортнематнеде, покш семиянь кенярксчитнеде. «Те кудось кадовсь истямокс, кодамокс ульнесь монь вишкапингстэ, кадовсть тетянь оршамопелензэ, книганзо, чайде симема вечкевикс чашказо. Сон те шкас кирди лембечинть, минь сакшнотано тей оймень пештямо, зярдо вийтне аламолгадыть, сон лезды сынст пурнамс», – ёвтнесь Татьяна Александровна ды тердсь зярдояк а стувтнемс сеть ёнкстнэнь, косо чачсть-кассть покштятне-бабатне, ды теемс весементь сынст лемест ванстомга.
Кудосонть весемесь кадовсь истя, кода ульнесь ютазь пингень 80–90-це иетнестэ, ды ней тей кармить сакшномо экскурсият. А музеень сотрудниктне кармить весень вастомо эрзянь каймактнесэ, конатнень пидесызь-паньсызь самай се каштомосонть, конась ульнесь Куняевтнень тейтертнень вечкевикс таркинекс.
Марина ДЕВЯТОВА