Саранск ошсо ютась од сёрмадыцятнень семинар. Сонзэ ютавтызе МР-нь Писателень союзонь правлениясь. Важодсть зярыя секцият: пурнавкшность эрзянь, мокшонь ды рузонь кельтнесэ поэзиянь, прозань сёрмадыцятне.
Коень коряс, эрзянь секциясь мольсь «Чилисема» журналонь редакциясо. Ламо иень перть неть промкстнэнь ветясь эрзянь поэтэсь Николай Иванович Ишуткин. Тедеде сон тусь эрямосто. Ды кодаяк а кемеви, те валдо ломанесь арась ютксонок. Ней семинаронть ветясть Писателень союзонь прявтось Т. П. Швецова ды «Сятко» журналонь ответственной секретаресь М. П. Левщанова.
Иеде иес сакшныть седе аламо сёрмадыцят. Ризнэвти, аволь весе савсть те вастовомантеньгак. Вана нейгак мельспаросо вастозельть Светлана Фадейкина, Алёна Воронцова, Алеся Клементьева. Сынь тесэ аволь васенцеде. Произведенияст лиснить эрзянь журналтнэсэ ды газетатнесэ. Сёрмадомань тевсэст неяви касома.
Светлана Фадейкина сакшнось Дубёнка ёнксонь Поводелестэ. Важоди Дубёнкань райононь библиотекасо библиографокс. Тедеде сонзэ лиссть кавто книганзо. Вейкесь – «Навстречу радуге» – рузонь кельсэ, тосо малав 360 стихотвореният, эрзянь кельсэ пусмось – «Эрямонь ки». Светлана семинаров сакшномо кармась 2015 иестэ саезь. Сон варчни прянзо эрьва кодамо жанрасо: улить валморонзо, ёвтнеманзо, ёвксонзо. Сёрмады эрьва кодамо темас. Валонзо коряс, а мезть нузялгалемс, эряви кармавтомс эсь прянть важодеме, сёрмадомо. Видькстась, бути прядоволь филологиянь факультет – сестэ седеяк шождасто сёрмадоволь эрзянь литературань кельсэ.
Алёна Воронцова чачсь Орданьбуень Орозбие велесэ. Сёрмады школасо тонавтнемстэ саезь. Аволь весть сакшнось пелькстамо эрзянь келень ды литературань коряс олимпиадатнес. Ней эрямонзо сюлмизе медицинанть марто. Семинарсонть сон ловнось ёвтнемат, конат алтавить неень а шожда шкантень, зярдо весе масторланганть яки ковид ормась.
Од ёвтнемат тукшнось мартонзо Алеся Клементьева. Сон ней тонавтни Н. П. Огарёв лемсэ МГУ-нь магистратурасо. Ловныцятне мельспаросо учить пейдевтиця ёвтнеманзо.
Зярыя ломань марто сюлмавкшнынек видеосвязь вельде. Неть: Елена Биушкинань, Ольга Антиповань ды Виталий Картышкинэнь марто. Елена кучинзе од валморонзо. Кода свал, сон а кекшни эсь ёжомарямонзо, талновты ловныцятнень.
Виталий Картышкин аноксты нолдамс книга. Тов совить повестензэ ды ёвтнеманзо. Те кулясь пек кецявтымизь. Сонзэ пельде книга учить эрзянь весе ловныцятне. Нейгак семинаров Виталий кучсь повесть, кона алтави од ломантненень.
Лембе вал марто семинаристтнэнень пшкадсь Ламбаське велень эрзянь келень тонавтыцясь О. И. Антипова. Ольга Ивановна сонськак икеле свал сакшныль неть вастовоматнес. Кода ёвтнесь авась, ней седе ламо мель яви эйкакштненень, касты келень ды литературань вечкицят. Аноксты тонавтницятнень олимпиадав.
– Зярс седееть палы, ули мелеть, чарыть-велить потсот валтнэ – сёрмадт, иля аште. Кунсолок, мезе кортыть литературань тевсэ превс путыцятне ды тонавтыцятне. Ды, нама, иляк кадо те тевенть – сёрмадоманть. Вана мезе меревлинь од автортнэнь туртов, – пачтясь О. И. Антипова.
Татьяна Маторкина
Иеде иес сакшныть седе аламо сёрмадыцят. Ризнэвти, аволь весе савсть те вастовомантеньгак. Вана нейгак мельспаросо вастозельть Светлана Фадейкина, Алёна Воронцова, Алеся Клементьева. Сынь тесэ аволь васенцеде. Произведенияст лиснить эрзянь журналтнэсэ ды газетатнесэ. Сёрмадомань тевсэст неяви касома.
Светлана Фадейкина сакшнось Дубёнка ёнксонь Поводелестэ. Важоди Дубёнкань райононь библиотекасо библиографокс. Тедеде сонзэ лиссть кавто книганзо. Вейкесь – «Навстречу радуге» – рузонь кельсэ, тосо малав 360 стихотвореният, эрзянь кельсэ пусмось – «Эрямонь ки». Светлана семинаров сакшномо кармась 2015 иестэ саезь. Сон варчни прянзо эрьва кодамо жанрасо: улить валморонзо, ёвтнеманзо, ёвксонзо. Сёрмады эрьва кодамо темас. Валонзо коряс, а мезть нузялгалемс, эряви кармавтомс эсь прянть важодеме, сёрмадомо. Видькстась, бути прядоволь филологиянь факультет – сестэ седеяк шождасто сёрмадоволь эрзянь литературань кельсэ.
Алёна Воронцова чачсь Орданьбуень Орозбие велесэ. Сёрмады школасо тонавтнемстэ саезь. Аволь весть сакшнось пелькстамо эрзянь келень ды литературань коряс олимпиадатнес. Ней эрямонзо сюлмизе медицинанть марто. Семинарсонть сон ловнось ёвтнемат, конат алтавить неень а шожда шкантень, зярдо весе масторланганть яки ковид ормась.
Од ёвтнемат тукшнось мартонзо Алеся Клементьева. Сон ней тонавтни Н. П. Огарёв лемсэ МГУ-нь магистратурасо. Ловныцятне мельспаросо учить пейдевтиця ёвтнеманзо.
Зярыя ломань марто сюлмавкшнынек видеосвязь вельде. Неть: Елена Биушкинань, Ольга Антиповань ды Виталий Картышкинэнь марто. Елена кучинзе од валморонзо. Кода свал, сон а кекшни эсь ёжомарямонзо, талновты ловныцятнень.
Виталий Картышкин аноксты нолдамс книга. Тов совить повестензэ ды ёвтнеманзо. Те кулясь пек кецявтымизь. Сонзэ пельде книга учить эрзянь весе ловныцятне. Нейгак семинаров Виталий кучсь повесть, кона алтави од ломантненень.
Лембе вал марто семинаристтнэнень пшкадсь Ламбаське велень эрзянь келень тонавтыцясь О. И. Антипова. Ольга Ивановна сонськак икеле свал сакшныль неть вастовоматнес. Кода ёвтнесь авась, ней седе ламо мель яви эйкакштненень, касты келень ды литературань вечкицят. Аноксты тонавтницятнень олимпиадав.
– Зярс седееть палы, ули мелеть, чарыть-велить потсот валтнэ – сёрмадт, иля аште. Кунсолок, мезе кортыть литературань тевсэ превс путыцятне ды тонавтыцятне. Ды, нама, иляк кадо те тевенть – сёрмадоманть. Вана мезе меревлинь од автортнэнь туртов, – пачтясь О. И. Антипова.
Татьяна Маторкина