Четверг, марта 28, 2024
Важное

Александр Макарович Доронин марто теевинь содавиксэкс, зярдо сынь важодеме «Эрзянь правдав». Содамонзо карминь васня сёрмадовксонзо коряс. Се шкастонть «Эрзянь правдасо» Александр Макарович ульнесь собкорокс, мон – машинисткакс. Сёрмадовксонзо эйстэ ламотне ютасть монь кедьгаяк. Машинной бюросо эйстэнек зярыяльть. Ялатеке цяк кенеркшнинек печатамс материалтнэнь.



Сёрмадыцятнеде сестэ ламольть. Эрьвась кандсь ды кармавтсь васенцекс печатамс сонсензэтнень. Ялатеке мон салавине кочксинь васняяк истят материалтнэнь, конатне улевельть шождасто ловновикст ды чарькодевикст. Истят сёрмадовкст кандтнесь Александр Макарович Доронингак. Секс вечкилинь печатамс сынст. Весемеде пек тукшность мелезэнь очеркензэ. Эйсэст сон маштсь невтеме ломаненть аволь ансяк тевензэ коряс, маштсь келейстэ панжомо обуцянзояк.

Те шкас мельсэнь ашти вейке очеркесь, конань сон алтакшнызе эрзянь сёрмадеентень Михаил Втулкиннэнь. Втулкин – истямо ломанель, конань Пазось казекшнизе валдо превсэ ды покш ёрокчисэ. Сонзэ ламо валморотне нейгак ладить неень шкантень. А вана эсензэ эрямосонзо аволь весемесь мольсь парсте. Доронин маштсь тень невтеме ды истя, теке мерят, сонсь совсесь Втулкинэнь оймес, неизе ды лангс таргизе весе сень, мезесь талновтсь поэтэнть, мезенть кувалма мелявтсь ды майсесь.

Журналистэкс улемстэ Доронин эзь ульне «строчка мельга паницякс». Кода сонсь эзь вечке сетнень, кить сёрмадсть «адя кодаяк» ды «чувтонь» кельсэ, истя эсензэ материалтнэньгак бажась сёрмадомс мазый ды, истя меревлинь, «тантей» кельсэ. Сонзэ материалтнэсэ бути ульнестькак «коське» цифрат, пек аламо. Сынст таркас невтсь велень ломантнень эрямост, сынст мелявксост, сэредьксэст ды кенярксост.
«Эрзянь правданть» эйстэ сон допрок эзь явовкшно се шкастонтькак, зярдо кармась «Сятконь» прявт редакторокс. Секс минь сонзэ ловинек эсенек ломанекс. Зярдо ушодовиль сёрмадстомась, вейсэ яксинек районга ды велева кода эсенек республикава, истя шабра областнева. Сеедьстэ моненьгак савкшнось якамс мартост. Весть пачколинек Ульяновскоень ёнксов. Ульнинек нилененек.

Александр Доронин – «Сятконть» пельде, Николай Ишуткин – «Чилисеманть», мон – «Эрзянь правданть» пельде ды мартонок морыцясь Анна Атласова. Ютынек ламо велеть. Кортынек ломантнень марто, мекс эряви сёрмадстомс тиринь кельсэ лисниця журналтнэнь ды газетатнень лангс, морынек эрзянь морот. Мекев ардомсто совинек Инзань буень Оськина велевгак. Кода эрьва косо, тосояк эйсэнек учость ды вастсть кши сал марто. Доронин пек сизекшнесь ки лангонь перть. Секс мерсь тенек: мон, келя, а валган машинастонть, кадомизь оймамо. Минь истя теинекак. Школав совинек колмоненек. Вастыцятне сеске кевкстема: «А косо Доронин?» Савсь ёвтамс. Весе школанек лиссть. Мольсть машинанть малас ды энялдозь энялдсть куш аламнес совамс сыненст. Те корты седе, кода парсте содылизь ды вечкилизь сонзэ лия ёно эриця эрзятнеяк.

Мезе таго ледстяви тень. Вана мезесь. Ютазь пингенть прядовомсто таго савсь тень улемс мартонзо вейке покш промкссо. Сон ютась Московсо. Колмошка чи тосо эринек. Ульнесь шка ютамс Москов ошонь куринкатневаяк. Се шкастонть ушова ютамсто, секень вант, вастылить истят ломанть, кить мезе-а мезе микшнесть, шнасть эсь товарост. Понгиндерят истят ломантнень кист лангс, секень вант, менят мезеньгак апак рама. Минек ялгам марто сатотсть превенек а манявомс ды а рамамс мезеяк. Доронин-таки понгсь сынст «кечказонтень». Теде карминь содамо уш мейле, зярдо велявтынек Саранскоев. Весть вастовинь мартонзо аптекань кенкш икеле.

Кевкстнян: «Аволь ормалгадыть?». Сон варштась лангозон тандавтозь нумолонь сельмесэ ды видькстась: кодаяк, келя, а оймаван Московов якамодон мейле. Истя, марят, манимим вейке ломань. Ды ёвтнизе, кода ушосо педясь тензэ вейке микшниця ды ривезь ладсо кортавтызе рамамс нарамонь прибор. Александр Макарович натой кецнесь васня: се шкастонть самай эсензэнсесь тапавсь, тесэ – на теть – од ды аволь питней. Рамизе. Кудов велявтозь, кармась пурнамо важодема таркав. Арсесь нарамс. Таргизе од нарамканзо. Тонгизе розеткантень. Нарамкась, келя, истя кармась урномо, эйстэнзэ натой качамо тусь. Истя, апак нара, кадовськак. Тень кувалма куродызе седеезэ. Секс совась аптекав ормаменьксэнь рамамо.

Вана истят тевть лиснесть мартонзо. Те корты седе, кодамоль сон ломаннень кемицяль. Ды эзь машто мезеньгак сёпомо эсензэ эрямостояк. Эзизе тее салавань тевекс тейтерензэ чачомантькак. Тень кувалма сон ансяк кецнесь ды весень икеле шнась прянзо, кодамо вадрине ды мазыйне тейтерькинесь.

Ламот паро сёрмадыцякс теевсть сонзэ пельде тонавтнезь. Монгак ламо-мезес тонадынь пельдензэ. Сёрмадовксон куш лиснестькак «Сяткосо», Доронин сынст коряс мелензэ эзь капша ёвтамо. Весть ансяк шнымим. Зярдо кандыя тенст вейке аволь покш ёвтнеминем – «Ёвкс, кона ульнесь». Эйсэнзэ ледстнян эсень сырькайдень. Кодамо паро сон ульнесь, кода минь ризнынек, зярдо сырькаем кулось. Александр Макарович сестэ мерсь тень сёрмадомс таго ды седе, мезенть мон ютавтыя эсень оймем пачк. Сестэ, келя, ёвтнемась лиси алкуксонь ды токасы ловныцянть седеензэ.

Те шкас а лоткан ёвтамо тензэ седейшкавань лембе валт превс путоматнень кисэ.


Раиса Щанкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».