Специальной военной операциянь контрактонть прядовомадо мейле Инсаронь райононь эрицясь Сергей Адышкин важодема таркань муемга пшкадсь те райононь Кадрань центрав. Тосонь важодицясь, СВО-нь участникенть эрямо лувонзо мельс саезь, тензэ арсесь-тейсь аравтлув.

Пшкадемадо мейле сисем чинь перть боевой действиянь ветеранонтень лездазель профориентациянь коряс, сон кучозель важодеме «Ксенон» промышленной предприятияв слесарекс-витницякс. Истя жо «Защитники Отечества» фондонть лезксэнзэ пингстэ сон кармась тонавтнеме  Московонь вузсо «государственной ды муниципальной управления» специальностенть коряс.

СВО-нь ветеранось «Ксенонсо» важоди нейгак, истя жо тонавтнемазояк поладови. «Эсь содамочитнень ды эрямонь опытэнть тевс нолдазь, ули покш мелем лездамс ломантненень, ды кандомс паро минек масторонтень. Монь касыть колмо нуцькан, кадык сынст сыця шкаст карми сэтьмекс ды вадрякс. Мон сеедьстэ вастневан школасо тонавтницятнень марто, апелемачинь уроктнесэ евтнян специальной военной операциядонть, кастан эйкакштнесэ тиринь масторонтень вечкеманть», – тешкстась Сергей.

Те иенть ушодовомсто Мордовиясо «Работа России» Кадрань центранть лезксэнзэ вельде мусть важодема таркат СВО-нь 28 участникть. Сынь важодить механикекс, водителекс, станоконь операторокс, менеджерэкс ды ламо лия тевтнесэ, нилетне сермадстсть эсь тевень панжомадо контрактт.