Вторник, ноября 30, 2021
Важное

Отяжбуень Козловка велесь ашти аволь маласо Саранскойденть. 1959 иенть самс тесэ ульнесь Козловской район. Мейле модатнень явшизь, кой-кона велетне тусть Орданьбуень ёнксов, лиятне – Ицялбуень, те таркась кармась Отяжбуень ёнксокс. Аволь умок минь пачколинек Козловкав ды аноктано ёвтнемс тенк, кода сон эри неень шкане.



– 2019 иестэ ульнесь велетнень вейсэндямо. Истя, Козловкань велень поселениянтень вейсэндизь Андреевка, Каменка, Ало Чукало ды Покровское велетнень. Минек поселениясо кемзисемге велеть. Фёдоровкасо эри вейке ломань, Лигасо – сёрмадстозь вейке ломань, ансяк а эри. Зярыя велетнесэ эрицятнеде 16 саезь 35 ломанть. Козловкань поселениясо весемезэ 1730 ломанть. Нама, аламо. Зярдо-бути ансяк Козловкасо ульнесть малав кавто тёжат эрицят, ней 17 велесэ зняро а пурнавить, – ёвтни Козловка велень поселениянь прявтось Василий Викторович Моторкин.

– Косо важодить тынк ломантне?
– Эрицятне важодить «Хорошее дело» ООО-со Чамзинкасо, «МАПО Восток» ООО-со, «Мордовский бекон» ООО-со, тесэ ули тувонь комплекс, животноводческой комплекс, эсь тевест ветить индивидуальной предпринимательтне, 33 ломанть важодить сыре ломанень ды инвалидэнь кудосо-интернатсо (ней сон кармась Покш Березникень интернатонь филиалокс), истя жо ардтнить важодеме шабра районов ды лия ёнксов вахтав.

– Кода содатано, аволь пек умок панжозель школанк.
– Виде. Козловкань средней школанок стявтозель 2013 иестэ. Сон од, вадря, кецявты сельме. Тосо ней тонавтни 61 эйкакш, усксить лия велетнестэяк. Важодить 20 тонавтыцят. Школанть вакссо – искусственной вельтявкс марто спортонь пек паро площадка.

– Ули эйдень кужонк?
– Козловкань эйдень кужось стявтозель 1984 иестэ. 2010 иестэ тосо теезель паро витнема-петнема. Ней кужосонть кемень эйкакшт.

– Василий Викторович, рединек, кармасть тынк ёнов кинть витнеме.

– Минек прявт проектэнек ды покш мелявксонок – кись. Сонзэ учинек малав кеветее иеть. Ков ансяк эзинек пшкале, косто ансяк эзинек веше лезкс. Отяжелестэ саезь Козловкав кись плитань, весе порксазь-яжазь. Такситнень арасель мелест ардомс минек ёнов. Ды вана «Качественные и безопасные дороги» национальной проектэнть вельде тедеде кинть витнизь Андреевканть видьс. Сы иестэ Андреевкасто саезь Козловкас витневи, теде башка, эштё 500 метрат – Козловкава. Улить кавто сэденек, конатнень истя жо витнесызь. Кись – эрямонь артерия, сонзэ витнемась – покш тев, кона ашти васенце таркасо.
Козловкасо важоди амбулатория, ветлечебница, почта, библиотека, лавка. Администрациясь ашти Культурань кудосо. В. В. Моторкинэнь валонзо коряс, эрявольть бу витнемс культурань кудотнень Козловкасо, Каменкасо ды Андреевкасо.
Те поселениясонть важодить сисем ФАП-т. 2020 иестэ «Здравоохранение» нацпроектэнть лувсо од ФАП стявтозель Андреевкасо. Ломантне пек учить од ФАП-т Каменка, Наборные Сыреси ды Покровское велетнесэ. Кемтяно, сынст пшкадемаст марясызь.
Тельня весе китне ванськавтовить ловдонть. Велень куротнева стявтнезь палмантнесэ ладсезь 52 лампат. Президентэнть В. В. Путинэнь кармавтоманзо коряс сэнь толнэсь кармась пачколеме вишка велинетнес. Тесэяк, Санеевка велесэ, ветяви газ. Сонзэ учить малав 30 эрицят.

В. В. Моторкин пачтясь, Козловкань велень поселениясо, Каменканть вакссо стявтови-тееви телень шкане оймсема тарка. Пандо прясто сокссо кирякстнемань тарка, лиякс меремс, горнолыжной база. Важодемась ушодовсь. Те иестэ варчасызь кепсемканть (подъёмникенть). Тосо кармить кавто линият. Вейкесь – нурькине, тонавтнемань кис. Эйдетнень туртов – башка тарка, пандо прясто кармить кирякстнеме ватрушка лангсо. Тееви конькасо кирякстнемань таркаяк. Зярс инфраструктура арась. Бути ломантнень мельс туи, кармить сакшномо – тееви седеяк ламо. Арсеви стявтомс банят, оймсемань кудынеть, кафе. Чувить вете эрькеть, козонь нолдыть калт, калонь кундсемскак карми меревеме. Кавто эрькеть уш чувозь. Тедеде тееви вейке подъёмник ды валдомтсызь тарканть.

В. В. Моторкин чачсь 1960 иестэ Пилезелесэ. Школадо мейле тонавтнесь Саранскоень 4 № ПТУ-со. Кенерсь важодеме эсест колхозсо токарекс. Служась армиясо. Тонавтнесь Ицялбуесэ техникекс-механикекс. Прядсь Н. П. Огарёв лемсэ МГУ-нь юридической факультет. Важодсь колхозонь председателекс, парторганизациянь секретарекс, комсь иеть «Агро-Козловка» ЗАО-нь прявтокс, автотранспортной предприятиянь прявтокс, 2014 иестэ саезь – Козловка велень поселениянь прявт.

Василий Викторовичень од шкане ладякшнызь колхозонь прявтокс. Валонзо коряс, сестэ важодемс седе шождаль. Ломантне апак мелявто макссть-мисть ловсонть, модамаренть, ревень понанть. Икеле арасель истямо тамашась – барлаконь касомась. Сонзэ шкастонзо леднесть, ней жо велетне чамсть. Ваньксчинть мельга ваномс а кинень. Гайневтить телефонга, энялдыть леднемс.

Козловкань администрациясо ладязь велень поселениянь содавикс ломантнень марто стенд. Тесэ невтневить те ёнкссонть чачозь ломантне, кить эрямосост тейсть паро тевть, ней жо сравтовсть масторонок келес. Саемга, тесэ Москов ёнксонь филармониянь артисткась, «Садко» ансамблянь морыцясь, Россиянь Военно-морской флотонь Н.А. Римский-Корсаков лемсэ оркестрань солисткась Вера Каяцкая (Прохорова) ды тонавтыцязо, МАССР-нь заслуженной тонавтыцясь Т.И. Янтюшева.

Башка тарка явозь Афганонь ды Чечнянь войнатнесэ участниктнень ды чавовозтнень туртов. Невтевить Козловкань колхозонь икелень прявттнэнь фотографияст. Эйстэдест весе неть пачтямотнень пурнасть зярыя шкань перть.

Людмила Константиновна Гаврилина важоди Козловкань велень поселениянь прявтонь полавтыцякс. Тонавтнесь сон Н. П. Огарёв лемсэ МГУ-нь экономикань факультетсэ. Комсь иеть важодсь «Агро-Козловка» ЗАО-со бухгалтерэкс, меельце 11 ие – тесэ.

– «Од семия» программанть коряс 2006-2007 иетнестэ стявтозель Горький лемсэ од куро. Тосо кемень кудот. Эрить кемгавксово эйкакшт. Ули ламо эйкакшонь триця семиянок. Камайкинтнэ трить-кастыть ниле эйкакшт: колмо тейтернеть ды вейке цёрыне. Велень поселениясонок сехте сыре ломанесь – Мария Степановна Третьякова, сонензэ сентябрясто топодсть 102 иеть. Сон Вере Чукало велень.

Мельспаросо аштетяно пенчсэ седиця-налксиця ансамблянок коряс. Эйкакшонь ансамблянть вети Лидия Алексеевна Белова. Цёрынетне ды тейтернетне кецявтыть Саранскоень ваныцятненьгак.
Козловкань велень поселениясо важодить культурань кото кудот ды кото библиотекат. Колмо церьковат – Пилезелесэ, Андреевкасо ды Покровскойсэ, Каменкасо панжозь озномань кудо, – ёвтнесь Л. К. Гаврилина.

Те иестэнть саезь Отяжбуестэ Козловкав ды лия велетнес ушодсь ардтнеме ГАЗель. Чизэнзэ кавксть. Ломантне пек кецнить: кенерить теемс тевест районсо ды велявтомс мекев.
Мезе парось, меельце шкане ломантне кармасть рамсеме велетнестэ кудынеть. Витнесызь-петнесызь сынст, мейле кизна сакшныть эрямо. Зярыя истят эрицят састь Мурманск ошсто.



Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».