Кезэрень шкасто саезь минек тетятне-аватне, покштятне-бабатне, кить эрясть велесэ, свал трясть ламо ракшат. Вейксэньгеменце иетнестэ, масторсонок тевтнень одс ладямонь шкастонть, колхозтнэ кармасть лавшомгадомо.
Ледстневи, кудазортнэ ракшань трямодо сеске эзть лотка, ламо семиятнесэ те ульнесь аволь ансяк прянь трямонь ки-ян, истя жо целковоень добовамонь пек эрявикс тев. Эдь сестэ кувать кирдевсть зарплататне, киртявсть важодема таркатне. А мезть сёпомс, шкань ютазь эрямонок полавтовсь паро ёнов ды ламот велетнестэ тусть ошов ды лоткасть кирдеме ракшат. Паряк, те асатыксэнть витемга, велетнень ванстомга, хозяйстватнесэ ракшатнень ламолгавтомга ды лия тувталонь кувалмаяк комсте ламо иеде икеле РФ-нь Государственной Думась кемекстась Федеральной закон крестьянско-фермерской хозяйстватнень теемадо. Ледстневи, сестэ малав эрьва велесэ кармасть улеме истят кудазорт, кить государствань субсидиятнень вельде ушодсть скалонь, букань, ревень ды лия ракшань трямо. Ламот сестэ варчизь виест те а шожда тевсэнть, ансяк тунь аволь весе сонзэ поладызь. Аламонь-аламонь те паро ушодксось кармась лепамомо, кардазтнэ чамомо.
Шкань ютазь РФ-нь Президентэнть ушодксонзо коряс грантонь максомань тевенть яволявтомадо мейле, кода масторонь келес, истя минек республикасояк ломантне таго кундасть од тевс. Эрьвась кармась важодеме сень лангсо, мезе сон машты тееме ды кинь ков сатыть виензэ ды ярмаконзо.
Течи ули меленек ёвтнемс ловныцятненень Кочкурбуень Кацялай велень эрицятнень, фермерэнь тевень топавтыцятнень Алексей ды Любовь Пищинтнэнь ланга.
Тевень вечкиця, стакачиде а пелиця семиянть марто содавиксэкс теевеме лездась тенек Кочкуровань муниципальной райононь администрациянь прявтось Светлана Герасимова. Светлана Николаевна сынст ёвтынзе тенек, кода эсь тевень алкукс топавтыцякс, парсте важодицякс.
Вана истя кизэнь опаня пси чистэ райононь администрациянь велень хозяйствань отделэнь прявтонть Раиса Ежова марто минь сыргинек Кацялай эрзянь велентень. Тешкстасынек, Раиса Филипповна пингень перть эри Кочкурбуесэ, эрямонзо алтызе велесэ важодицятненень. Малав ниленьгемень иеть сон те тевсэнть. Парсте содасы Пищинтнэнь семиянть. Сыненст ардомсто Раиса Ежова пачтясь тенек, Алексей Демьянович ды Любовь Николаевна 2019 иестэ изнясть грантонь саемасо. Вете иеде икеле анокстазь бизнес-планост ловозель сехте парокс ды лезэвекс. Планост топавтомс макссть тенст 2 700 000 целковойть, эштё эсест 300 000 целковойть эрявсь путомс те тевенть ушодомантень грантонь вешематнень коряс. Ледстневи, сестэ мирдть-нить арсесть-тейсть ды миизь автомобилест. Идезь ярмактнень вейсэндизь грантонтень.
Кацялаев пачкодинек обед малав. Алексей Демьянович ды Любовь Николаевна вастымизь веленть эйстэ а васоло, скалонь стадаст маласо. Ракшатненень те кизэсь пек сюпав эрьва кодамо касовкссо.
Фермерэнь тевенть топавтыцятнень ней пек аюткошкаст, теле лангс анокстыть ракшатненень тикше, ялатеке мусть шка мартонок кортамс.
Васняяк ульнесь меленек содамс, кодамо семиясо ютась эйкакш пингест неть стака тевде а пелиця, чинек-венек важодиця ломантнень.
Кавонест ламо эйкакшонь триця семиясто
Любовь Пищина (тейтерьксэнь фамилиязо Давыдова) чачсь-кассь васоло Узбекистансо. Истя лиссь сынст семиясо, советской шкасто тетянзо, Николай Андреевичень, техникумонь прядомадо мейле, кучизь тов важодеме. Сон специальностень коряс электрикель. Тиринь Морд. Давыдовав отпусков самсто урьвакстсь, никс саизе Сурвеле (Сабаево) велень Мария од тейтеренть. Свадьбанть налксемадо мейле сеедьстэ сакшныльть Мордовияв. Шкань ютазь чачсь Люба васенце эйкакшост, конантень свал пек вечкевсть Кочкурбуень инжекс самотне.
Узбекистанонь школасо ниле класстнэнь прядомадо мейле сон энялдсь тетянстэнь-аванстэнь нолдамс эрямо ды тонавтнеме Мордовияв. Бабанзо, Татьяна Сергеевнань, покш мелезэль саемс нуцьканть эсест велев. Шкань ютазь Давыдовтнень семиясь тусь Узбекистансто ды истя жо кармась эрямо ды важодеме тиринь ёнкссо. Любовь Николаевнань тетянзо-аванзо, Николай Андреевич ды Мария Ивановна, трясть-кастсть сисем эйкакшт: вете цёрат ды кавто тейтерть.
Любовь, сехте покшось, школань прядомадо мейле кармась тонавтнеме М. Е. Евсевьев лемсэ пединститутсо (ней сон лемдеви университетэкс). Сонзэ прядомадо мейле, 2001 иестэ, «начальной школань тонавтыця» специальностень коряс сон ушодсь важодеме Морд. Давыдовань школасо. Тосо сон вастызе эрий ялганзо Алексей Пищинэнь. 2005 иестэ одтнэ урьвакстсть-венчасть. Алексей Демьянович важодсь Кацялай велень училищасо, косо ламо иень перть прявтокс ульнесь Владимир Тимофеевич Солдаткин. Те ламонь содыця, эрьва мезес чарькодиця ломанесь, пингень перть ответственной тевтнень топавтыцясь ламосо лездась одтнэнень. Морд. Давыдовань школасо тевтнень одс ладямонть (реорганизациянть) ютавтомадо ды декретэнь отпусков туемадо мейле Любовь Николаевнань Владимир Тимофеевич тердизе важодеме училищав. Кодат тевть ансяк эзь саво топавтомс: секретарь, складонь прявт ды ульнесть ламо лия должностензэ.
Косо бу аволь важоде тевень алкукс топавтыця семиясь, сынст кардазост свал пешксель ракшадо: скал, тувот, саразт, куркат ды мик ульнесь эсест лишместкак.
Кода вере ледстинек, Алексей Демьянович важодсь Кацялаень училищасо мастерэкс, ванстыцякс ды водителекс. Сон истя жо, кода бу ней меревельть, ламо эйкакшонь триця семиясто. Тетяст-аваст трясть колмо эйкакшт, Алексей – веженсь семиясост. Весе сынь кассть трудонь вечкицякс, малавиксэст туртов лездыцякс.
Истямокс тонавтыть улемс кавто эйкакшост: 17 иесэ Вера тейтерест ды 16 иесэ Роман цёрынест. Вера, вейксэ классонь прядомадо мейле, ушодсь тонавтнеме Саранскоень колледжсэ, Роман знярс эри тетянзо-аванзо марто ды эрьва тевсэ тенст лезды.
Кизэнь тевтне певтеметь
Нама, фермерэнь тевенть топавтомсто кизэнь перть ламо вийть эрявить, аволь ансяк ракшатнень мельга якамсто, сынст симдемстэ-андомсто, эштё ламо шка саи бухгалтерэнь тевень топавтомась, кавто-колмо инстанциятнева отчётонь анокстамось. Грантонь ярмактнень ютавтомсто эрьва трёшникенть коряс сёрмадома, ков сон ютавтозь.
Велесэ эрьва эрицясь соды, кизэнь тевтне певтеметь. Садпиресэ эмежть-мезть кастома, теле лангс сатышка ярсамопель анокстама. Ракшатненень тикше теле лангс ледема ды костяма. Паро, грантонь ярмактнень лангс рамасть МТЗ-82.1 трактор, электропастух ды лия эрявикс курмот-кармот.
2019 иестэ, кода кундасть фермерэнь тевентень, сынст ульнесть 14 прят ракшаст, ней те цифрась кастовсь 60-с. Виде, кавонест туртов весе тевтне а топавтовить, секс сиведсть кавто важодицят. Неть: Александр Гришин ды Александр Пищин.
Лездыть веленть паролгавтомасо
А мезть сёпомс, неень шкане аволь эрьва велестэ тельня муят техника китнень ловдо ванськавтомс, сынст чирева ды калмазыренть перька кизна зыянов тикшенть леднемс. Те энялдоманть марто сеедьстэ пшкалить Пищинэнь семиянтень. Сынь свал анокт лездамс тиринь велень эрицятненень. Истямокс сынст кастызь тетяст-аваст, истя сынь бажить тонавтомс эйкакшост. Неть лембе ойме, чевте седей ломантнень марто кортамсто, сынст а шожда эрямост редямсто, арсезевинь, сатовольть-арасть виень истямо покш канст саемс эсень лангс неень шкане? Арась! Республикань велетнесэ улемстэ, неень шкасто ломантнень велесэ эрямо лувост неемстэ, видькстатано, чуросто истямо семия вастат. Аламот, кить кирдить ракшат, сурсо лововить сетне, кинь улить саразост, ды модамарень паксятнеяк кармасть киртявомо. Пищинтнэ жо малав ниленьгемень гектарт мода рамасть, эрьва иестэ тосо видить товзюро, шуж, пинеме ды ракшатнень андомс тикше. Кевкстеманок лангс, кодат арсемаст икелепелев, Любовь Николаевна стамбарнэ мерсь тенек, эйкакштнень тонавтневтемс, алкуксонь ломанть эйстэст ливтемс! Койсэнек, те семиясонть весемесь тееви те арсеманть топавтомс.
Валентина ЮДИНА