Саранск ошонь 22 № школав инжекс сакшнось специальной военной операциянь ветеранось Сергей Маврин. Те вастовомась ютась МР-ва «Защитники Отечества» Государственной фондонь филиалонь «Служу Отечеству» патриотической акциянть лувсо.

Инжесь – школань прявтонть Лариса Шараховань икелень тонавтницязо.

«Сергеень кисэ кирдян каштанчи ды аштян мельспаросо, – корты Лариса Шарахова. – Сон ульнесь активистэкс, парсте тонавтнесь, кирдсь ояксчи ламо ялга марто. Весе те лездась тензэ передовойсэяк».

Сергей Мавринэнь сюпав эрямонь ды боевой опытэзэ: служась армиясо, ульнесь Южной Осетиянь тюрематнесэ, пурнась семия ды касты кавто церынеть. СВО-нь ушодовомадо мейле сон тусь тов контрактонь коряс. Кавто иеть служась ТОЗ-1 прикрытиянь группасо.

Сергей покш мельсэ кортнесь школань тонавтницятнень марто, евтнесь фронтсо улемадонть ды мерсь: «Фронтсо эрьва боецэсь – герой». Весень седейс токинзе гуманитарной лезксэнь максомань историясь. Мастянень цератненень кучнесть кудонь пачалксеть. Ветеранонть валонзо коряс, сынст кисэ истямо мелявтомась, лездамось эжди солдаттнэнь седеест стака шкатнестэ. Меельцепелев церась невтнесь эйкакштненень передовойстэ фотографият ды сонськак тейсь вейсэнь фото тонавтницятнень марто.