П.А. Ключагинэнь 85 иетненень
Петр Андреевич Ключагин… Те лементь парсте содасызь кода минек республикасо, истя сонзэ томбалеяк. Содасызь аволь ансяк кода учёноенть, кона ламо иень перть важодсь Н.П. Огарёв лемсэ МГУ-нь филологиянь факультетсэ, тонавтсь-анокстась сы шкань журналистт. Пётр Андреевич Ключагин – эрзянь содавикс сёрмадей, кинь сёрмадовксонзо муизь эсь таркаст минек литературань сырнень паргосонть. Сон – Россиянь Сёрмадеень вейсэндявксос совиця (1991), Мордовия Республикань культурань заслуженной важодиця (1994).
«Паро, паро
тиринь ёнкссо…»
Тосо, косо Штырма леесь
Саи сиянь жойть ведензэ,
Тува сравтовсь эрзянь велесь, –
Кулязбуе мерить тензэ.
Истя сёрмады эсь чачома веледензэ Петр Андреевич Ключагин.
Кода ламо лия эрзянь сёрмадыцятне, сонзэ эрямонь кизэ ушодовсь велестэ. Те – Отяжбуень Кулязбуе велесь.
Чачсь Петр Андреевич Ключагин 1936 иень аштемковонь 18-це чистэ ды эрямонзо перть эсензэ седейсэ вансты сеть валдо ледстнематнень, кодат кадовсть васоло эйкакшпингестэ саезь. А стяко эсензэ велентень вечкеманть аволь весть невтсь эсензэ ламо произведениятнесэ, конатнесэ видькстась: Кулязбуе велесь свал карми «зоря тештекс паломо велькссэнь, умаринакс панжомо мельсэнь».
Ключагинэнь эйкакшпингензэ а ловсак ламбамокс. Сон сатотсь войнань шкантень. Секс весе сеть стакачитне, конатнень пачк ютасть се шкасто ломантне, ютасть сынст семияст лангаяк. Ятонть каршо тюреме Андрей Сергееевич тетянзо туемадо мейле кавто эйкакштне кадовсть аванзо марто ськамост. Мезе савсь печтямс Акулина Фёдоровнанень сынст трямсто, вейке валсо а ёвтасак. Вачочись сестэ якась кудодо кудос. Эзь ютне сынст вакскаяк. Лиясто кши сускомонтькак савсь явомс колмов. Оршамкатне пандтнезь-стакшнозь, тельня вармась пачкаст ютыль. Истя кассь Петр Ключагин. Стакачитне эзизь синде сонзэ обуцянть, мекевланг, теизь седеяк нардевекс ды цидярдыцякс.
Обуцянь неть ёнкстнэ маштовсть тензэ, зярдо школанть прядомадо мейле сась тонавтнеме Мордовиянь университетэнь филологиянь факультетэв. Ды мейлеяк, зярдо тонавтнесь Ленинградонь высшей партийной школасо (1964), сёрмадсь ды 1983 иестэ идизе филологиянь наукань кандидатонь диссертациянзо, пек лездась тензэ кемемась: стакачитне изнявикст, ансяк илязо таго кирвазе мастор-мастор каршо тюрема.
Пётр Андреевич Ключагин топавтсь ды топавты тев, конань сон кочкизе, ловт, школасо тонавтнемстэ саезь. Вузсо ламо иень перть тонавтомадо башка сон сёрмады валморот, ёвтнемат. Теде башка П. Ключагин пек виев журналист. Сон важодсь Казахстанонь «Хлебороб Приишимья», «Лениногорская правда» газетатнесэ. Пек ламо иеть эсензэ эрямосто макссь «Эрзянь правда» газетантень, конанть марто сюлмавозь 1960 иестэ саезь ды те шкас.
П.А. Ключагин, кода эрзянь юморист-сатирик
Журналистэкс П.Ключагин теевсь 1960 иестэ, зярдо Мордовиянь госуниверситетэнь филологиянь факультетэнть прядомадо мейле сась важодеме «Эрзянь правдав», косо сон зярыя иеть ульнесь собкорокс васня Ицялонь, мейле Орданьбуень куротнесэ. Те кармась тензэ покш школакс творчествань эсензэ кинть вешнемасо, эрзянь кельсэ паро сёрмадыцякс теевемасо.
Журналистэкс улемстэ эрьва кодамо велева яказь, ломань марто вастневезь ды кортнезь, П.А.Ключагинэнь икелев эрямось кармась панжовомо седеяк келейстэ ды эрьва ёндо. Сон тонадсь аволь ансяк ломантнень кунсоломо, сынст мелявксост чарькодеме, тонадсь нееме-редямо ды лангс ливтеме весе сеть асатыкстнэнь, кодат ульнесть се шкань велень хозяйствасо. Тень теемс ульнесь пек а шожда. Велетнесэ сестэ эрямось пек стакаль. Колхозтнэсэ тевтне мольсть «адя кодаяк». Модань сокицятненень-видицятненень, ракшань трицятненень ярмакт эзть пандо. Тень таркас макснесть коморо-кавто зёрна ды весе. Эряк, кода маштат. Весе неть стакачитнень кувалма ломантне кармасть орголеме велестэст, тукшномо ошов. Велесэ эрямось седеяк стакалгалесь. Од, шумбра, виев цёратне ды тейтертне тукшность лия таркава, велетнесэ кадновсть сыретне, нузякстнэ. Эрьва косо сельмс эцесть азортомочись, мельтемечись. Кода журналист, кона весементь, мезе неи, нолды седеензэ малава, кинь туртов васенце таркасо свал аштесь видечинть ванстомась, сонзэ кисэ аштемась, Пётр Ключагин эзь ютне неть асатыкстнэнь вакска, невтсь эйсэст эсензэ материалтнэсэ.
Истя П.А.Ключагин чалгась юмористэнь-сатирикень кинть лангс. Сатирань ды юморонь васенце произведениякс ульнесть фельетонтнэ ды мизолкстнэ. Сынь кармасть лиснеме национальной газетасо ды журналсо. Васняяк, “Эрзянь правда” газетасо, косо 1960-це иетнесэ панжозель од рубрика, конанень максозель те жанрантень седе а ков ладиця лем – “Карязонь трокс” (те лементь арсизе газетань се шкань журналистэсь М. Лёшин).
П.Ключагинэнь ёрокчизэ кода журналистэнть, кода юмористэнть-сатирикенть, келейстэ панжовсь истят фельетонтнэсэ: «Сталмозо 10 килограммат, питнезэ 10 целковойть…» (“Э.п.” 1961 иень февралень 26-це чи), “Жарков ялганть онозо”, “Раужо ой», “Пейтне седеяк чулксетить”, “Персональной алаша”, “Картежной турнир”, “Тувотне чумот”, “Эх, мушко, мушко” ды ламо лиятнесэ. Истямо жанрань ламо произведениянзо совасть «Од пингес кить-янт» (1977), «Пирявкс» (1979), «Меельце кулят» (1990) сборниктнес.
П. Ключагинэнь Произведениянзо таркаст эрзянь литературасо
Пётр Ключагин – сёрмадей, конань творчестванзо а човорясак лиятнень марто. Сонзэ эсензэ сёрмадомань тешксэзэ ды лувозо, эрямонть лангс эсензэ вановтозо. Эсензэ произведениятнень туртов геройтненьгак сон эзь вешне ды а вешни костояк васолдо ды а саи сынст эсензэ превстэ-удемстэ, а салы кинь-бути лиянь кедьстэ. Сынь, неть геройтне, эрить перьканок, малаванок, вакссонок. Эряви ансяк маштомс сынст редямо, сынст обуцяст чарькодеме ды невтеме. Ключагин маштсь тень тееме. Секс произведениянзояк шождасто ловновикст ды чарькодевикст. Саемс «Нарьгазь ломань», «Те ульнесь Пичегайсэ», «Манявсь», «Апаро он», «Сокор сюло», «Понкстомо» ды лия евтнематнень. Истят ломанть, кодат невтезь сынст эйсэ, вастат эрьва косто.
Мокшэрзянь литературасо васенце эскелькстнэнь сон теинзе 1950-це иетнестэ саезь. Чалгамс литературань кинть лангс П. Ключагинэнь кармавтызь васняяк эрямонть смустензэ чарькодеме бажамось, эрзянь келенть вечкемась, сонзэ уцясканзо кисэ мелявтомась ды весе сеть ёжомарямотне, конат палозь палсть сонзэ седейсэ ды вешсть ливтемс сынст оляс, конев лангс.
Чачома чи марто!
Тедедень аштемковонь 18-це чистэ Петр Андреевич Ключагинэнь чачома чистэ топодить 85 иеть. «Эрзянь правдасо» важодицятне ёвтыть тензэ седейстэ молиця лембе валт, арсить кеме шумбрачи, кувака эрямо, од изнявкст шкинемасо.