Пятница, марта 29, 2024
Важное

Мордовиянь стройотрядтнэнень – 55 иеть!

 

Те кенярксчинтень минек республикасо алтавсть эрьва кодат мелень витемань тевть. Сехте покшось эйстэст ютавтовсь сентябрянь 7-це чистэ Республикань Культурань кудосо ды сонзэ икеле.

Те чистэнть ушосо важодсть интерактивной площадкат, конатнень вельде неявсть республикань стройотрядтнэнь эрьва кодат ёнксост. 2021 иень кизна минек од ломантне важодсть научно-производственной, педагогонь, строительной, медицинской, велень хозяйствань, механизированной отрядтнэсэ ды ламо лия тевть топавтсть.

Теде башка, од ломантне максыть медицинань лезкс, важодить сервисэнь ды инжень вастомань сфератнесэ, лездыть поездэнь проводниктненень.

Од ломантнень тевест марто теевсть содавиксэкс МР-нь Прявтонь тевтнень топавтыцясь Артём Здунов, Саранской ды Мордовской митрополитэсь Зиновий владыкась, «Спас» телеканалонь прявтось Борис Корчевников ды ветицясь Наталья Москвитина. Истя жо те чистэнть Мордовиянть содавтызе РСО-нь МОО-нь Центральной штабонь комиссарось Мария Корнилова.

Седе тов инжетне ютасть Республикань Культурань кудонь фойес, косо невтезель келей выставка Мордовиянь студотрядтнэнь васенце эскелькстнэде ды од ломанень те движениянть виевгавтомадо ды неень шкань тевдест. Тосо ламо фотографият сеть отрядтнэнь марто, конат путсть юр республикасонок те лезэв ды эрявикс тевентень.

Торжественной пельксэсь ушодовсь Россиянь лия регионтнэстэ поздоровонь ёвтамосто. Сынь ульнесть Чувашиянь, Татарстанонь, Марий Элэнь ды ламо лия республикатнестэ.

Седе тов сценанть лангс кенярксчинь коряс поздоровонь ёвтамо лиссь МР-нь Прявтонь тевтнень топавтыцясь Артём Здунов. Сон путсь питне вастовоманть парсте анокстамонтень, стройотрядонь советской шкань оршамопеленть (атрибутиканть) ванстомантень ды ёвтась сюкпрянь валт те кенярксчинтень тердеманзо кисэ.

– Тынь казтядо вийть аволь ансяк од ломантненень, весенень минек туртовгак. Тынь топавттадо пек покш важодема. Вана уш ней тынь теевиде профессиянь парсте содыцякс кочказь тевсэнк. Кеман, студентэнь неть ледстнематне кадовить тынк седейтнес пингень перть. Сюкпря важодеманк кисэ! Весе вейсэ минь – покш вий, – мерсь Артём Здунов.

МР-нь Прявтонь тевтнень топавтыцясь макссь государственной казнеть неень шкане студентэнь отрядтнэс совицятненень ды сетненень, кить вейксэньгеменце иетнестэ вельмевтизь те лезэв тевенть. Истя жо казнесэ тешкстазельть ССО-нь од ломантне, кить кеменде ламоксть макссть верь лиятнень эрямост идемга.

Неень шкане Россиянь студентэнь отрядтнэ – масторонь общественной покш организациятнень эйстэ вейкесь. Сынст прявт тевесь – вузсо, колледжсэ тонавтнемстэ тонадомс важодеме, юткошкасто ёрокчист невтеме экономикань, образованиянь, культурань ды ламо лия тевтнесэ. Течи Мордовиясо лововить 87 отрядт, ков совить малав 2 тёжат од ломанть. Те иестэ сынь важодсть аволь ансяк эсенек республикасо, истя жо ульнесть Карелиясо, Татарстансо ды ламо лия таркатнесэ.

Мельть-арсемат икелень ды неень шкадонть

Нина Гришкина (тейтерьксэнь Валькова), «Чайка» ССО-нь прявтоль (1977-1979 иетнестэ), Саранск ошонь 26 номер лицеень тонавтомань ды воспитательной тевтнень коряс прявтонь полавтыця:

Те шкас мельспаросо ледстнян стройотрядсо важодеманть. Те ульнесь Н.П. Огарёв лемсэ МГУ-нь филологиянь факультетсэ тонавтнемстэ. Сизьгеменце иетнестэ монень прась уцяска улемс республикасонок ды сонзэ томбале содавикс «Чайка» отрядонь васня комиссарокс, мейле командирэкс. Кавто иень перть мельга-мельцек важодинек Покш Березниксэ. Витнинек школат ды эрямо кудот. Юткошкасто те ёнксонь паксятнесэ важодицятненень невтнинек концертэнь программат.

Пек вечкилинь баянсо седямо, вейсэ морамо, мейсэ кенярдовтынек велень тружениктнень ды те ёнксонь эрицятнень. Минек агитбригадась ульнесь пек паро, сон эрьва косо невтнесь ёрокчинзэ.

Койсэнь, стройотрядось пек ламо тень макссь, сон тонавтымим васняяк эсень кедьсэ эрьва мезень тееме. Эдь миненек, од ломантненень, савкшнось эстенек теемс раствор ды сонзэ нолдамс тевс, путомс плитка, маштомс штукатурямо, вачкамс кирьпецень стенат ды истя седе тов.

Теде башка, отрядонь прявтонтень эрявсь эрьва валске вийтнень видестэ явомс, кинь ков кучомс важодеме. Кие паникудов ярсамопелень пидеме, кинь цементэнь човорямо… Чинь перть весе пек сизекшнинек, ялатеке эштё мукшнынек вийть юткошканок парсте ютавтомс.

Нама, сехте питнеесь стройотрядонть эйстэ ульнесь эрий ялгань вастомась. Тосо мон теевинь содавиксэкс мирдем марто, кие се шкане ульнесь теке жо ёнкссонть, ансяк лия отрядсо врачокс. Свадьбанок налксинек колмо иень ютазь стройотрядсо важодемань шкасто, аламошкас тукшнынек кудов ды тагояк велявтынек тевенек поладомо.

Койсэнь, весе сеть, кить ютыть стройотрядонь алкуксонь школа, лисить эйстэст тевест парсте содыця ломанть. Самай тосо кемекстави ояксчись, вейке-вейкень туртов лезксэнь максомась, чарькодемась, ответственностесь.

Нина Буртасова (Аверьянова), «Чайка» ССО-нь икелень иетнестэ боецэсь, комиссарось ды командирэсь, тонавтыця:

Мордовиясо икеле молиця ды парсте важодиця «Чайка» отрядонтень бажасть понгомс ламо од ломанть. Тов сайсть парсте тонавтницят, общественной тевень топавтыцят ды важодеме маштыцят. Советской шкатнестэ монень прась уцяска ютамс, кода кортыть, служебной весе кузтематнень. Васняяк саимизь боецэкс, эштё сестэ мон рединь, кода виень ды шкань апак вансто топавтсть тевест командиртнэ ды комиссартнэ, кодамо ответственность путови стройотрядов эрьва молицянть лангс. Тосо кияк илязо кекшне важодемадо ялга удалов. Эдь тевесь вейсэнь, вейке объектсэ улемстэ ярмактнеяк пандовить вейкетьстэ.

Койсэнь, стройотрядось – пек эрявикс школа, сон тонавты педе-пев ушодозь тевенть топавтомо, бути эряви, ялгантень лавтовонь ладямо. А кодамо покш ответственность канды отрядонь прявтось аволь ансяк эрьва боецэнть, истя жо организациянть икеле, кинень строяви те эли тона объектэсь. Улезэ те школа, эйдень кужо эли эрямо кудо.

Кодамо каштанчи саи эрьва ломаненть иетнень ютазь, зярдо ютат се зданиянть вакска, конань тон стявтыть ялгатнень марто. Кенярдан сень коряс, те паро ушодксось вейксэньгеменце иетнестэ вельмевтевсь ды поладови те шкас. Эштё ули мелем ёвтамс истямо арсема, штобу одтнэ седе сеедьстэ вастневельть советской шкане стройотрядов якицятнень марто. Кеман, ули мезес тонавтнемс сыненст, эдь ансяк икелень опытэнть мельс саезь, одонть тонавтнезь, изнявить неень шкань стакачитне ды теевить од эскелькст икелев.

 

 

Валентина Юдина

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».