Пятница, марта 29, 2024
Важное


Мордовия Республикань Прявтось Артём Здунов МР-нь Госсобраниянтень Кучомасонзо, демографиянь коряс стакачитнеде пачтямсто, тешкстась: аватнеде, эйкакшпингеде, эйкакшонь триця семиятнеде мелявтоманть аравтома васенце таркас.
Мордовиясо неень шкане эрить 7,5 тёжадо ламо эйкакшонь триця семият, косо трить-кастыть колмо ды седе ламо эйкакшт.


Седе, кода течи эри республикань «Союз» ламо эйкакшонь триця семиятнень общественной организациясь, минь кортынек сонзэ прявтонть Надежда Алексеевна КОТЛОВА марто. Васенце кевкстеманок ульнесь седе, кодамо сехте покш лезкс явови ламо эйкакшонь триця семиятненень неень а шожда шкастонть.

– Алкукскак, пандемиясь эрямозонок совавтсь ламо стакачить, конат полавтызь минек организациянть важодема лувонзо. Икеле ламо эйкакшонь триця семиятне сеедьстэ сакшность тенек эрьва кодамо кевкстема марто. Минь пурнавкшнынек вейсэ чайде симеме, эрьва кодамо мероприятиянь ютавтомо, вейке-вейкенек пельде тонавтнеме.
Неень шкане виевгавтынек кедьстэ кедьс питневтеме ули-паронь максомань пунктонть важодеманзо. Миненек секе-тев кандыть оршамо- ды карсемапельть кода эсенек республикань эрицятне, истя кучнить гуманитарной лезкс Мордовиянь томбальде. Невтемакс, аволь пек умок ламо оршамопельть пачтясть Московсто. Нужасо эрицятнень уцяскаст шождалгавтыть священнослужительтнеяк, мезе сыненст пачтить, сынь максыть миненек. Сеедьстэ инжеть сакшныть Саранскоень епархиянь Серафим Саровский лемсэ храмсто, косто секе-тев пачтяви гуманитарной лезкс, Мордовиянь Од ломанень православной вейсэндявксонь «Доброделание» группасто.

– Надежда Алексеевна, кода тынь мукшнотадо нужасо эрицятнень?

– Ламо эйкакшонь триця семиятне парсте содасызь минек адресэнть, свал тенек сынсь сакшныть, гайневтить телефон вельде. Невтемакс, ютазь иестэ минек организациянть содавтызь 2374 ломанть, весенень тенст максозель сатышка лезкс. Минь эсенек ёндо тейтяно весементь, штобу тенек пшкадицятне авольть маря пряст покордазекс: а сёрмадтано лемест, фамилияст ды мезе сынь сайсть. Лиясто кочказенть лездатано пачтямс кудов, бути эйстэдензэ пек ламо.
Тешкстаса, миненек аволь ансяк ламо эйкакшонь триця семиясто сакшныть, истя жо сыре ломанть, кинь а саты пенсияст оршамопелень-мезень рамамс, стакасто сэредицят (инвалидт).

– Чарькодеви, Саранскойсэ эрицятненень а стака муемс тынк учреждениянть ды аволь васов тенст ардома. Кодамо лезкс явови республикань велетнесэ эриця ламо эйкакшонь триця семиятненень?
– Виде, Саранскоень эрицятне пачкодить куш кодамо эрямонь районсто общественной транспортсо. Вана республикань велетнесэ эрицятне (эдь аволь эрьвань ули эсензэ транспортозо) сакшныть аволь вейке чис. Ули-пародонть пек ламо, секс сыненст эрявиксэнть муемга ютавтома ламо шка.

Текенень поладса, покш кенярксчитненень минь анокстатано икеле ладсо. Ламо эйкакшонь триця весе семиятненень, конат совить минек общественной организациянтень, Од иенть каршо явинек казнеть. Кинь эстенек тердинек, кинень видьстэ кудос пачтинек.
– Вановтонк коряс, мезе течи эряви теемс масторсонок, республикасонок демографиянь кевкстематнень витемга, семиятнесэ эйкакштнень ламолгавтомга?

– Койсэнь, васень таркасо – ламо эйкакшонь триця семиятненень лезксэнть виевгавтомась, эрямо тарканть паролгавтомась. Виде, тень коряс эскелькст улить. Невтемакс, мелят РФ-нь Президентэсь В.В. Путин нужачинть (бедностенть) киртямга яволявтсь: аволь сюпавсто эриця тейтерь-аватненень, кить пешксесэ улемстэ васень шкасто стить учётс, теемс эрьва ковонь пандомат. Масторонь келес сонзэ покшолмазо среднейстэ ковозонзо 6350 целковойть. Теде башка, максозельть 10 тёжат целковойть школасо тонавтниця эрьва эйкакшонть лемс, истя жо явозель лезкс васенце классос туицятненень.

Те весе пек паро, эштё бу теемс полавтомат се законопроектэнтень, конань коряс анокставить документтнэ ламо эйкакшонь триця семиятненень эрямо таркань максомсто. Тевесь сеньсэ, зярс сынь аштить очередьсэ, покш эйкакштне ушодыть важодеме ды получамо зарплата. Се шкастонть саезь льготаст ёмить.

– Сеедьстэ-аволь эрси истя, зярдо ламо эйкакшонь триця семиятнесэ касозтнень истя жо ламо эйкакшост?

– Васняяк пачтян эсень семиям коряс. Мирдем марто тринек-кастынек ниле эйкакшт. Зярдо урозокс кадовсь патянь цёразо, саинек эстенек, сон кармась ветецекс. Кавонест тейтеренек ды саезь цёранок ламо эйкакшонь трицят. Покш тейтеренек Ольгань колмо эйкакшонзо, Антонинань ды Эдикень – нилень-ниле.

Текенень поладса, минек «Союз» вейсэндявксонтень совицятнень ютксо истят семиятнеде пек ламо. Шкась курок юты. Васняяк эйкакштне тетяст-аваст марто тенек сакшность, ней жо сынсь ламо эйкакшонь трицят! Те пек кенярдовты.

– Надежда Алексеевна, те иестэнть тынк организациянтень топодить 25 иеть, шкась а шожда, кода арсетядо тешкстамс сонзэ ды кодат аравтлувонк икелепелев?

– Виде, шкась ней а шожда. Пек кемтяно, те апаро ормась курок поты. Минь икеле ладсо карматано вейсэ ютавтомо ламо эрьва кодат мероприятият: якамо иневанькс таркатнева, вейсэ оймсеме ды важодеме.
Кемтяно, виевгады мелень явомась ламо эйкакшонь триця семиятненень, ламолгадыть седеймариця ломантне, кить кармить максомо тенек лезкс. Эдь аволь ансяк оршамопелень ды ярсамопелень коряс течи кирдить стакачить покш семиятне.

Сыненст, кода лия эйкакштнененьгак, эряви уцяскав эйкакшпинге: мазыйстэ оршамс, парсте оймсемс ды ветямс эрямонь шумбра лув. Ламось течи сынст тетятненень-аватненень а свал идеви. Кемеви, полавтовить шкатне, зярдо минек республикасо ды масторсо малав эрьва семиясо кармить улеме аволь вейке-кавто эйкакшт, колмо-ниле ды седе ламо.

«СОЮЗ» ЛАМО ЭЙКАКШОНЬ ТРИЦЯ СЕМИЯТНЕНЬ ОБЩЕСТВЕННОЙ ОРГАНИЗАЦИЯНТЬ АДРЕСЭСЬ ИСТЯМО: САРАНСК ОШ, А. ЛУСС КУРО, 6 № КУДО (ОМБОЦЕ ЭТАЖ). ИКЕЛЕПЕЛЕВ ГАЙНЕВТЕДЕ 89271808944 ТЕЛЕФОНОНЬ КОРЯС.


Валентина ЮДИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».