Четверг, марта 28, 2024
Важное

Таштамковонь 3-це чистэ тешкстави Терроризманть каршо бороцямонь чись. Тень кувалма А.С.Пушкин лемсэ Национальной библиотекасо панжовсь выставка.

Сондензэ ёвтни раськень ды краеведениянь литературань отделэнь прявтось Н.В.Бочканова:

– Минек библиотеканть фондозо пек сюпав. Секскак тенек шожда пурнамс книгань невтемат – выставкат. Течинь выставкасонть бажинек невтемс ловныцятненень, кодат улить библиотекасо терроризманть каршо бороцямонь материалт. Васенце пелькссэнть невтинек нормативной актт ды международной документт, документэнь сборникть, конатнень авторост Россиянь ды Мордовиянь содавикс юристтнэ. Омбоце пелькссэнть бажинек невтемс Н.П.Огарёв лемсэ МГУ-нь, М.Е.Евсевьев лемсэ МГПИ-нь, Кооперативной институтонь ды Правовой академиянь тонавтыцятнень тонавтомань пособияст. Истя жо тей пурнынек раськеютконь эрьва кодамо конференциянь, семинаронь материалт, конат алтавить те темантень, косо домкасто ваннови аволь ансяк терроризманть каршо тюремась, но и целанек юридической наукатне. Эйкакштнень туртов макстано пек ламо материалт. Неть: научно-популярной изданият, журналт, учебной пособият, косо чарькодевиксстэ ёвтневи эйкакштненень, кода ветяма эсь прянть те шкастонть, кода эряви аштемс терроризманть каршо. Весе теде эряви содамс, кодамо зыян канды. Теде башка, минек библиотекасо нолдавить эрьва кодат информационной материалт, памяткат, эрявикс литературань спискат, косо ёвтнетяно сеть книгатнеде, кодат улить библиотекасо, ков эряви молемс неть книгатнень мельга, кодамо сынь отделсэ ды кода мартост важодемс. Тесэ юридической тематикань коряс журналт.

– Библиотекась пштистэ ваны сеть книгатнень мельга, конатнень а мереви кирдемс ловнома кудонь фондсо. Истямо литература минек арась. Тешкстаса, ансяк библиотекась максы эрявикс ды виде литература, самай тестэ муеви алкуксонь информациясь. Библиотекасо важодицятне содыть, кода важодемс те теманть коряс, – кортась А.С.Пушкин лемсэ Национальной библиотекань прявтось А.В.Бакулина.

Вастовомантень сакшнось Саранск ошонь округканть Россиянь МВД-нь Управлениянь общественной порядкань ванстомань отделэнь правань коламотнень профилактикань отделениянь инспекторось Е.Н.Шульгов. Сон пачтясь, выставкась эрявикс, те теманть эряви кепедемс. Евгений Николаевич ёвтнесь, кодамо смусть канды «терроризма» валось. Кодамо тень кисэ ули уголовной ды административной ответственность, кода чумондовить зыянонь теицятне. Покш мель эряви явомс од ломантненень. Сынь апак арсе мезть понгсь путнить Интернетсэ эсь лопазост, совсить экстремистэнь группас ды седе тов. Свал арсема, мезе эряви путомс Интернетс ды мезе а эряви. Лиясто одтнэнь лангсо зыянонь кандыця артовкс ды тешкс марто оршамот.

Эряви меремс, А.С.Пушкин лемсэ Национальной библиотекась ды МР-нь МВД-сь кеместэ важодить эрьва кодамо ёнксонь коряс.

 

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».