Виктор Михайлович Василькин весе пингензэ алтызе Н. П. Огарёв лемсэ МГУ-нь Аграрной институтонтень. Научной статьянзо лиснить аволь ансяк Россиясо, омбо масторсояк. Нейгак учёноенть Хиршень индексэзэ – вете. РИНЦ-нь коряс («Российский индекс научного цитирования») наукань кандидаттнэнь Хиршень индексэсь онкстави колмосто саезь котос.
Сон содави учёноенть публикациянзо коряс. Эйстэст улема кеменде а седе аламо. Теде башка, ванови, зяроксть сайневить цитатат эрьва научной статьястонть. Ве валсо, неяви ды невтеви, зяро вадрясто сёрмадозь статьят нолдась учёноесь, конатнестэ лия наукасо важодицятне сайнить цитатат. Рузонь кельсэ тень туртов сайневи «хорошо цитируемый» терминэсь.
Течинь чинтень Виктор Михайловичень зярыя должностензэ, неть – «Сигма Агро» Научно-производственной вейсэндявксонь директор, «Агроальянс» ООО-нь научной консультант, «Сигма-плюс» ООО-нь развитиянь коряс прявтонь полавтыця. Сон – велень хозяйствань наукань кандидат, доцент, Н. П. Огарёв лемсэ МГУ-нь старшей научной сотрудник.
Тешкстама, «Сигма Агрось» сови «Сигма-плюс» ООО-нь лабораториянтень. Кавонест заводтнэ Саранскойсэть. Сынь важодить вейсэ, теить вейке тев. Продукцияст секе-тев ускови лия регионтнэва. Виктор Василькин домкасто ёвтнесь эсь тевдензэ:
– Минь тейтяно истямо продукция касовкстнэнь туртов, конась а максы ёмавтомс норовонть. Кенерезь сюронть пурнамсто колозось а пры ды а памори. Лемест: Униклей, Филастик Био ды лият, конат лездыть сюпалгавтомс моданть микробиологической составонзо. Теде башка, нолдатано ракшатненень эрьва кодат добавкат – пробиотикть, пребиотикть, истят, кода: Генезис Авес, Генезис Таурус ды седе тов. Прявт заводонок нолды полиэтиленовой пакетт, пропиткат, конатнень вельде чувтосто теезь кудотнень-мезтнень ваднезь лазтнэ ды чочкотне ванстовить ды мазылгадыть.
Виктор Василькин чачсь 1958 иень октябрянь 2-це чистэ икелень МАССР-нь Дубёнкань райононь Залесье, эрзякс – Васоло Пакся, велесэ. Ансяк чачома конёвсонзо сёрмадозь – Антоновка велесь.
Виктор Михайлович тонавтнесь Н.П. Огарёв лемсэ МГУ-нь Аграрной институтсо, конань прядызе якстере диплом марто. Арасель вейкеяк «нилезэ». Мейле, 1987–1990 иетнестэ, тонавтнесь аспирантурасо. 1991 иестэ Ленинградсо (Санкт-Петербургсо) идизе кандидатской диссертациянзо. Тов натой тердтнизь важодемеяк. Ансяк цёрась эзь кадово. Кода, келя, мон эрзянь веленть кадса…
Алкукскак, мартонзо кортнинек ансяк эрзянь кельсэ, дивсинек, кода парсте сон содасы тиринь келензэ. Келя, бажан кортамс седе ваньксстэ. Натой иетненьгак тенек ёвтнинзе эрзякс, мезесь допрок а вастневи неень шкасто. Истямо мельспаросо тиринь кельсэ эзинек кортне умок.
Виктор Михайлович пенсиязонзо важодсь аграрной институтсо преподавателекс. Тосо студенттнэнь тонавты нейгак. Ней тензэ 65 иеть. Те шкас важоди сиземань апак сода, мизолдозь корты, эсь прям, келя, маряса комсешка иесэ цёрабаекс. Истя эрси, зярдо важодят од ломань марто, сестэ эсь пряткак одокс мартост марят.
Студенттнэнь туртов Виктор Михайлович тонавтсь «Растениеводство», «Хранение и переработка продукций растениеводства», «Стандартизация», касовкстнэде лия эрьва кодат спецкурсат.
– Тонавтынь тикшетнень-сюротнень коряс технологиянть – педе-пес молемс: кода видемс-путомс, кода кастомс, мейле кода сынст одс теемс (переработать), кода натой кши панемс, поза теемс, салтомс-чапавтомс ды седе тов, – ёвтни В. М. Василькин.
Виктор Михайловичень ули пек лезэв изобретениязо. Те – Генезис Органик препаратось. 2022 иестэ корязонзо лиссь «Препарат для переработки органических отходов быта человека, животноводства и птицеводства» патентэзэ. Те изобретениясь кандови биотехнологиянтень. Сонзэ вельде алкиньгады эли допрок ёми ломанень органической отходтнэде ды ракшатнеде мейле навозонь пурнавкстнэде апаро чинесь (токсичностесь). Те тееви коштсонть сероводородонть ды аммиаконть ёмамост кувалма. Теде башка, препаратось бойкасто наксавты олгонть, модамарень, кукурузань, чиньжарамонь нетькстнэнь. Патентэнь оригинальной документэзэ ванстови «Федеральный институт промышленной собственности, отделение ВПТБ» библиотекасонть. Нама, истямо арсевксэсь маштови велень туалеттнэс ды ракшань ферматнень туртов.
Теде икеле, 2017 иестэ, лиссь «Характеристика лесоматериалов хвойных пород и рекомендации по их обработке и уходу за изделиями из них с помощью масляных и масляно-восковых пропиток» книгазо. Те научной книгась Россиясо саекшнесь омбоце тарка аграрной литературанть ютксо. Сон алтазь «Биология», «Ландшафтный дизайн» специальносттнень коряс тонавтниця студенттнэнь туртов. Эйсэнзэ ёвтневи пичетнень составост эрьва ёндо ванкшномась, те чувтонть паро ёнксонзо ды асатыксэнзэ, хозяйствасо, строительствасо тевс нолдамозо ды сонзэ ванстомазо.
Тешкстама, пичестэ кудонь эли лия мезень стявтомсто «Сигма Плюс» заводонь специалисттнэ максыть превс путома ваднемс чочкотнень антипиренсэ кизэнть самодо икеле. Тень теемс компаниясь нолды толдо ванстыця оень ды ой марто штань средстват, истят, кода: «Сигма-Био» ды «Сигма-Д», конат лездыть ванстомс кудонть паломадо ды лоткавтомс толонть молеманзо пожаронь шкасто.
Аштетяно каштанчисэ минек Мордовиянь учёнойтнень кувалма. Арсетяно Виктор Михайловичнень шумбрачи, ламо вийть ды од, лезэв арсевкст!
Марина АГАФОНОВА