Н.П. Огарёв лемсэ МГУ-со ютавтовсь пресс-конференция, кона алтавсь 2020 иень примамонь кампаниянь итогтненень. Республикань журналисттнэнь марто вастовкшность вузонь ректорось, примамонь комиссиянь прявтось С.М. Вдовин ды примамонь комиссиянь ответственной секретаресь О.О. Томилин.
«Пандемиясь тейсь покш полавтомат 2020 иень примамонь кампаниянь лувсонть, – мерсь Сергей Михайлович. – Полавтозель ЕГЭ-нь максома шкась, тень коряс вузов документтнэнь максома шкаськак седе кувалгавтозель – таштамковонь 15-це чис. Теке марто яволявтоматнень, кода Россиянь лия вузтнэяк, приминек дистанционной форматсо. Университетэнь сайтсэнть важодсь «Личный кабинет абитуриента» сервисэсь, козо эрявсь кучомс эсь документтнэнь.
Тешкстаса, вузонь электронной информационной образовательной системась важоди уш аволь васенце ие ды те тевенть топавтызе. Тонавтнеме бажицятнень пельде састь 13 тёжадо ламо яволявтомат. Теке марто лангс ливтезельть лия мелявкст. Школань аволь весе прядыцятне содасызь информационной технологиятнень. Сайтэсь абитуриенттнэнь туртов теезель шождакс, максозель важодемань инструкция, роботась «пси линия», ансяк тень коряскак аволь весе маштсть теемс анкетанть ды путомс документтнэнь скан-копиятнень.
Пшкадян школатнень, гимназиятнень, лицейтнень тонавтыцятненень явомс башка мель те кевкстемантень. Информационной технологиятнень содамось – эрявикс тев аволь ансяк Н.П. Огарёв лемсэ МГУ-в тонавтнеме самсто, масторонь лия вузтнэсэяк истя».
Сергей Вдовин тешкстызе, 2020 иестэ вузонь студентэкс кармасть 4177 ломанть. Истя, высшей тонавтнемань программанть коряс (бакалавриат, специалитет, магистратура, аспирантура, ординатура) саезь: 2507 ломанть – бюджетэнь таркатнес, 1137 – тонавтнеманть кисэ кармить пандомо. Средней профессиональной тонавтнемань программатнень коряс примазь 483 ломанть. Н.П. Огарёв лемсэ МГУ-нь лицейсэ панжовсть кавто 10-це класст, косо кармить тонавтнеме 50 ломанть.
ЕГЭ-нь средней баллось ютазь иенть коряс кассь: бюджетэнь таркатнес сон кармась 68,1 (+1,6), тонавтнеманть кис пандомань коряс – 59 (+5). Бакалавриатонь ды специалитетэнь программатнень коряс конкурсось ульнесь кото ломанть вейке таркас.
Истя жо минек университетэнть кочкизь 749 ломанть Россиянь 51 субъектстэ. Кода свал, седе ламот эйстэст састь Нижней Новгородонь, Пензань, Ульяновскоень, Самарань ёнкстнэстэ, Московсто ды Московонь областьстэ.
Омбо масторонь од ломантнень туртов жо примамонь кампаниясь поладови. Тувталось теке жо – коронавирусонть марто сюлмавозь эпидемиологиянь тевтне. Веенст мастортнэнь марто границятне зярс пекстазь, лиятнесэ зярс максыть экзамент школатнесэ. Тень коряс лия масторонь абитуриенттнэнь пельде документтнэ саевить ожоковонь 17-це чис. Течинь чине университетс макссть яволявтомат 31 масторонь 378 ломанть. Одтнэнь ютксо истят мастортнэ, кода Ганась ды Сьерра-Леонесь. Весемезэ 2020 иестэ арсеви примамс 515 ломанть высшей тонавтнемань программатнень коряс ды малав 200 омбо масторонь эрицят – анокстамонь отделениятнес.
Вастовоманть лувсо Сергей Вдовин башка мель явсь целевой примамонь темантень. Ды тешкстызе, важодема таркань максыцятне явить мель истят специалисттнэнь анокстамонтень, конат уш тонавтнема шкасто кармить ютамо предприятиясост практиканть, стажировканть ды седе вадрясто чарькодьсызь важодема лувонть. Тедеде целевой направлениянь коряс саезь 223 ломанть.
Истя жо Сергей Михайлович тешкстызе, 2020 иестэ тонавтнеманть кисэ пандоманть покшолмазо эзь кастово. Сон кадовсь 2019 иенть коряс.
Юлия Еремина