Ламо иеть уш ютасть, кода прядовсь Ине Отечественной войнась. Чиде-чис аламолгадыть сеть стака иетнень пачк ютыцятне. Ансяк эйстэдест ледстнематне кадовить пингеде-пингес. Кортамось моли аволь ансяк яттнэнь каршо тюремань паксятнесэ воёвицятнеде, истя жо тылсэ важодицятнедеяк. Те статьясонть минь ёвтнетяно Федоткинтнэнь тонавтыцянь семиядонть, конатне ульнесть эсь шкань алкуксонь патриотокс.
Зинаида Сергеевна Федоткина (Балыкова) чачсь 1915 иень октябрянь 11-це чистэ Отяжелень райононь Ламбаське велесэ. Паспортонь коряс сон – Зинаида, ансяк мерсть тензэ – Нина. Тетянзо зярдояк эзизе некшне, авазо пешксесэль, зярдо сонзэ саекшнизь войнав, косо ёмась кулявтомо.
Теке велень сисем класстнэнь прядомадо мейле Нина тонавтнесь Козловкань педагогической техникумсо, группасонть, конатнень анокстасть эрзянь школатнень туртов. Тейтересь тонавтнесь «ветес». Истя жо тосо явсь мель музыкантень, маштсь седямо скрипкасо, мандолинасо, пианинасо. Сыця шкань мирдезэ, Прокофий Степанович, Козловкань техникумсонть тонавтсь математиканть. Ломанесь казямоль, ансяк видечинь вечкицяль, весень пельде вешсь прянь вадрясто ветямонть, предметэнзэ содылизе пек парсте ды тонавтницятненень ёвтнесь чарькодевиксстэ. Нина математиканть содылизе, тень лангс апак вано, Прокофий Степанович весть тензэ путсь «колмо». Мейле тейтересь, зярдо уш лисекшнесь экшезэнзэ мирденень, пеедькшнезь мерекшнесь тензэ: «Арсить урьвакстомс лангозон, секс, паряк, уш икелепелев кежень пандомга путыть тень «колмо»?»
Техникумонть прядомадо мейле Нина Сергеевна важодсь Ламбаськень школасо тонавтыцякс. Тесэ сынст чачсь васенце цёрынест – Юрий. Те велесэнть ульнесь колхоз, конань лемезэль «Красный Октябрь». Ярмакт важодицятненень эзть максне, явнокшность сюро. Тонавтыцятненень, нама, пандсть зарплата, секс сынь аламодо седе парсте эрясть сокицятнень-видицятнень коряс. Кудочисткак седе сюпавсто ветясть. Колхозсо важодицятне куш ярмакт эзть некшне, ялатеке эзть нусмакале, чокшне ланга велесэнть эрьва ёндо марявсть гармониясо седямот, морот… Те весемесь полавтовсь, зярдо сась 1941 иесь. Ушодовсь ламо верень валовтыця войнась. Цёратне саезельть фронтов. Эрямось кармась стакадояк стакакс. Ярсамопельть арасельть. Нина Сергеевна эрясь ававтонзо, атявтонзо, тиринь аванзо ды вишка цёрынензэ марто. Эйстэст конаськак эзь важоде. Сон ськамонзо эсь лавтовонзо лангсо усксь весень…
Велесэнть эрямось мольсь «Весемесь фронтонтень! Весемесь Изнямонтень!» лозунгонть ало. Ине Отечественной войнань шкасто тонавтыцятне ветясть идейно-политической робота. Ламот велетнесэ тонавтыцясь кадовиль советской властень вейкине представителекс. Сонензэ молильть лезкс, превс путома мельга. Ламбаське велень колхозсо теезель ревизионной комиссия, Нина Сергеевнань аравтокшнызь сонзэ председателекс. Тевесь пек стакаль, эдь шкась уш пек сумбораль. Ламо продукция ильтявсь фронтов. Эрявсь пштистэ ваномс весементь мельга, истя жо паксясо тевтнень мельгаяк. Эрявсь содамс, зяро анокстазь тикше, сюро ды лия мезе. Нама, аволь ансяк ваномс – весень марто вейкетьстэ важодемскак. Малав весементь ломантне топавтсть кедьвийсэ: видсть сюро, пивсэсть, ледсть тикше, сюлмсесть пултт… Тонавтыцятненень савсь тенень одс тонавтнемс.
А эштё тельня цят якшамоне, карксамга лов потмова школанть туртов пенгеть анокстасть. Мекс тельня?! Секс, што кизна ды сёксня лия тевтнеде пешксельть. Нина Сергеевна нешкепиресэяк важодсь. Тосо сон свал якась ашо икельгапацясо ды сонензэ мерстькак: «Ашо фартук». Эрсиль кевкстить: «Кие сёрмадстынзе конёвтнень?» Каршо валось ульнесь: «Ашо фартук».
Ярсамопельтне а сатныльть. Кшинть пансть марчонь. Нина Сергеевнань кудосотненень покш уцяскакс ды сюпавчикс марявсь, зярдо Казаньстэ оймсеме нолдылизь мирдензэ, Прокофий Степановичень. Тосо сон важодсь заводсо, косо тейсть боевой самолёттнэнь туртов эрявикс пелькст.
Школасояк тевтнеде ламольть, эдь цёра-тонавтыцятне туекшнесть фронтов. Савсь важодемс сынст кисэяк. Класстнэсэ якшамоль, чернилатнеяк кельмильть. А сатныльть тонавтомань книгатне, сёрмадомапельтне. Тонавтомс савсь ёвтнемань лувсо. Школань тевтнеде мейле – кудонь тевть: эйкакшт, кардаз потмо ракшат ды ламо лия тевть. Нина Сергеевна кортыль: «Пальтонь повтнень юкстнеме ушодылинь шабратнень кудост вакссо, штобу, кудов совазь, седе куроксто полавтомс оршамотнень ды кундамс тевтнес».
1942 иестэ сынст чачсь Анатолий цёрынест. Ды вана окойники сась 1945 иень маесь – Изнямо! Эрямось таркасонзо а ашти. Стака шкатне кармасть кадовомо удалов. 1946 иестэ чачсь колмоце цёрынест – Николай.
Войнадо мейлеяк Нина Сергеевна важодсь Ламбаськень школасо. Тонавтницятне эйсэнзэ вечксть, кунсолость. Зярдо сыльть РОНОсто важодицят, директорось кучилинзе сонзэ уроктнес, сон кортыль тензэ: «Тонь уроктнесэ свал весемесь моли вадрясто, эйкакштне превейть, вечкить тонавтнеманть. Секс, кеман, визьксчамас а ветясамизь». Мейле од тев. Ушодсть од кудонь стявтомо. Нама, тевесь стакаль, тень лангс апак вано, кенярксовольгак.
1952 иестэ чачсь нилеце эйкакшост, учовиця тейтернест Татьяна, конань пек вечкилизе Прокофий Степанович. Ансяк а кувать тензэ савсь кольневтемс тейтерьканть, лавшо шумбрачинь коряс сон тусь эрямостонть.
1970 иестэ Нина Сергеевна тусь пенсияв, кадызе вечкевикс тевензэ. Ламо иень перть парсте важодеманть кис сон казезель ламо медальсэ ды грамотасо. Кулось малав 85 иесэ.
Прокофий Степанович Федоткин чачсь 1913 иень мартонь 13-це чистэ Отяжелень Ламбаське велесэ. Тонавтнесь теке велень школасонть. Мейле тонавтнеманзо поладокшнызе Ленинградонь индустриальной техникумсо. Теде мейле тонавтсь математикантень Козловкань педтехникумсо. Ине Отечественной войнав эзизь саекшне, Ленинградонь авиационной заводсо тейсь детальть боевой самолёттнэнь туртов. Те заводонть 1941 иестэ эвакуировакшнызь Казанев, ды ушодсть нолдамо У-2 самолёттнэнь. Ансяк сынь аволь пек маштовсть боень ветямосонть, секс сонзэ одс арсизь-теизь бомбардировщикекс, конанень максокшнызь «Небесный тихоход» лементь. Сон кармась легендарной фронтовой машинакс. Заводсонть важодсть чинек-венек, ломантне пильге лангсто прыльть, ансяк весень ульнесь вейке мелест – седе курок саволь Изнямось.
Войнадо мейле Прокофий Степанович важодсь Цёлпановань школасо, ветясь математика. Уроктнесэ сон макснесь виев содамочить, весе эйкакштнень вечкилинзе вейкетьстэ. Сон свал кортыль: «Эрьва эйкакшось – те личность. Эдь эрьванть эсензэ обуцязо».
Нина Сергеевна ды Прокофий Степанович Федоткинтнэнь тейтерест Татьяна истя жо важодсь тонавтыцякс Отяжелень Ламбаське велесэ. Татьяна Прокофьевна Уткина (Федоткина) тонавтсь тиринь кель ды литература. Истя жо кувать роботась вишка класстнэсэ. Ризксэнтень, сон апак учне тусь эрямостонть. Кадовсь тейтерезэ, кона истя жо тусь малавиксэнзэ янга – сонгак тонавтыця. Вана учителень цела династия. Ды, кемеви, сон поладови седе товгак.
Наталья УТКИНА,
1941-1945 иетнень войнань ды трудонь подвигень мемориальной музеень важодиця.
Фотось саезь семиянь архивстэ