Эште древнегреческой философось Сократ мерсь: «Весе профессиятне ломантнень пельде, ды ансяк колмотне Пазонть пельде: тонавтыця, судья, врач». Нать, а стяко содавикс философось тонавтыцянть ладизе васенце таркас. Эдь эйкакшонть кастомасо, превс путомасо, кодамо ломань эйстэнзэ лиси, покш таликазо аволь ансяк тетянть ды аванть, истя жо тонавтыцянтькак.
Виде, неень шкане эрсить эрьва кодат мельть-арсемат тонавтомань лувдонть ды тонавтыцятнеде, ялатеке сынст ютксо седе ламо истят, кить алкукс вечксызь эсь профессияст ды седейшкава те тевенть поладыть сынст эйкакшост ды нуцькаст.
Аволь умок теньсэ эште весть кемевтевинь «Саранская общеобразовательная школа-интернат для детей с нарушением слуха» МР-нь ГБОУ-нь воспитательной роботань коряс прявтонь полавтыцянть, сурдопедагогонть, Мордовия Республикань образованиянь заслуженной роботникенть, Российской Федерациянь общей образованиянь почетонь лемсэ казезенть Галина Николаевна Симакова марто содавиксэкс теевемстэ.
Те эрзянь авадонть ды важодема таркадонзо сермадомань тувталтнэде ламо ды сынь кенярксовт.
Сы иестэ те школантень топодить 40 иеть. Галина Николаевна тесэ важоди малав весе те шканть перть: 15 иеть прявтонь полавтыцякс, 25 иеть – тонавтыцякс-дефектологокс (сурдопедагогокс). Весемезэ вейке таркасо важодемань стажозо 35 иеть. Те учреждениясонть сон ушодсь важодеме эште М.Е. Евсевьев лемсэ педагогической институтсо омбоце курссо тонавтнемстэ. Васня ютась практика, мейле кармась оймсема чинь воспитателекс. Сы шкань профессиянтень тонавтыцякс тензэ ульнесь авазо – Мордовия Республикань образованиянь заслуженной роботникесь Анастасия Даниловна Макарова. Те эрзянь авась 20 ламо иеть школасонть-интернатсонть ульнесь тонавтнемань ды воспитательной роботань коряс прявтонь полавтыцякс ды сурдопедагогокс.
Покштязо ютызе войнанть
Галина Симаковань (тейтерькс Макаровань) ундоксонзо Покш Березникень районсто. Авазо, Анастасия Даниловна, чачсь-кассь ламо эйкакшонь триця семиясо. Сонзэ покштязо-бабазо – Даниил Максимович ды Мария Яковлевна Фадеевтне, трясть-кастсть кото эйкакшт – кавто тейтерть ды ниле церат.
Те семиянтень аволь шожда эрямо савсь цидярдомс. 1941 иестэ, кода ушодовсь Ине Отечественной войнась, Фадеевтне эрясть Хабаровской краень Комсомольск-на-Амуре ошсонть.
Даниил Максимович тосто тусь фронтов. Низэ, Мария Яковлевна, Николай церынест марто, сась эрямо тиринь енксов – Покш Березникень райононь Шугурова велев.
Истя, Галина Николаевнань покштязо войнань васенце читнестэ саезь Ине Изнямонть самс ульнесь фронтсо, ды ансяк сонзэ прядовомадо мейле велявтсь тиринь велев. Вейсэ эрицятнень марто кармась вельмевтеме войнадо мейлень велень хозяйстванть. Семияст покшоль, эрясть ояксчисэ, вейкест-вейкест туртов лездазь. Кавонест тейтерест – Анастасия ды Раиса, тонавтнесть Н.П. Огарев лемсэ Мордовской государственной университетсэ, эрямонь тевекс кочкизь эйкакшонь тонавтоманть.
Уцяскав эйкакш пинге
Кода вере ледстинек, Галина Николаевнань авазо, Анастасия Даниловна, школань прядомадо мейле тонавтнесь Н.П. Огарев лемсэ МГУ-со. Сон кочкизе химико-биологической факультетэнть. Тонавтнеманзо прядомадо мейле, лиссь мирденень шабра Симкина велень од церань экшс. Николай Макаров, нинзэ ладсо, ульнесь ламо эйкакшонь триця семиясто. Тетязо-авазо – Яков ды Анна Макаровтне, истя жо аволь шожда эрямо печтясть, эдь сыненст прась уцяска трямс-кастомс эйкакшост войнань стака иетнеде мейле. Тень лангс апак вано, покш каштанчисэ аштесть Николай цераст кувалма. Сэрей ды мазый од церась школань парсте прядомадо мейле тонавтнесь Тюменской высшей военной училищасо.
Одтнэ урьвакстсть-венчасть 1968 иестэ ды теде мейле аволь весть савсь полавтомс эрямо таркаст. Зярыя шкань перть эрясть Приморской краень Дальнереченскойсэ.
1985 иестэ Дальний Востоксто Макаровтне састь эрямо Мордовияв. Ризксэнтень, Пазось эзь максо кувака пинге кудазоронтень. Николай Яковлевич 1998 иестэ апак учо кулось, сонензэ ульнесь ансяк ведьгемень вейке ие…
Тонавтыцянь династия
Фадеевтнень тонавтыцянь династиянть вейсэнь стажост малав 200 иеть. Пингень перть Шугуровань средней школасо васня тонавтыцякс, мейле эште завучонь тев топавтсь Галина Николаевнань покштянзо сазорозо – Мария Максимовна Абрамова.
Ламо иень перть эйдень кужонь прявтокс, шкань ютазь теке велень школасо тонавтыцякс ульнесь аванзо сазорозо – Раиса Даниловна Железова. Истя жо Шугуровань средней школасо малав колоньгемень иеть омбо масторонь кель ветясь тейтерезэ – Галина Александровна Россяйкина. Паряк, те шкас бу важодевель, бути школанть мелят аволизь пекста.
Фадеевтнень урьваст – Анна Ивановна, истя жо колоньгеменде ламо иеть эрзянь ды рузонь кель тонавтсь Шугуровань средней школасо, мейле сонзэ тевенть поладызе тейтерезэ – Наталья Алексеевна Демина.
Галина Симаковань авазо, Анастасия Даниловна, пингень перть, косо бу аволь саво тензэ эрямс, свал тонавтсь эйкакшт. Мордовияв самодо мейле ламо иень перть важодсь Саранскоень коррекционной школасо-интернатсо, васня тонавтыцякс, мейле ламо иеть – прявтонь полавтыцякс. Сон свал бажась содамочитнес, вейке высшей образованиянть лангс эзь лотка. Кода кармась важодеме Саранскоень школасо-интернатсо, стакасто сэредиця эйкакштненень лездамга, сон ушодсь тонавтнеме Ленинградсо Александр Герцен лемсэ Российской государственной университетсэ, сурдопедагог специальностень коряс. Сонзэ тевенть поладызе тейтерезэ Галина Николаевна. Школасо-интернатсо Галина Симакова аволь ансяк административной важодемань парсте топавтыця, сон прявтонь полавтыця, эште сурдопедагог, кие свал анок лездамс сэредиця эйкакштненень. Те сонзэ ушодксонзо коряс ютавтовить ламо мероприятият, одкстомтови тонавтнемань-воспитательной лувось – невтить пряст истят федеральной проекттнэсэ, кода «Современная школа», «Доступная среда». Эрямос совавтови «Россия – мои горизонты» программась. Ютазь иестэ сонзэ покш путовксозо «Сильные идеи для нового времени», «Театр это для всех» Весероссиянь форумтнень ютавтомасо.
Галина Николаевна весе лия тонавтыцятнень марто аноксты программат ды тонавтнемань пособият стакасто сэредиця эйкакштнень туртов. Сон теи весементь, мезе сонзэ вийсэ, тонавтницятнень шумбралгавтоманть, тетятнень-аватнень эрямост шождалгавтоманть туртов.
* * *
Ломань ютксо кортыть, эйкакшонок эрьва тевсэ минденек икеле улест. Истя лиссь Фадеевтнень раськесэ, истя жо Макаровтнень семиясояк. Сынь трясть-кастсть кавто паро эйкакшт, кить муизь эрямосост эсест тевест. Цераст, Олег Николаевич, профессиянь коряс строитель, сон важоди «Саранскгорводоканал» МП-сэ прявтонь тевень топавтыцякс, тейтерест, Галина Николаевна, лезды стакасто сэредиця эйкакштненень ды сынст малавикстнэнень.
Анастасия Даниловнань жо сехте покш кенярксозо вете нуцьканзо ды вейке правнуцьказо. Неень шкане сон лезды сынст кастомасо ды превс путомасо. Кие соды, паряк, кияк эйстэст поладсы тонавтыцянь династиянть ды сови сынст раськень историяс.
Валентина Юдина