Мартонь 24-25-це читнестэ Н. П. Огарёв лемсэ МГУ-со ютась «IQ ПФО» Интеллектуальной VIII-це олимпиада. Тосо пелькстасть Равчирень федеральной округонь кемнилее региононь студенттнэ. Олимпиадасонть васенцеде ульнесть Белорусско-Российской университетэнь тонавтницятне.
«IQ ПФО» олимпиадась МГУ-со ютавтневи 2016 иестэ саезь. Од ломантне пелькстыть кото ёнксонь коряс: инженерной командань конкурс, робототехника, программирования, «Что? Где? Когда?» налксемась, парламентэнь дебатт, управленческой пелькстамот.
Тедеде пелькстамо сакшность малав 250 ломанть. Мордовиясь вастсь 14 делегацият. Эрьвасонть 17 студентт ды ветицяст.
Интеллектуальной олимпиадась панжозель Н. П. Огарёв лемсэ МГУ-нь Культурань ды искусствань кудосо. Лембе вал марто инжетненень пшкадекшнесть МР-нь Прявтось Артём Здунов, ПФО-со Россиянь Президентэнь полномочной представителень полавтыцясь Олег Машковцев ды Н.П. Огарёв лемсэ МГУ-нь ректорось Дмитрий Глушко.
– Неень шкасто безопасностень ды дипломатической тевтнень коряс кевкстематне аштить васенце таркасо. Олимпиадань номинациятне пек эрявикст, сынь лездыть тенек касомс-виевгадомс. Ютась се шкась, зярдо учинек, паряк, кияк максы тенек эсензэ арсевксэнзэ-теевксэнзэ. Эряви кемемс эсь вийтнес. Истямо олимпиадась лезды пелькстамс лиятнень марто. Конкурстнэсэ минь виевгадтано, – пачтясь МР-нь Прявтось Артём Здунов.
* * *
Артур Еремов сась Татарстансто. Сон пельксты «Робототехника» номинациясонть. Од цёрась тонавтни Казаненть маласо аштиця Иннополис Университетсэ, 3-це курссо. Кочкизе программистэнь-робототехникень специальностенть. Важоди микроконтроллертнэнь, датчиктнень, мотортнэнь марто, тонавтни тейнеме роботт. Сон уш омбоце ие важоди теке университетэнь лабораториясо. Олимпиадасо пельксты 7-це классто саезь, зярдо кармась тонавтнеме Казанень it-лицейсэ. Аволь васенцеде варчни виензэ «IQ ПФО» олимпиадасонть.
– Тедеде Интеллектуальной олимпиадасо ламо од заданият. Улить истят, конатнень неинек васенцеде. Эряви тенек сёрмадомс эрьва кодат программат. Максовить кавто турт, эрьвасонть заданият. Командатненень эрявить седе куроксто теемс. Кой-конатне теевить вейке минутас, – ёвтнесь Артур.
Олимпиадань пекстамось ды изницятнень лемест яволявтомась ютась Республикань культурань кудосо. Тесэ паронь арсемат пелькстыцятненень ёвтасть МР-нь Правительствань Председателень полавтыцясь Галина Лотванова, ПФО-со Россиянь Президентэнь полномочной представителень полавтыцясь Олег Машковцев ды Н. П. Огарёв лемсэ МГУ-нь ректорось Дмитрий Глушко.
Пелькстыцятнень ютксо изницякс лиссь Башкортостанонь командась, омбоце таркасо – Татарстанонь, колмоцесэ – Мордовиянсесь. Истя жо яволявтозельть ды казезельть весе кото номинациятнень коряс изницятне.
Татьяна Маторкина